കൃത്രിമ ബുദ്ധി (AI) സോഫ്റ്റ്‌വെയർ ബിസിനസുകളിൽ ഉണ്ടാക്കുന്ന സ്വാധീനത്തെ കുറിച്ചുള്ള പുതിയ ആശങ്കകൾ ഉയർന്നതോടെ അമേരിക്കൻ ടെക് ഓഹരികൾ കുത്തനെ ഇടിഞ്ഞതായി റിപ്പോർട്ട്. അമേരിക്കയിലെ ടെക് ഓഹരികൾ — പ്രത്യേകിച്ച് സോഫ്റ്റ്‌വെയർ, ഡാറ്റ, അനലിറ്റിക്‌സ് കമ്പനികളുടെ കാര്യത്തിൽ ആണ് ഇത്തരത്തിൽ ഒരു ഇടിവ് രേഖപ്പെടുത്തിയത്.

ടെക് കമ്പനികൾ കൂടുതലുള്ള നാസ്ഡാക് സൂചിക 1.4% ഇടിഞ്ഞു. വിപണിയുടെ മൊത്തം നില കാണിക്കുന്ന S&P 500 സൂചിക 0.8% കുറഞ്ഞു. ടെക് ഓഹരികളുടെ വലിയ തോതിലുള്ള വിറ്റുവരവാണ് ഇതിന് കാരണം എന്നാണ് വിദഗ്ധർ ചൂണ്ടിക്കാണിക്കുന്നത്.

AI സ്റ്റാർട്ടപ്പ് കമ്പനിയായ ആന്ത്രോപിക്, അവരുടെ Claude Cowork പ്ലാറ്റ്ഫോമിൽ പുതിയ ഓട്ടോമേഷൻ ടൂളുകൾ അവതരിപ്പിച്ചു. നിയമ ജോലികൾ, ഡാറ്റാ വിശകലനം പോലുള്ള ചില പ്രവർത്തനങ്ങൾ AIക്ക് തന്നെ ചെയ്യാൻ സഹായിക്കുന്ന ഈ ടൂളുകൾ, ഭാവിയിൽ മനുഷ്യരുടെ ജോലികൾക്ക് ബാധകമാകുമോ എന്ന ആശങ്ക നിക്ഷേപകരിൽ ഉണ്ടാക്കി എന്നാണ് റിപ്പോർട്ടുകൾ വ്യക്തമാക്കുന്നത്.

Gartner, S&P Global, Intuit, Equifax പോലുള്ള വലിയ കമ്പനികളുടെ ഓഹരികൾ 10% മുതൽ 20% വരെ താഴ്ന്നു. JPMorgan തയ്യാറാക്കിയ യു.എസ്. സോഫ്റ്റ്‌വെയർ ഓഹരി സൂചിക ഈ വർഷം ഇതുവരെ ഏകദേശം 18% കുറഞ്ഞു, ഇതിലും AI ആശങ്കകൾ ഒരു കാരണമായി കാണുന്നു.

അതേസമയം AI സംബന്ധിച്ച ഭയം അമേരിക്കയിൽ മാത്രം അല്ല. യൂറോപ്പിലെയും ബ്രിട്ടനിലെയും Relx, Publicis, WPP തുടങ്ങിയ കമ്പനികളുടെ ഓഹരികളും താഴ്ന്നു എന്നാണ് റിപ്പോർട്ടുകളിൽ നിന്നും വ്യക്തമാകുന്നത്. ഇന്ത്യയിലെ Infosys, TCS, Wipro പോലുള്ള ഐടി കമ്പനികളിലും ഇടിവ് ഉണ്ടായി.

ഈ ഇടിവ് വലിയ രീതിയിൽ ഭയത്തെ അടിസ്ഥാനമാക്കിയുള്ള ഒരു പ്രതികരണം ആകാം എന്നാണ് വിദഗ്ധർ വ്യക്തമാക്കുന്നത്. AI ചില ജോലികൾ മാറ്റിയേക്കാമെങ്കിലും, എല്ലാ സോഫ്റ്റ്‌വെയർ തൊഴിലുകളും ഇല്ലാതാക്കുമെന്ന് കരുതേണ്ടതില്ല. മറിച്ച്, AI പുതിയ അവസരങ്ങളും കാര്യക്ഷമതയും സൃഷ്ടിക്കാമെന്നാണ് അവരുടെ വിലയിരുത്തൽ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്