'ഡി കെ, ഡി കെ...'; ഖാർഗെ പ്രസംഗിക്കുന്നതിനിടെ ഡി കെ ശിവകുമാറിന് മുദ്രാവാക്യം വിളി

JUNE 21, 2026, 11:05 PM

ബെംഗളൂരു: കർണാടകത്തിൽ കോൺഗ്രസ് സംഘടിപ്പിച്ച ഔദ്യോഗിക പരിപാടിക്കിടെ ഉപമുഖ്യമന്ത്രി ഡി.കെ. ശിവകുമാറിന് അനുകൂലമായി മുദ്രാവാക്യം വിളിച്ച പ്രവർത്തകരെ പരസ്യമായി ശാസിച്ച് എ.ഐ.സി.സി. അധ്യക്ഷൻ മല്ലികാർജുന ഖാർഗെ.

ബെംഗളൂരുവിൽ നടന്ന 'സങ്കൽപ സമവേശം' എന്ന പരിപാടിയിൽ ഖാർഗെ പ്രസംഗിച്ചുകൊണ്ടിരിക്കെയാണ് ഒരുവിഭാഗം പ്രവർത്തകർ "ഡി.കെ, ഡി.കെ..." എന്ന് ഉറക്കെ മുദ്രാവാക്യം വിളിക്കാൻ തുടങ്ങിയത്.

ഇതോടെ പ്രകോപിതനായ ഖാർഗെ, ഇത് ഒരു വ്യക്തിയുടെ പരിപാടിയല്ലെന്നും പാർട്ടിയുടെ പൊതുപരിപാടിയാണെന്നും ഓർമ്മിപ്പിച്ചു. അച്ചടക്കമില്ലാതെ പെരുമാറിയ പ്രവർത്തകരെ കഠിനമായ ഭാഷയിൽ വിമർശിച്ച അദ്ദേഹം, ഇവർക്കെതിരെ കർശന അച്ചടക്ക നടപടിയുണ്ടാകുമെന്ന മുന്നറിയിപ്പും നൽകി.

സംഭവത്തിന്റെ ദൃശ്യങ്ങൾ നിലവിൽ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്. മുദ്രാവാക്യം വിളി ഉയർന്നതോടെ വേദിയിലുണ്ടായിരുന്ന ഡി.കെ. ശിവകുമാർ തന്നെ നേരിട്ടെഴുന്നേറ്റ് പ്രവർത്തകരെ ശാന്തരാക്കാൻ ശ്രമിക്കുന്നതും ദൃശ്യങ്ങളിലുണ്ട്.

പാർട്ടിയിൽ വ്യക്തിപൂജ അനുവദിക്കില്ലെന്ന് വ്യക്തമാക്കിയ ഖാർഗെ, എല്ലാവരും ഒന്നിച്ച് നിൽക്കേണ്ടത് സംഘടനയ്ക്ക് വേണ്ടിയാണെന്ന് ഓർമ്മിപ്പിച്ചു. തനിക്ക് 58 വർഷത്തെ രാഷ്ട്രീയ പരിചയമുണ്ടെന്നും പാർട്ടിക്ക് നൽകിയ സംഭാവനകളേക്കാൾ വലിയ സ്ഥാനങ്ങളാണ് പല നേതാക്കൾക്കും പാർട്ടി തിരികെ നൽകിയിട്ടുള്ളതെന്നും അദ്ദേഹം കൂട്ടിച്ചേർത്തു.

സംഘടനയിൽ എപ്പോഴും അച്ചടക്കം അത്യാവശ്യമാണെന്നും വേദിയിൽ ബഹളമുണ്ടാക്കിയ ആളുകളുടെ ദൃശ്യങ്ങൾ കൃത്യമായി പരിശോധിച്ച ശേഷം അവർക്കെതിരെ കർശനമായ നടപടി സ്വീകരിക്കുമെന്നും ഖാർഗെ പ്രസംഗത്തിലൂടെ മുന്നറിയിപ്പ് നൽകി.

#WATCH | Bengaluru, Karnataka: Congress President Mallikarjun Kharge loses his cool at party workers during the Sankalpa Samavesha programme after the workers raised “DK-DK” slogans

“Will the entire country be affected if you shout here? This is not an individual’s programme, it… pic.twitter.com/jmO0rLMftK
— ANI (@ANI) June 21, 2026