വിമാനത്തിനുള്ളിലെ ആക്രമണം: പൈലറ്റുമാർക്ക് കടുത്ത സുരക്ഷാ പരിശോധനയുമായി ഇസ്രായേൽ

SEPTEMBER 30, 2026, 5:56 PM

ദുബായിൽ നിന്ന് ടെൽ അവീവിലേക്ക് പറന്ന ഫ്ലൈ ദുബായ് വിമാനത്തിൽ സഹപൈലറ്റ് ക്യാപ്റ്റനെ കുത്തിപ്പരിക്കേൽപ്പിച്ച് വിമാനം തകർക്കാൻ ശ്രമിച്ച സംഭവത്തിന് പിന്നാലെ ഇസ്രായേലിലേക്ക് സർവീസ് നടത്തുന്ന വിമാന ജീവനക്കാർക്ക് കടുത്ത പരിശോധന ഏർപ്പെടുത്താൻ തീരുമാനം. രാജ്യത്തേക്ക് എത്തുന്ന ഇസ്രായേലി വിമാനങ്ങളിലെയും വിദേശ വിമാനങ്ങളിലെയും പൈലറ്റുമാരുടെ സുരക്ഷാ പരിശോധന കർശനമാക്കാൻ പ്രധാനമന്ത്രി ബെഞ്ചമിൻ നെതന്യാഹു ഉത്തരവിട്ടു. യാത്രാ വിമാനങ്ങളിലെ സുരക്ഷാ ഉറപ്പുവരുത്തുന്നതിന്റെ ഭാഗമായാണ് അടിയന്തര നടപടി.

ദുബായിൽ നിന്ന് 172 യാത്രക്കാരുമായി പുറപ്പെട്ട ബോയിംഗ് 737 വിമാനം ലക്ഷ്യസ്ഥാനത്തോടു അടുക്കവേയാണ് കോക്ക്പിറ്റിൽ അപ്രതീക്ഷിത അക്രമം നടന്നത്. ഒമാൻ സ്വദേശിയായ കോ പൈലറ്റ് വിമാനത്തിന്റെ ക്യാപ്റ്റനായ ഇന്ത്യൻ വംശജൻ സ്മിത് മച്ചാറിനെ കത്തികൊണ്ട് കുത്തിപ്പരിക്കേൽപ്പിക്കുകയായിരുന്നു. തുടർന്ന് വിമാനം താഴേക്ക് കുതിക്കുകയും നിയന്ത്രണം നഷ്ടപ്പെടുന്ന അവസ്ഥയിലെത്തുകയും ചെയ്തു. വെറും ഒരു മിനിറ്റിനുള്ളിൽ പതിനാലായിരം അടിയോളം താഴേക്ക് പതിച്ച വിമാനം വൻ ദുരന്തത്തിലേക്ക് നീങ്ങുകയായിരുന്നു.

ഈ സമയത്ത് കോക്ക്പിറ്റിൽ നിന്ന് ബഹളം കേട്ട യാത്രക്കാരും മറ്റു ക്യാബിൻ ക്രൂ അംഗങ്ങളും സമയോചിതമായി ഇടപെടുകയായിരുന്നു. വാതിൽ തകർത്ത് അകത്തുകയറിയ സംഘം അക്രമിയായ പൈലറ്റിനെ ബലമായി കീഴടക്കി. തുടർന്ന് വിമാനത്തിലുണ്ടായിരുന്ന മറ്റൊരു ക്രൂ അംഗം നിയന്ത്രണം ഏറ്റെടുത്ത് വിമാനം സുരക്ഷിതമായി സൗദി അറേബ്യയിലെ തബൂക്ക് വിമാനത്താവളത്തിൽ ഇറക്കി. യാത്രക്കാരുടെയും ജീവനക്കാരുടെയും ധീരമായ ഇടപെടലാണ് വലിയൊരു ദുരന്തം ഒഴിവാക്കിയത്.

സംഭവത്തെത്തുടർന്ന് പരിക്കേറ്റ രണ്ട് പൈലറ്റുമാരെയും സൗദിയിലെ ആശുപത്രിയിൽ പ്രവേശിപ്പിച്ചു. അക്രമിയായ ഒമാനി പൈലറ്റിനെ സൗദി അധികൃതർ കസ്റ്റഡിയിലെടുത്ത് ചോദ്യം ചെയ്തുവരികയാണ്. ഭീകരാക്രമണ സാധ്യത ഉൾപ്പെടെയുള്ള കാര്യങ്ങളാണ് ഇസ്രായേൽ അന്വേഷണ ഏജൻസികൾ പരിശോധിക്കുന്നത്. ഇസ്രായേലിലേക്ക് പറക്കുന്ന എല്ലാ വിമാനങ്ങളിലെയും പൈലറ്റുമാരുടെ വിവരങ്ങൾ മുൻകൂട്ടി ശേഖരിക്കാനും പരിശോധന പൂർത്തിയാക്കാനും അധികൃതർക്ക് നിർദ്ദേശം നൽകിയിട്ടുണ്ട്.

ലോകത്ത് തന്നെ ഏറ്റവും ശക്തമായ സുരക്ഷാ സംവിധാനങ്ങളുള്ള രാജ്യങ്ങളിലൊന്നായ ഇസ്രായേൽ പുതിയ സംഭവത്തിന്റെ പശ്ചാത്തലത്തിൽ വിമാനത്താവളങ്ങളിലും കടുത്ത ജാഗ്രത പ്രഖ്യാപിച്ചു. വരും ദിവസങ്ങളിൽ വിദേശ വിമാനക്കമ്പനികളുടെ ജീവനക്കാർക്ക് പ്രത്യേക സുരക്ഷാ ക്ലിയറൻസ് നിർബന്ധമാക്കും. ആകാശത്തുവെച്ചുണ്ടായ ഈ നടുക്കുന്ന അനുഭവം ആഗോള വ്യോമയാന മേഖലയിലും വലിയ സുരക്ഷാ ആശങ്കകൾക്ക് വഴിവെച്ചിട്ടുണ്ട്.

English Summary: Israel will ramp up security checks on all pilots flying into the country after a co-pilot on a flydubai flight stabbed the captain and attempted to crash the plane. The aircraft made an emergency landing in Saudi Arabia after passengers and crew intervened to neutralize the attacker.

Tags: Malayalam News, News Malayalam, Latest Malayalam News, Vachakam News, Israel News, Flydubai Flight Incident, Airline Security, Pilot Security Checks