ജീവനെടുത്തത് റോഡിന്റെ ശോചനീയാവസ്ഥ: ബെംഗളൂരുവില്‍ മലയാളി യുവതിയുടെ മരണത്തിന് പിന്നാലെ പ്രതിഷേധവുമായി നാട്ടുകാര്‍

AUGUST 13, 2026, 7:48 AM

ബെംഗളൂരു: റോഡിലെ കുഴികളും ചെളിയും കാരണം ബെംഗളൂരുവിലുണ്ടായ വാഹനാപകടത്തില്‍ മലയാളി യുവതി മരിച്ച സംഭവത്തില്‍ ശക്തമായ പ്രതിഷേധവുമായി തദ്ദേശവാസികള്‍ രംഗത്തെത്തി. ബെംഗളൂരു പ്രൊവിഡന്റ് ഫണ്ട് ഓഫീസിലെ ജീവനക്കാരിയ ബാലുശ്ശേരി മുടക്കല്ലൂര്‍ സ്വദേശി മേധാ പൃഥ്വിരാജ് (30) ആണ് കഴിഞ്ഞ ദിവസം ദാരുണമായി കൊല്ലപ്പെട്ടത്. റോഡിന്റെ മോശം അവസ്ഥയാണ് അപകടത്തിന് കാരണമെന്ന് ആരോപിച്ച് നഗരസഭയ്ക്കും ജനപ്രതിനിധികള്‍ക്കുമെതിരെ ശക്തമായ അമര്‍ഷമാണ് പ്രദേശവാസികള്‍ക്കിടയില്‍ ഉയരുന്നത്.

ബുധനാഴ്ച രാവിലെ ഒമ്പതുമണിയോടെയായിരുന്നു നാടിനെ നടുക്കിയ സംഭവം നടന്നത്. ജോലി സ്ഥലത്തേക്ക് ഇരുചക്രവാഹനത്തിന്റെ പിന്‍സീറ്റില്‍ യാത്ര ചെയ്യുകയായിരുന്ന മേധ, തെന്നി റോഡിലേക്ക് വീഴുകയും പിന്നാലെ വന്ന ലോറിയുടെ അടിയില്‍പ്പെടുകയുമായിരുന്നു. ചെളിയും വലിയ കുഴികളും നിറഞ്ഞ റോഡിലൂടെ സഞ്ചരിക്കവെ ഇരുചക്രവാഹനം തെന്നിമാറിയതാണ് അപകടത്തിന് വഴിവെച്ചത്. ജോലി സ്ഥലത്തേക്കുള്ള പതിവ് യാത്രയ്ക്കിടെ വീടിന് വെറും മൂന്ന് കിലോമീറ്റര്‍ മാത്രം അകലെവെച്ചാണ് മേധയുടെ ജീവന്‍ പൊലിഞ്ഞത്. വിരമിച്ച അധ്യാപകനും ബാലുശ്ശേരിയിലെ സാംസ്‌കാരിക പ്രവര്‍ത്തകനുമായ പൃഥ്വിരാജ് മുടക്കല്ലൂരിന്റെ മകളാണ് മേധ.

അപകടത്തിന് തൊട്ടുപിന്നാലെ റോഡിന്റെ അവസ്ഥയില്‍ പ്രതിഷേധിച്ച് പ്രദേശവാസികള്‍ വന്‍ ജനകീയ പ്രക്ഷോഭത്തിന് തുടക്കമിട്ടു. ബുധനാഴ്ച വൈകുന്നേരം നഗരത്തില്‍ മെഴുകുതിരി മാര്‍ച്ചും റാലിയും സംഘടിപ്പിച്ചു. നൂറുകണക്കിന് ആളുകളാണ് പ്രതിഷേധത്തില്‍ അണിനിരന്നത്. മുനിസിപ്പല്‍ കൗണ്‍സിലിന്റെയും പ്രാദേശിക ജനപ്രതിനിധികളുടെയും ഗുരുതരമായ വീഴ്ചയും നിഷ്‌ക്രിയത്വവുമാണ് ഈ ദാരുണ സംഭവത്തിന് കാരണമെന്ന് നാട്ടുകാര്‍ ആരോപിച്ചു.

കഴിഞ്ഞ നാല് വര്‍ഷത്തിലേറെയായി അനന്തനഗര്‍ റോഡ് പൂര്‍ണ്ണമായും തകര്‍ന്ന് സഞ്ചാരയോഗ്യമല്ലാതായി കിടക്കുകയാണെന്ന് പ്രദേശവാസികള്‍ ചൂണ്ടിക്കാണിക്കുന്നു. അധികാരികള്‍ താല്‍ക്കാലികമായി നടത്തുന്ന അറ്റകുറ്റപ്പണികള്‍ ചെറിയൊരു മഴ പെയ്യുമ്പോള്‍ തന്നെ ഒലിച്ചുപോകുന്ന അവസ്ഥയാണുള്ളത്. സ്ഥിരമായ പരിഹാരം കാണാത്ത അധികൃതരുടെ അനാസ്ഥ ഒരു യുവതിയുടെ ജീവനെടുത്ത പശ്ചാത്തലത്തില്‍, ശക്തമായ നിയമനടപടികളും റോഡ് പുനരുദ്ധാരണവും ഉറപ്പാക്കുന്നത് വരെ സമരം തുടരാനാണ് നാട്ടുകാരുടെ തീരുമാനം.