വൈറ്റ് ഹൗസിൽ വീണ്ടും അഴിച്ചുപണി, കാഷ് പട്ടേലിനും തുളസി ഗാബാർഡിനും കസേര തെറിക്കുമോ?

APRIL 3, 2026, 3:54 AM

വാഷിംഗ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ മന്ത്രിസഭയിൽ അഴിച്ചുപണി തുടരുന്നു. അറ്റോർണി ജനറൽ പാം ബോണ്ടിയെ സ്ഥാനത്തുനിന്ന് നീക്കിയതാണ് ഏറ്റവും പുതിയ നടപടി. ഒരു മാസത്തിനിടെ ട്രംപ് ഭരണകൂടത്തിൽ നിന്നും പുറത്തുപോകുന്ന രണ്ടാമത്തെ പ്രമുഖ വ്യക്തിയാണ് പാം ബോണ്ടി. ജെഫ്രി എപ്‌സ്റ്റീൻ കേസിലെ ഫയലുകൾ കൈകാര്യം ചെയ്തതിലെ വീഴ്ചയും പ്രവർത്തനങ്ങളിലെ അതൃപ്തിയുമാണ് പാം ബോണ്ടിയുടെ പുറത്തുപോകലിന് കാരണമായതെന്നാണ് സൂചന. ബോണ്ടി ഉടൻ തന്നെ സ്വകാര്യ മേഖലയിൽ പുതിയ ചുമതലകൾ ഏറ്റെടുക്കുമെന്ന് ട്രംപ് സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിലൂടെ അറിയിച്ചു.

തന്റെ രാഷ്ട്രീയ എതിരാളികൾക്കെതിരെയുള്ള അന്വേഷണങ്ങളുടെ വേഗതയിൽ ട്രംപ് അതീവ അസംതൃപ്തനാണെന്ന് റിപ്പോർട്ടുകൾ വ്യക്തമാക്കുന്നു. മുൻ എഫ്.ബി.ഐ ഡയറക്ടർ ജെയിംസ് കോമി, ഡെമോക്രാറ്റിക് സെനറ്റർ ആദം ഷിഫ് എന്നിവർക്കെതിരെയുള്ള നീക്കങ്ങൾ വൈകുന്നതിൽ ട്രംപ് ക്ഷുഭിതനാണ്. ഇതിന് പിന്നാലെയാണ് കഴിഞ്ഞ മാസം ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോമിനെ പുറത്താക്കിയതിന് തൊട്ടുപിന്നാലെ പാം ബോണ്ടിക്കെതിരെയും നടപടിയുണ്ടായത്.

ട്രംപിന്റെ 'പുറത്താക്കൽ' പട്ടികയിൽ ഇനിയും പ്രമുഖർ ഉണ്ടെന്നാണ് സൂചനകൾ. നാഷണൽ ഇന്റലിജൻസ് ഡയറക്ടർ തുളസി ഗാബാർഡ്, എഫ്.ബി.ഐ ഡയറക്ടർ കാഷ് പട്ടേൽ, വാണിജ്യ സെക്രട്ടറി ഹോവാർഡ് ലുട്‌നിക്ക്, ലേബർ സെക്രട്ടറി ലോറി ഷാവേസ് എന്നിവരുടെ കാര്യത്തിലും ട്രംപ് അതൃപ്തി പ്രകടിപ്പിച്ചിട്ടുണ്ട്. വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റിന്റെ പ്രകടനത്തെയും ട്രംപ് പരസ്യമായി വിമർശിച്ചത് വലിയ ചർച്ചകൾക്ക് വഴിവെച്ചിരിക്കുകയാണ്.

ഇറാൻ അനുകൂല ഹാക്കർമാർ കാഷ് പട്ടേലിന്റെ സ്വകാര്യ ഇമെയിലുകൾ ചോർത്തിയത് അദ്ദേഹത്തിന് വലിയ തിരിച്ചടിയായിട്ടുണ്ട്. കൂടാതെ, ചട്ടവിരുദ്ധമായി ഉദ്യോഗസ്ഥരെ പിരിച്ചുവിട്ടതുമായി ബന്ധപ്പെട്ട നിയമനടപടികളും അദ്ദേഹം നേരിടുന്നുണ്ട്. ജോ കെന്റ് എന്ന തന്റെ മുൻ ഡെപ്യൂട്ടി ഇറാന്റെ ഭീഷണിയെ തള്ളിക്കളഞ്ഞപ്പോൾ അദ്ദേഹത്തെ തള്ളിപ്പറയാൻ തയ്യാറായില്ല എന്നതാണ് തുളസി ഗാബാർഡിനെതിരെ ട്രംപിനെ ചൊടിപ്പിച്ചത്. പ്രതിരോധ സെക്രട്ടറി പീറ്റ് ഹെഗ്‌സെത്തും സുരക്ഷാ വീഴ്ചകളുടെ പേരിൽ നിരീക്ഷണത്തിലാണ്.

ഭരണകൂടത്തിൽ അച്ചടക്കവും സ്ഥിരതയും ഉറപ്പാക്കാനാണ് ട്രംപിന്റെ ശ്രമമെങ്കിലും, തുടർച്ചയായ ഈ മാറ്റങ്ങൾ വലിയ രാഷ്ട്രീയ അനിശ്ചിതത്വമാണ് വാഷിംഗ്ടണിൽ സൃഷ്ടിക്കുന്നത്.