'കിഡ്‌നി രോഗികള്‍ കൂടുന്നു'; പശുവിന്റെ മൂത്രവും ചാണകവും ഉപയോഗിക്കൂ; പ്രകൃതിദത്ത കൃഷി രീതികളിലേക്ക് മടങ്ങണമെന്ന് യോഗി

JUNE 18, 2026, 5:12 AM

കാൻപൂർ: ആരോഗ്യകരമായ ഒരു സമൂഹത്തിന്റെ നിർമ്മിതിക്കും രോഗങ്ങൾ കുറയ്ക്കാനും കർഷകർ രാസകൃഷി ഉപേക്ഷിച്ച് പ്രകൃതിദത്ത കൃഷി രീതികളിലേക്ക് മടങ്ങണമെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്.

കാൻപൂരിൽ വെച്ച് നടന്ന 'നാച്ചുറൽ ഫാമിംഗ് വർക്ക്‌ഷോപ്പ് 2026'-ൽ സംസാരിക്കുകയായിരുന്നു അദ്ദേഹം. വികസിത ഇന്ത്യയെന്ന ലക്ഷ്യം കൈവരിക്കാൻ ജനങ്ങളുടെ മികച്ച ആരോഗ്യം ഉറപ്പാക്കേണ്ടതുണ്ടെന്നും അതിൽ പ്രകൃതിദത്ത കൃഷിക്ക് വലിയ പങ്കുണ്ടെന്നും അദ്ദേഹം കൂട്ടിച്ചേർത്തു.

രാസവസ്തുക്കളോടുള്ള ആശ്രയത്വം പൂർണ്ണമായി കുറയ്ക്കുന്നതിനായി ചാണകവും ഗോമൂത്രവും വളമായും കീടനാശിനിയായും ഉപയോഗിക്കുന്ന 'പശുവധിഷ്ഠിത പ്രകൃതിദത്ത കൃഷി' രീതി നടപ്പിലാക്കാൻ അദ്ദേഹം ആഹ്വാനം ചെയ്തു. കൃഷിയിൽ രാസവളങ്ങളുടെയും കീടനാശിനികളുടെയും അമിത ഉപയോഗം വർദ്ധിച്ചതോടെയാണ് സമൂഹത്തിൽ വൃക്കരോഗങ്ങൾ ഉൾപ്പെടെയുള്ള മാരക ആരോഗ്യപ്രശ്നങ്ങൾ വർദ്ധിച്ചതെന്ന് മുഖ്യമന്ത്രി ചൂണ്ടിക്കാട്ടി.

"മുപ്പത് വർഷം മുൻപ് രാജ്യത്ത് വൃക്കസംബന്ധമായ രോഗങ്ങൾ വളരെ കുറവായിരുന്നു. എന്നാൽ ഇന്ന് ഓരോ പ്രദേശത്തും രണ്ടോ മൂന്നോ വൃക്കരോഗികളെ വീതം കാണാം. പലർക്കും ഡയാലിസിസോ അവയവം മാറ്റിവെക്കലോ ആവശ്യമായി വരുന്നു," യോഗി പറഞ്ഞു. കീടനാശിനികളുടെ അമിത പ്രയോഗം മൂലം ലിവർ സിറോസിസ്, ഉയർന്ന രക്തസമ്മർദ്ദം, പ്രമേഹം തുടങ്ങിയ രോഗങ്ങളും ജനങ്ങളിൽ ദോഷകരമായ രീതിയിൽ വർദ്ധിച്ചുവരികയാണെന്ന് അദ്ദേഹം ഓർമ്മിപ്പിച്ചു.

പരമ്പരാഗത പ്രകൃതിദത്ത കൃഷിയിലേക്ക് മാറുന്നതിലൂടെ കർഷകർക്ക് കൃഷിച്ചെലവ് കുറയ്ക്കാനും ഏക്കറിന് 12,000 രൂപ വരെ ലാഭം നേടാനും സാധിക്കുമെന്ന് മുഖ്യമന്ത്രി വ്യക്തമാക്കി. പ്രകൃതിദത്ത കൃഷി പ്രോത്സാഹിപ്പിക്കുന്നതിനായി സംസ്ഥാന സർക്കാർ പ്രത്യേക ഭൂമി കണ്ടെത്തിയിട്ടുണ്ട്.

ഇത്തരം ഓർഗാനിക് ഉൽപ്പന്നങ്ങൾക്ക് മികച്ച വിപണിയും വിലയും ഉറപ്പാക്കാനുള്ള ശ്രമങ്ങൾ നടക്കുകയാണ്. രാസവസ്തുക്കൾ ഉപയോഗിച്ച കൃഷി ഉത്പന്നങ്ങളേക്കാൾ ചെറിയ വിലക്കൂടുതൽ ഉണ്ടെങ്കിൽ പോലും, സ്വന്തം ആരോഗ്യം മുൻനിർത്തി ജനങ്ങൾ പ്രകൃതിദത്ത കൃഷി ഉൽപ്പന്നങ്ങൾക്ക് മുൻഗണന നൽകണമെന്നും യോഗി ആദിത്യനാഥ് ആവശ്യപ്പെട്ടു.