ഇസ്രായേല്‍ ആക്രമണത്തെ ശക്തമായി അപലപിച്ച എസ്‌സിഒ പ്രസ്താവനയില്‍ നിന്ന് വിട്ടുനിന്ന് ഇന്ത്യ

JUNE 14, 2025, 8:04 AM

ന്യൂഡെല്‍ഹി: ഇറാനെതിരായ ഇസ്രായേല്‍ ആക്രമണങ്ങളെ ശക്തമായി അപലപിച്ച് ഷാങ്ഹായ് കോഓപ്പറേഷന്‍ ഓര്‍ഗനൈസേഷന്‍ (എസ്‌സിഒ) പുറത്തിറക്കിയ പ്രസ്താവനയില്‍ നിന്ന് വിട്ടുനിന്ന് അംഗമായ ഇന്ത്യ. റഷ്യയും ചൈനയും പാകിസ്ഥാനുമടക്കം ഭാഗമായ ഗ്രൂപ്പിന്റെ പരാമര്‍ശങ്ങളിലേക്ക് നയിച്ച ചര്‍ച്ചകളില്‍ പങ്കെടുത്തിട്ടില്ലെന്ന് ഇന്ത്യ വ്യക്തമാക്കി.

ഇസ്രായേലും ഇറാനും തമ്മിലുള്ള സമീപകാല സംഭവവികാസങ്ങളെക്കുറിച്ച് ഷാങ്ഹായ് കോഓപ്പറേഷന്‍ ഓര്‍ഗനൈസേഷന്‍ ഒരു പ്രസ്താവന പുറത്തിറക്കിയിട്ടുണ്ടെന്നും ഈ പ്രസ്താവനയെക്കുറിച്ചുള്ള ചര്‍ച്ചകളില്‍ ഇന്ത്യ പങ്കെടുത്തില്ല എന്നും വിദേശകാര്യ മന്ത്രാലയം പ്രസ്താവനയില്‍ പറഞ്ഞു.

ഇസ്രായേല്‍-ഇറാന്‍ സംഘര്‍ഷങ്ങളെക്കുറിച്ചുള്ള ഇന്ത്യയുടെ സ്വതന്ത്ര നിലപാട് വിദേശകാര്യ മന്ത്രാലയം വീണ്ടും ആവര്‍ത്തിച്ചു. 'സംഘര്‍ഷം ലഘൂകരിക്കുന്നതിന് പ്രവര്‍ത്തിക്കാന്‍ സംഭാഷണത്തിന്റെയും നയതന്ത്രത്തിന്റെയും മാര്‍ഗങ്ങള്‍ ഉപയോഗിക്കണമെന്ന് ഞങ്ങള്‍ അഭ്യര്‍ത്ഥിക്കുന്നു. അന്താരാഷ്ട്ര സമൂഹം ആ ദിശയിലുള്ള ശ്രമങ്ങള്‍ നടത്തേണ്ടത് അത്യാവശ്യമാണ്,' പ്രസ്താവനയില്‍ പറയുന്നു.