ടൊറന്റോ റിയല്‍ എസ്റ്റേറ്റ് വിപണി മാറ്റത്തിന്റെ പാതയില്‍: ചെറിയ കോണ്ടോകളുടെ വില്‍പന നല്‍കുന്ന സൂചനകളെന്ത്?

AUGUST 12, 2026, 10:37 PM

ടൊറന്റോ: കാനഡയിലെ ടൊറന്റോ റിയല്‍ എസ്റ്റേറ്റ് വിപണിയില്‍ ചെറിയ കോണ്ടോ അപ്പാര്‍ട്ടുമെന്റുകളുടെ വില്‍പനയിലുണ്ടാകുന്ന വര്‍ധനവ്, വിപണി സ്ഥിരത കൈവരിക്കുന്നതിന്റെ സൂചനയാണെന്ന് സാമ്പത്തിക വിദഗ്ധരും റിയല്‍റ്റര്‍മാരും വിലയിരുത്തുന്നു. കഴിഞ്ഞ ഏതാനും വര്‍ഷങ്ങളായി നേരിട്ട വന്‍ വിലയിടിവിന് ശേഷം, കുറഞ്ഞ നിരക്കില്‍ ലഭ്യമാകുന്ന ചെറിയ അപ്പാര്‍ട്ടുമെന്റുകളിലേക്ക് വാങ്ങലുകാര്‍ വീണ്ടും ശ്രദ്ധ കേന്ദ്രീകരിച്ചു തുടങ്ങിയിരിക്കുകയാണ്.

ജൂലൈ ഒന്നിന് ടൊറന്റോയിലെ പ്രൈം കോണ്ടോ കെട്ടിടത്തില്‍ കേവലം 2,60,000 ഡോളറിന് വിറ്റുപോയ 310 ചതുരശ്ര അടി വിസ്തീര്‍ണ്ണമുള്ള സ്റ്റുഡിയോ അപ്പാര്‍ട്ടുമെന്റ് വിപണിയില്‍ വലിയ ചര്‍ച്ചകള്‍ക്ക് വഴിവെച്ചിരുന്നു. റീ മാക്‌സ് പ്രൊഫഷണല്‍സിലെ റിയല്‍റ്റര്‍ മൈക്കല്‍ സൗഡെബോവ് പങ്കുവെച്ച സോഷ്യല്‍ മീഡിയ വീഡിയോയാണ് ഇതിന് തുടക്കമിട്ടത്. വായ്പ തിരിച്ചടവ് മുടങ്ങിയതിനെത്തുടര്‍ന്ന് പവര്‍ ഓഫ് സെയില്‍ നടപടിക്രമങ്ങളിലൂടെ വിറ്റഴിച്ചതാണ് ഈ യൂണിറ്റിന്റെ വില ഇത്രത്തോളം കുറയാന്‍ പ്രധാന കാരണം. 2021 ല്‍ നിര്‍മ്മാണത്തിന് മുന്‍പുള്ള ഘട്ടത്തില്‍ 4,99,000 ഡോളറോളം (ചതുരശ്ര അടിക്ക് 1,600 ഡോളര്‍) വിലമതിച്ചിരുന്ന ഇത്തരം അപ്പാര്‍ട്ടുമെന്റുകള്‍ ഇപ്പോള്‍ ചതുരശ്ര അടിക്ക് 838 ഡോളര്‍ എന്ന നിരക്കില്‍ വിറ്റഴിയുന്നത് വിപണിയിലെ വലിയ വിലയിടിവിനെയാണ് കാണിക്കുന്നത്.

അര്‍ബനേഷന്‍ പുറത്തുവിട്ട വിവരങ്ങള്‍ അനുസരിച്ച്, കഴിഞ്ഞ നാല് വര്‍ഷത്തിനിടെ ചെറിയ കോണ്ടോ യൂണിറ്റുകളുടെ വിലയില്‍ 30 ശതമാനത്തിലധികം ഇടിവ് രേഖപ്പെടുത്തിയിട്ടുണ്ട്. 2026 ന്റെ രണ്ടാം പാദത്തില്‍ 5,00,000 ഡോളറിന് താഴെ വിലയുള്ള അപ്പാര്‍ട്ടുമെന്റുകളുടെ വില്‍പന മൊത്തം വിപണിയുടെ മൂന്നിലൊന്നായി ഉയര്‍ന്നു. 2025 ലെ ഇതേ കാലയളവിനെ അപേക്ഷിച്ച് താങ്ങാനാവുന്ന ഈ വിഭാഗത്തിലെ വില്‍പനയില്‍ 76 ശതമാനത്തിന്റെ വര്‍ധനവുണ്ടായി. എന്നിരുന്നാലും, 2021 ലെ റിക്കോര്‍ഡ് വില്‍പനയുമായി താരതമ്യം ചെയ്യുമ്പോള്‍ മൊത്തം കോണ്ടോ വില്‍പനയില്‍ 40 ശതമാനത്തോളം കുറവ് ഇപ്പോഴുമുണ്ട്.

