ഇറാൻ-അമേരിക്ക ചർച്ച: ഇസ്‌ലാമാബാദിൽ അതീവ സുരക്ഷ, രണ്ട് ദിവസം പൊതു അവധി

APRIL 9, 2026, 5:03 AM

ഇറാൻ യുദ്ധവുമായി ബന്ധപ്പെട്ട താൽക്കാലിക വെടിനിർത്തൽ ചർച്ചകൾക്ക് പാകിസ്താൻ വേദിയാകുന്നു. ലോകം ഉറ്റുനോക്കുന്ന ഈ നയതന്ത്ര ചർച്ചകളുടെ പശ്ചാത്തലത്തിൽ തലസ്ഥാനമായ ഇസ്‌ലാമാബാദിൽ ഏപ്രിൽ 9, 10 തീയതികളിൽ പ്രാദേശിക അവധി പ്രഖ്യാപിച്ചു.

അതീവ സുരക്ഷാ ക്രമീകരണങ്ങളുടെ ഭാഗമായി നഗരത്തിലെ വിവിധയിടങ്ങളിൽ കർശന നിയന്ത്രണങ്ങളാണ് ഏർപ്പെടുത്തിയിരിക്കുന്നത്. അമേരിക്കയുടെയും ഇറാന്റെയും ഉന്നത പ്രതിനിധികൾ ചർച്ചയിൽ പങ്കെടുക്കുമെന്ന് പാക് സർക്കാർ സ്ഥിരീകരിച്ചു.

ലെബനനിലെ ഇസ്രായേൽ ആക്രമണങ്ങൾ, ഹോർമുസ് കടലിടുക്കിലെ ഗതാഗത തടസ്സം തുടങ്ങിയ വിഷയങ്ങളിൽ നിലനിൽക്കുന്ന തർക്കങ്ങൾ പരിഹരിക്കാനാണ് ഈ അടിയന്തര നീക്കം. വെള്ളിയാഴ്ചയും ശനിയാഴ്ചയുമായിരിക്കും ഇരു രാജ്യങ്ങളും തമ്മിലുള്ള നേരിട്ടുള്ള ചർച്ചകൾ നടക്കുക.

നയതന്ത്ര തലത്തിലുള്ള അതിപ്രധാനമായ കൂടിക്കാഴ്ചയായതിനാൽ സുരക്ഷാ കാരണങ്ങൾ മുൻനിർത്തിയാണ് ജില്ലാ ഭരണകൂടം പൊതു അവധി പ്രഖ്യാപിച്ചത്. സുരക്ഷാ ക്രമീകരണങ്ങൾ വിലയിരുത്താൻ അമേരിക്കയിൽ നിന്നുള്ള 30 അംഗ സംഘം ഇതിനകം ഇസ്‌ലാമാബാദിൽ എത്തിക്കഴിഞ്ഞു.

അമേരിക്കൻ വൈസ് പ്രസിഡന്റ് ജെ.ഡി. വാൻസ് നയിക്കുന്ന സംഘത്തിൽ സ്റ്റീവ് വിറ്റ്‌കോഫ്, ജാരെഡ് കുഷ്നർ എന്നിവരും ഉൾപ്പെടുന്നുണ്ട്. ഇറാന് വേണ്ടി വിദേശകാര്യ മന്ത്രി അബ്ബാസ് അരാഗ്ചി, സ്പീക്കർ ബാഗർ ഘാലിബാഫ് എന്നിവർ ചർച്ചകളിൽ പങ്കെടുക്കും.

ചർച്ചകൾക്ക് മുന്നോടിയായി പാക് പ്രധാനമന്ത്രി ഷെഹ്ബാസ് ഷെരീഫ് ഇറാൻ പ്രസിഡന്റ് മസൂദ് പെസെഷ്‌കിയനുമായി ഫോണിൽ സംസാരിച്ചു. പശ്ചിമേഷ്യയിലെ സംഘർഷങ്ങൾക്ക് അയവ് വരുത്താൻ ഈ ചർച്ചകൾ സഹായിക്കുമെന്ന പ്രതീക്ഷയിലാണ് ലോകരാഷ്ട്രങ്ങൾ.