മെക്സിക്കോ ആഭ്യന്തര സംഘർഷം; ഇന്ത്യൻ പൗരന്മാർക്കായി ഹെൽപ്പ് ലൈൻ തുറന്നു, ഷെൽട്ടറുകളിൽ തുടരാൻ നിർദേശം

FEBRUARY 22, 2026, 9:09 PM

മെക്സിക്കോ സിറ്റി: കുപ്രസിദ്ധ മയക്കുമരുന്ന് മാഫിയ തലവൻ എൽ മെഞ്ചോ കൊല്ലപ്പെട്ടതിനെത്തുടർന്ന് മെക്സിക്കോയിൽ ആഭ്യന്തര സംഘർഷം രൂക്ഷമാകുന്നു. ഈ സാഹചര്യത്തിൽ അവിടെയുള്ള ഇന്ത്യൻ പൗരന്മാർക്കായി മെക്സിക്കോ സിറ്റിയിലെ ഇന്ത്യൻ എംബസി അടിയന്തര ജാഗ്രതാ നിർദ്ദേശം പുറപ്പെടുവിച്ചു. സുരക്ഷിത കേന്ദ്രങ്ങളിൽ അഭയം തേടണമെന്നും ജനക്കൂട്ടത്തിനിടയിൽ നിന്ന് വിട്ടുനിൽക്കണമെന്നുമാണ് നിർദ്ദേശം.

മെക്സിക്കോയിലെ അതിശക്തമായ മയക്കുമരുന്ന് കാർട്ടലായ ജലിസ്കോ ന്യൂ ജനറേഷൻ കാർട്ടൽ (CJNG) തലവൻ നെമെസിയോ റൂബൻ ഒസെഗ്വേര സെർവാന്റസ് എന്ന എൽ മെഞ്ചോ ഞായറാഴ്ച സൈനിക നടപടിക്കിടെ കൊല്ലപ്പെട്ടിരുന്നു. ഇതിന് പിന്നാലെയാണ് വിവിധ നഗരങ്ങളിൽ അക്രമാസക്തമായ ഏറ്റുമുട്ടലുകളും റോഡ് ഉപരോധങ്ങളും ആരംഭിച്ചത്. ജലിസ്കോ, തമൗലിപാസ്, മിക്കോവാക്കൻ, ഗ്വെറേറോ, ന്യൂവോ ലിയോൺ എന്നീ സംസ്ഥാനങ്ങളിലുള്ള ഇന്ത്യക്കാർ അടുത്ത അറിയിപ്പ് ഉണ്ടാകുന്നത് വരെ പുറത്തിറങ്ങരുതെന്ന് എംബസി വ്യക്തമാക്കി.

ഇന്ത്യൻ പൗരന്മാർ ശ്രദ്ധിക്കേണ്ട പ്രധാന കാര്യങ്ങൾ:

സുരക്ഷിതമായിരിക്കുക: അനാവശ്യ യാത്രകൾ ഒഴിവാക്കി താമസസ്ഥലങ്ങളിൽ തന്നെ തുടരുക.

ജനക്കൂട്ടം ഒഴിവാക്കുക: പ്രതിഷേധങ്ങളോ ജനക്കൂട്ടമോ ഉള്ള സ്ഥലങ്ങളിൽ നിന്ന് പൂർണ്ണമായും വിട്ടുനിൽക്കുക.

മാധ്യമങ്ങൾ ശ്രദ്ധിക്കുക: പ്രാദേശിക മാധ്യമങ്ങളിലൂടെ പുറത്തുവരുന്ന വാർത്തകളും സുരക്ഷാ നിർദ്ദേശങ്ങളും കൃത്യമായി പിന്തുടരുക.

ആശയവിനിമയം: നിങ്ങളുടെ ലൊക്കേഷനും സുരക്ഷയും സംബന്ധിച്ച വിവരങ്ങൾ ഫോൺ വഴിയോ സോഷ്യൽ മീഡിയ വഴിയോ സുഹൃത്തുക്കളെയും ബന്ധുക്കളെയും അറിയിച്ചുകൊണ്ടിരിക്കുക.

അടിയന്തര സഹായം: എന്തെങ്കിലും അടിയന്തര സാഹചര്യമുണ്ടായാൽ പ്രാദേശിക നമ്പറായ 911-ൽ ബന്ധപ്പെടുക.

സൈനിക നടപടിക്കിടെ ഗുരുതരമായി പരിക്കേറ്റ എൽ മെഞ്ചോയെ വിമാനമാർഗ്ഗം മെക്സിക്കോ സിറ്റിയിലേക്ക് മാറ്റുന്നതിനിടെയാണ് മരണം സംഭവിച്ചത്. അമേരിക്കൻ ഡ്രഗ് എൻഫോഴ്‌സ്‌മെന്റ് അഡ്മിനിസ്‌ട്രേഷന്റെ (DEA) റിപ്പോർട്ട് പ്രകാരം ലോകത്തിലെ തന്നെ ഏറ്റവും അപകടകാരികളായ ക്രിമിനൽ സംഘങ്ങളിലൊന്നാണ് എൽ മെഞ്ചോ നയിച്ചിരുന്ന കാർട്ടൽ. നിലവിലെ സാഹചര്യം കണക്കിലെടുത്ത് സഹായങ്ങൾക്കായി ഇന്ത്യൻ എംബസി ഹെൽപ്പ് ലൈൻ നമ്പറും പുറത്തുവിട്ടിട്ടുണ്ട്. ഇന്ത്യൻ എംബസി ഹെൽപ്പ് ലൈൻ നമ്പർ: +52 55 4847 7539.