തലസ്ഥാനത്ത് ആശങ്ക വര്‍ധിപ്പിച്ച് വീണ്ടും ക്രൂരത: ട്യൂഷന്‍ കഴിഞ്ഞ് മടങ്ങിയ 13 കാരി കൂട്ടബലാത്സംഗത്തിനിരയാക്കി: മൂന്ന് പേര്‍ അറസ്റ്റില്‍

OCTOBER 1, 2026, 9:47 PM

ന്യൂഡല്‍ഹി: ഗ്രേറ്റര്‍ ഫരീദാബാദില്‍ ട്യൂഷന്‍ ക്ലാസ് കഴിഞ്ഞ് മടങ്ങുകയായിരുന്ന എട്ടാം ക്ലാസ് വിദ്യാര്‍ത്ഥിനിയെ തടഞ്ഞുനിര്‍ത്തി കൂട്ടബലാത്സംഗത്തിനിരയാക്കിയ സംഭവത്തില്‍ മൂന്ന് പേരെ പോലീസ് അറസ്റ്റ് ചെയ്തു. കേസില്‍ ഉള്‍പ്പെട്ട ശേഷിക്കുന്ന മൂന്ന് പ്രതികള്‍ക്കായി പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്.

ഓഗസ്റ്റ് 24 നാണ് കേസിനാസ്പദമായ സംഭവം നടക്കുന്നത്. ട്യൂഷന്‍ ക്ലാസിന് ശേഷം തന്റെ 16 വയസ്സുള്ള സുഹൃത്തിനൊപ്പം ഗ്രേറ്റര്‍ ഫരീദാബാദ് മേഖലയിലെ വിജനമായ ഇടിഞ്ഞുപൊളിഞ്ഞ കെട്ടിടത്തിന് സമീപമെത്തിയതായിരുന്നു പെണ്‍കുട്ടി. ഇവരെ പിന്തുടര്‍ന്നെത്തിയ ആറംഗ യുവാക്കളുടെ സംഘം കുട്ടികളെ തടഞ്ഞുനിര്‍ത്തുകയും കെട്ടിടത്തിനുള്ളിലേക്ക് ബലമായി കൊണ്ടുപോയി അതിക്രമം നടത്തുകയുമായിരുന്നു. പെണ്‍കുട്ടിയെ കൂട്ടബലാത്സംഗത്തിനിരയാക്കിയ പ്രതികള്‍, കൂടെയുണ്ടായിരുന്ന 16 കാരനെയും ക്രൂരമായി ലൈംഗികമായി ഉപദ്രവിച്ചു.

വിവരം പുറത്തുപറഞ്ഞാല്‍ അപായപ്പെടുത്തുമെന്ന് പ്രതികള്‍ ഭീഷണിപ്പെടുത്തിയതിനെ തുടര്‍ന്ന് ഭയന്ന കുട്ടികള്‍ വിവരം രഹസ്യമാക്കി വെക്കുകയായിരുന്നു. എന്നാല്‍ ആഴ്ചകള്‍ക്ക് ശേഷം പെണ്‍കുട്ടിയുടെ പെരുമാറ്റത്തിലും മാനസികാരോഗ്യത്തിലുമുണ്ടായ മാറ്റങ്ങള്‍ ശ്രദ്ധയില്‍പ്പെട്ട കുടുംബം കാര്യങ്ങള്‍ ചോദിച്ചറിഞ്ഞപ്പോഴാണ് ദാരുണമായ സംഭവം പുറത്തറിയുന്നത്. തുടര്‍ന്ന് കുടുംബം ഫരീദാബാദ് പോലീസില്‍ പരാതി നല്‍കുകയും ബി.പി.ടി.പി പോലീസ് സ്റ്റേഷനില്‍ രജിസ്റ്റര്‍ ചെയ്ത കേസില്‍ കുനാല്‍, ദീപക്, യാഷ് എന്നിവരെ പോലീസ് അറസ്റ്റ് ചെയ്യുകയും ചെയ്തു.

ഡല്‍ഹിയും അതിനോട് ചേര്‍ന്നുള്ള ദേശീയ തലസ്ഥാന മേഖലകളും സ്ത്രീകള്‍ക്കും പെണ്‍കുട്ടികള്‍ക്കും എത്രത്തോളം സുരക്ഷിതമല്ലെന്ന ഗൗരവകരമായ ചോദ്യമാണ് ഈ സംഭവം വീണ്ടും ഉയര്‍ത്തുന്നത്. മുന്‍പും സമാനമായ രീതിയില്‍ പൊതുയിടങ്ങളിലും വിജനമായ മേഖലകളിലും ക്രൂരമായ അതിക്രമങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. ഫരീദാബാദില്‍ ലിഫ്റ്റ് വാഗ്ദാനം ചെയ്ത് വാഹനത്തില്‍ കയറ്റിയ യുവതിയെ ഓടുന്ന വാനില്‍ വെച്ച് കൂട്ടബലാത്സംഗം ചെയ്ത സംഭവം സമാനമായ ആശങ്ക സൃഷ്ടിച്ചിരുന്നു. അതുപോലെ ടാക്‌സി കാത്തുനിന്ന പ്രായപൂര്‍ത്തിയാകാത്ത പെണ്‍കുട്ടിയെ ലിഫ്റ്റ് നല്‍കാമെന്ന് പറഞ്ഞ് ബസില്‍ കയറ്റി ഡല്‍ഹിയിലേക്ക് പോകും വഴി അതിക്രമത്തിനിരയാക്കിയ സംഭവവും മുന്‍പ് നടന്നിട്ടുണ്ട്. ഡല്‍ഹിയിലെ ആസ്ഥാ കുഞ്ച് പാര്‍ക്ക് ഉള്‍പ്പെടെയുള്ള പൊതുയിടങ്ങളില്‍ സുഹൃത്തുക്കള്‍ക്കൊപ്പമിരുന്ന പെണ്‍കുട്ടികളെ തടഞ്ഞുവെച്ച് ഭീഷണിപ്പെടുത്തി ആക്രമിച്ച സംഭവങ്ങളും റിപ്പോര്‍ട്ട് ചെയ്യപ്പെട്ടിട്ടുണ്ട്.

പെണ്‍കുട്ടികള്‍ക്ക് നേരെ തുടരുന്ന ഇത്തരം അതിക്രമങ്ങളില്‍ സുപ്രീം കോടതി ഉള്‍പ്പെടെ ആശങ്ക രേഖപ്പെടുത്തിയിട്ടുണ്ട്. വിജനമായ കെട്ടിടങ്ങളും നിരീക്ഷണ സംവിധാനങ്ങളില്ലാത്ത റോഡുകളും കേന്ദ്രീകരിച്ച് പോലീസിന്റെ കൃത്യമായ പട്രോളിംഗും സുരക്ഷാ ക്രമീകരണങ്ങളും ഉണ്ടാകുന്നില്ലെന്ന പൊതുജനരോഷവും ശക്തമാണ്.