ലഡാക്ക് പ്രക്ഷോഭ നായകൻ സോനം വാങ്ചുക്കിന് മോചനം; ഉത്തരവിട്ട് കേന്ദ്ര ആഭ്യന്തര മന്ത്രാലയം

MARCH 14, 2026, 3:38 AM

ദില്ലി: ദേശീയ സുരക്ഷാ നിയമപ്രകാരം ആക്ടിവിസ്റ്റ് സോനം വാങ്ചുക്കിനെ തടങ്കലിൽ വച്ചത് പിൻവലിച്ചതായി ആഭ്യന്തര മന്ത്രാലയം (എംഎച്ച്എ) പ്രഖ്യാപിച്ചു.

"ലഡാക്കിൽ സമാധാനത്തിന്റെയും സ്ഥിരതയുടെയും പരസ്പര വിശ്വാസത്തിന്റെയും അന്തരീക്ഷം വളർത്തിയെടുക്കുന്നതിന് സർക്കാർ പ്രതിജ്ഞാബദ്ധമാണ്. അതുവഴി എല്ലാ പങ്കാളികളുമായും സൃഷ്ടിപരവും അർത്ഥവത്തായതുമായ സംഭാഷണം സാധ്യമാകും. ഈ ലക്ഷ്യം കൈവരിക്കുന്നതിനും, ഉചിതമായ പരിഗണനയ്ക്ക് ശേഷവും, ദേശീയ സുരക്ഷാ നിയമപ്രകാരം ലഭ്യമായ അധികാരങ്ങൾ വിനിയോഗിച്ചുകൊണ്ട് സോനം വാങ്ചുകിന്റെ തടങ്കൽ ഉടനടി പിൻവലിക്കാൻ സർക്കാർ തീരുമാനിച്ചു," മന്ത്രാലയം പറഞ്ഞു.

അതേസമയം, ലഡാക്കിൽ സംസ്ഥാന പദവി ആവശ്യപ്പെട്ടുകൊണ്ടുള്ള പ്രക്ഷോഭത്തിനിടെയാണ് സോനം അറസ്റ്റിലായത്. രാജ്യദ്രോഹ കുറ്റമടക്കം ചുമത്തിയാണ് അറസ്റ്റ് ചെയ്തിരുന്നത്. ലഡാക്കിന് സംസ്ഥാന പദവിയും ഭരണഘടനാപരമായ സംരക്ഷണവും ആവശ്യപ്പെട്ട് പ്രക്ഷോഭം നയിച്ചവരിൽ ഏറ്റവും പ്രമുഖനാണ് ആക്ടിവിസ്റ്റും വിദ്യാഭ്യാസ വിദഗ്ധനുമായ സോനം വാങ്ചുക്ക്.