'നമ്മുടെ ശബ്ദം കേൾക്കപ്പെടണമെങ്കിൽ നാം വോട്ട് ചെയ്യണം; ഓരോ വോട്ടും പ്രധാനമാണ്് ' : ബിജു തോണിക്കടവിൽ

ന്യൂയോർക്ക്: അമേരിക്കയിലുടനീളമുള്ള മലയാളി സമൂഹം വരാനിരിക്കുന്ന 2026 മിഡ്‌ടേം തിരഞ്ഞെടുപ്പിൽ സജീവമായി പങ്കെടുക്കണമെന്നും വോട്ടവകാശമുള്ള ഓരോ വ്യക്തിയും തങ്ങളുടെ സമ്മതിദാനാവകാശം വിനിയോഗിക്കണമെന്നും ഫെഡറേഷൻ ഓഫ് മലയാളി അസോസിയേഷൻസ് ഓഫ് അമേരിക്കാസ് (ഫോമാ) ദേശീയ നേതൃത്വം സംയുക്ത പ്രസ്താവനയിലൂടെ ആഹ്വാനം ചെയ്തു.

ജനാധിപത്യ പ്രക്രിയയിൽ അമേരിക്കൻ മലയാളി സമൂഹത്തിന്റെ പങ്കാളിത്തം ശക്തിപ്പെടുത്തുന്നതിനും പൗരന്മാർ എന്ന നിലയിലുള്ള ഉത്തരവാദിത്തം ഉയർത്തിപ്പിടിക്കുന്നതിനും ഓരോ വോട്ടറും മുന്നോട്ടുവരണമെന്ന് ഫോമാ പ്രസിഡന്റ് ബിജു തോണിക്കടവിൽ, ജനറൽ സെക്രട്ടറി പോൾ പി. ജോസ്, ട്രഷറർ പ്രദീപ് നായർ, വൈസ് പ്രസിഡന്റ് സാമുവൽ മത്തായി, ജോയിന്റ് സെക്രട്ടറി ഡോ. മഞ്ജു പിള്ള, ജോയിന്റ് ട്രഷറർ ജോൺസൺ കണ്ണൂക്കാടൻ എന്നിവർ സംയുക്ത പ്രസ്താവനയിൽ അഭ്യർത്ഥിച്ചു.

അമേരിക്കൻ സമൂഹത്തിന്റെ വിവിധ മേഖലകളിൽ വ്യക്തിമുദ്ര പതിപ്പിച്ച മലയാളികൾ ജനാധിപത്യ പ്രക്രിയയിലും സജീവമായി ഇടപെടേണ്ടത് അനിവാര്യമാണെന്ന് ഫോമാ നേതൃത്വം ചൂണ്ടിക്കാട്ടി. വിദ്യാഭ്യാസം, ആരോഗ്യം, ബിസിനസ്, സാങ്കേതികവിദ്യ, സാമൂഹിക സേവനം, സാംസ്‌കാരിക പ്രവർത്തനം തുടങ്ങി വിവിധ മേഖലകളിൽ സാന്നിധ്യമറിയിക്കുന്ന മലയാളി സമൂഹം തിരഞ്ഞെടുപ്പുകളിലും തങ്ങളുടെ പൗര ഉത്തരവാദിത്തം നിറവേറ്റണം.

ജനപ്രതിനിധികൾ കൈക്കൊള്ളുന്ന തീരുമാനങ്ങൾ വ്യക്തികളുടെയും കുടുംബങ്ങളുടെയും സമൂഹത്തിന്റെയും ജീവിതത്തെ സ്വാധീനിക്കുന്നതിനാൽ, വോട്ടവകാശത്തിന്റെ പ്രാധാന്യം തിരിച്ചറിഞ്ഞ് തിരഞ്ഞെടുപ്പിൽ പങ്കാളികളാകണമെന്ന് നേതൃത്വം ഓർമിപ്പിച്ചു.

'നമ്മുടെ ശബ്ദം കേൾക്കപ്പെടണമെങ്കിൽ നാം വോട്ട് ചെയ്യണം. ഓരോ വോട്ടും പ്രധാനമാണ്. നമ്മുടെ വോട്ട് വെറുമൊരു അടയാളമല്ല. ജനാധിപത്യത്തിൽ നമ്മുടെ അഭിപ്രായവും അവകാശവും ഭാവിയെക്കുറിച്ചുള്ള കാഴ്ചപ്പാടും പ്രകടിപ്പിക്കാനുള്ള ശക്തമായ ഉപാധിയാണ്. അമേരിക്കൻ മലയാളികൾ വിവിധ മേഖലകളിൽ കൈവരിച്ച നേട്ടങ്ങൾ ജനാധിപത്യ പങ്കാളിത്തത്തിലും പ്രതിഫലിക്കണം. രാഷ്ട്രീയ അഭിപ്രായവ്യത്യാസങ്ങൾക്കതീതമായി, വോട്ടവകാശത്തിന്റെ മൂല്യം തിരിച്ചറിഞ്ഞ് അർഹരായ ഓരോ മലയാളിയും വരാനിരിക്കുന്ന മിഡ്‌ടേം തിരഞ്ഞെടുപ്പിൽ വോട്ട് രേഖപ്പെടുത്തണം. കുടുംബാംഗങ്ങളെയും സുഹൃത്തുക്കളെയും വോട്ട് ചെയ്യാൻ പ്രോത്സാഹിപ്പിക്കുകയും വേണം,' ഫോമാ പ്രസിഡന്റ് ബിജു തോണിക്കടവിൽ അഭ്യർത്ഥിച്ചു.