വലിപ്പം കുറഞ്ഞ അപ്പാര്‍ട്ടുമെന്റുകള്‍ക്ക് മറ്റ് യൂണിറ്റുകളെ അപേക്ഷിച്ച് ചതുരശ്ര അടിക്ക് കൂടുതല്‍ നിരക്ക് ഈടാക്കുന്ന പ്രവണത നിലനില്‍ക്കുന്നുണ്ട്. നിലവില്‍ ചെറിയ യൂണിറ്റുകള്‍ക്ക് ചതുരശ്ര അടിക്ക് ശരാശരി 868 ഡോളറാണ് വില. എന്നാല്‍ 2022 ലെ വിപണിയിലെ ഉച്ചസ്ഥായിയില്‍ ഇത് 1,280 ഡോളറായിരുന്നു. അങ്ങേയറ്റം വിസ്തീര്‍ണ്ണം കുറഞ്ഞ ഇത്തരം അപ്പാര്‍ട്ടുമെന്റുകള്‍ നിക്ഷേപകരെ ലക്ഷ്യമിട്ടാണ് നിര്‍മ്മിച്ചതെന്നും സ്വന്തമായി താമസിക്കാന്‍ ആഗ്രഹിക്കുന്ന ആദ്യകാല വീട് വാങ്ങലുകാര്‍ ഇവയോട് താല്പര്യം കാണിക്കുന്നില്ലെന്നും ബട്ലര്‍ മോര്‍ട്ട്‌ഗേജിലെ പ്രിന്‍സിപ്പല്‍ ബ്രോക്കര്‍ റോണ്‍ ബട്ലര്‍ അഭിപ്രായപ്പെടുന്നു.

നിലവില്‍ 800 ചതുരശ്ര അടിക്ക് മുകളിലുള്ള വലിയ ടു-ബെഡ്റൂം അപ്പാര്‍ട്ടുമെന്റുകള്‍ക്കാണ് വിപണിയില്‍ ഏറ്റവും കൂടുതല്‍ ആവശ്യക്കാരുള്ളത്. വില്‍പനക്കാരും വാങ്ങലുകാരും തമ്മിലുള്ള നിലപാടുകളിലെ വ്യത്യാസമാണ് വിപണി നേരിടുന്ന മറ്റൊരു പ്രധാന വെല്ലുവിളിയെന്ന് കെല്ലര്‍ വില്ല്യംസ് റിയല്‍റ്റര്‍ റയാന്‍ കുക്ക് ചൂണ്ടിക്കാണിക്കുന്നു. വാങ്ങലുകാര്‍ വന്‍ വിലക്കുറവ് പ്രതീക്ഷിക്കുമ്പോള്‍, വില്‍പനക്കാരില്‍ പലരും കോവിഡ് കാലത്തെ ഉയര്‍ന്ന വില തന്നെയാണ് ഇപ്പോഴും പ്രതീക്ഷിക്കുന്നത്.

എങ്കിലും ചെറിയ യൂണിറ്റുകളുടെ വില്‍പന ഉയര്‍ന്ന തോതില്‍ നടക്കുന്നത് വിപണിയില്‍ കെട്ടിക്കിടക്കുന്ന അപ്പാര്‍ട്ടുമെന്റുകള്‍ വിറ്റഴിയാന്‍ സഹായിക്കുന്നുണ്ടെന്നും, ടൊറന്റോയിലെ കോണ്ടോ വിപണി വിലയിടിവിന്റെ അവസാന ഘട്ടത്തിലേക്കും ക്രമേണ സമതുലിതാവസ്ഥയിലേക്കും അടുക്കുകയാണെന്നും അര്‍ബനേഷന്‍ പ്രസിഡന്റ് ഷോണ്‍ ഹില്‍ഡെബ്രാന്‍ഡ് വ്യക്തമാക്കുന്നു.