"ദീദി പോകുന്നു, ബിജെപി വരുന്നു"; റെക്കോർഡ് പോളിങ് വിജയസൂചനയെന്ന് അമിത് ഷാ

APRIL 24, 2026, 10:04 PM

കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ ഒന്നാം ഘട്ടത്തിൽ രേഖപ്പെടുത്തിയ വൻ പോളിങ് സംസ്ഥാനത്തെ ഭരണമാറ്റത്തിന്റെ വ്യക്തമായ സൂചനയാണെന്ന് കേന്ദ്ര ആഭ്യന്തര മന്ത്രി അമിത് ഷാ.

കൊൽക്കത്തയിൽ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. 16 ജില്ലകളിലായി 152 മണ്ഡലങ്ങളിൽ നടന്ന വോട്ടെടുപ്പിൽ 92.98 ശതമാനം എന്ന റെക്കോർഡ് പോളിങ് ആണ് രേഖപ്പെടുത്തിയത്. ഇത് തൃണമൂൽ കോൺഗ്രസ് സർക്കാരിനെ പുറത്താക്കാനുള്ള ജനങ്ങളുടെ തീരുമാനത്തെയാണ് പ്രതിഫലിപ്പിക്കുന്നതെന്ന് അദ്ദേഹം പറഞ്ഞു.

"ദീദി പോകുന്നു, ബിജെപി വരുന്നു" എന്നായിരുന്നു മമത ബാനർജിയെ ലക്ഷ്യമിട്ട് അമിത് ഷായുടെ പരാമർശം. ഒന്നാം ഘട്ടത്തിൽ വോട്ട് ചെയ്ത 152 സീറ്റുകളിൽ 110-ലധികം സീറ്റുകൾ ബിജെപി നേടുമെന്നാണ് പാർട്ടി വിലയിരുത്തലെന്നും അദ്ദേഹം അവകാശപ്പെട്ടു.

ഭയത്തിന്റെ രാഷ്ട്രീയം അവസാനിക്കുകയാണെന്നും വംഗം, അംഗം, കലിംഗം (ബംഗാൾ, അസം, ഒഡീഷ) എന്നീ മേഖലകളിൽ ബിജെപി സർക്കാരുകൾ വരുമെന്നും അദ്ദേഹം കൂട്ടിച്ചേർത്തു.

അഴിമതിയില്ലാത്ത ഭരണം കാഴ്ചവെക്കുമെന്നും ബംഗാളിൽ ജനിച്ചു വളർന്ന, ബംഗാളി സംസാരിക്കുന്ന ഒരാളായിരിക്കും ബിജെപി സർക്കാരിന്റെ മുഖ്യമന്ത്രിയെന്നും അദ്ദേഹം ഉറപ്പുനൽകി.

സംസ്ഥാനത്തെ അഴിമതികൾക്കെതിരെയും സിൻഡിക്കേറ്റ് രാജിനെതിരെയും കടുത്ത നടപടിയുണ്ടാകുമെന്ന് അമിത് ഷാ മുന്നറിയിപ്പ് നൽകി. നിലവിലെ സർക്കാരിന്റെ കാലത്തുണ്ടായ അഴിമതികളെക്കുറിച്ച് വിരമിച്ച സുപ്രീം കോടതി ജഡ്ജി അന്വേഷിക്കുമെന്നും അദ്ദേഹം പറഞ്ഞു.

പ്രധാനമന്ത്രി നരേന്ദ്ര മോദിയുടെ ഗംഗാ നദിയിലെ ബോട്ട് യാത്രയെ പരിഹസിച്ച മമത ബാനർജിക്കുള്ള മറുപടിയും അദ്ദേഹം വാർത്താ സമ്മേളനത്തിൽ നൽകി. ഗംഗാ തീരത്തുള്ള ജനങ്ങളുമായി ബന്ധപ്പെടാനാണ് പ്രധാനമന്ത്രി ശ്രമിച്ചതെന്നും അതിൽ ആർക്കാണ് എതിർപ്പുള്ളതെന്നും അദ്ദേഹം ചോദിച്ചു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്