വോട്ട് ചെയ്യുക എന്നത് ഒരു തിരഞ്ഞെടുപ്പിൽ സ്ഥാനാർത്ഥിയെ തീരുമാനിക്കുക എന്നതിലുപരി, പൊതുനയങ്ങളെയും ജനപ്രതിനിധികളെയും സംബന്ധിച്ചുള്ള സ്വന്തം നിലപാടുകൾ ജനാധിപത്യപരമായി പ്രകടിപ്പിക്കാനുള്ള അവസരം കൂടിയാണെന്ന് ഫോമാ ദേശീയ നേതൃത്വം വ്യക്തമാക്കി.

സ്ഥാനാർത്ഥികളുടെ നിലപാടുകൾ, പൊതുവിഷയങ്ങൾ, സമൂഹത്തെ ബാധിക്കുന്ന നയങ്ങൾ എന്നിവയെക്കുറിച്ച് മനസ്സിലാക്കി സ്വതന്ത്രമായ തീരുമാനമെടുക്കാൻ ഓരോ വോട്ടറും ശ്രദ്ധിക്കണം. അതോടൊപ്പം, വോട്ടർ രജിസ്‌ട്രേഷൻ നില പരിശോധിക്കുന്നതിനും വോട്ടിംഗ് നടപടിക്രമങ്ങൾ മനസ്സിലാക്കുന്നതിനും ആവശ്യമായ മുൻകരുതലുകൾ സ്വീകരിക്കണം.

അമേരിക്കയിലെ വിവിധ സംസ്ഥാനങ്ങളിൽ പ്രവർത്തിക്കുന്ന മലയാളി സംഘടനകൾക്ക് തിരഞ്ഞെടുപ്പുമായി ബന്ധപ്പെട്ട ഔദ്യോഗിക വിവരങ്ങൾ അംഗങ്ങളിലേക്ക് എത്തിക്കുന്നതിലും വോട്ടവകാശത്തെക്കുറിച്ച് അവബോധം വളർത്തുന്നതിലും പ്രധാന പങ്കുവഹിക്കാനാകുമെന്ന് നേതൃത്വം അഭിപ്രായപ്പെട്ടു.

വോട്ടർ രജിസ്‌ട്രേഷൻ, നേരത്തെയുള്ള വോട്ടിംഗ്, മെയിൽ വോട്ടിംഗ് തുടങ്ങിയ സൗകര്യങ്ങളുമായി ബന്ധപ്പെട്ട നിയമങ്ങളും സമയപരിധികളും സംസ്ഥാനങ്ങൾക്കനുസരിച്ച് വ്യത്യാസപ്പെടുന്നതിനാൽ, ഓരോ വോട്ടറും സ്വന്തം സംസ്ഥാനത്തെ ഔദ്യോഗിക തിരഞ്ഞെടുപ്പ് അധികൃതരിൽനിന്ന് വിവരങ്ങൾ ഉറപ്പാക്കണം.

അമേരിക്കൻ മലയാളി സമൂഹത്തിന്റെ സാമൂഹികവും സാംസ്‌കാരികവും സംഘടനാപരവുമായ മുന്നേറ്റത്തിന് നേതൃത്വം നൽകുന്ന ഫോമാ, സമൂഹത്തിലെ അംഗങ്ങൾ ജനാധിപത്യ പ്രക്രിയയിലും സജീവമായി പങ്കാളികളാകേണ്ടതിന്റെ പ്രാധാന്യം ഉയർത്തിക്കാട്ടി.

അമേരിക്കയിൽ മലയാളി സമൂഹത്തിന്റെ താൽപര്യങ്ങളും ആശങ്കകളും ജനാധിപത്യ സംവിധാനത്തിൽ പ്രതിഫലിക്കണമെങ്കിൽ ഉത്തരവാദിത്തമുള്ള പങ്കാളിത്തം അനിവാര്യമാണ്. വോട്ടവകാശം വിനിയോഗിക്കുന്നതിലൂടെ ഓരോ പൗരനും പൊതുജീവിതത്തിൽ തന്റെ അഭിപ്രായം രേഖപ്പെടുത്താൻ അവസരം ലഭിക്കുന്നു.

2026 നവംബർ 3നാണ് അമേരിക്കയിലെ മിഡ്‌ടേം തിരഞ്ഞെടുപ്പ് നടക്കുന്നത്. വോട്ടർ രജിസ്‌ട്രേഷൻ, നേരത്തെയുള്ള വോട്ടിംഗ്, മെയിൽ വോട്ടിംഗ് എന്നിവ സംബന്ധിച്ച വിവരങ്ങളും സമയപരിധികളും ഓരോ സംസ്ഥാനത്തും വ്യത്യസ്തമായിരിക്കാം. അതിനാൽ വോട്ടർമാർ ഔദ്യോഗിക തിരഞ്ഞെടുപ്പ് വെബ്‌സൈറ്റുകൾ പരിശോധിച്ച് ആവശ്യമായ നടപടികൾ സമയബന്ധിതമായി പൂർത്തിയാക്കണം.

'നമ്മുടെ വോട്ട്, നമ്മുടെ ശബ്ദം, നമ്മുടെ ജനാധിപത്യ ഉത്തരവാദിത്തം' എന്ന സന്ദേശവുമായി അമേരിക്കയിലുടനീളമുള്ള മലയാളികൾ തിരഞ്ഞെടുപ്പ് പ്രക്രിയയിൽ സജീവമായി പങ്കാളികളാകണമെന്ന് ഫോമാ ദേശീയ നേതൃത്വം അഭ്യർത്ഥിച്ചു.

സൈജൻ കണിയോടിക്കൽ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്