മയക്കുമരുന്ന് കടത്ത്: സിനലോവ ഗവർണർക്കും മറ്റ് 9 പേർക്കുമെതിരെ കുറ്റം ചുമത്തി

APRIL 29, 2026, 7:53 PM

മെക്സിക്കോ സിറ്റി: സിനലോവ ഗവർണർ റൂബൻ റോഷ മോയയും മറ്റ് ഒമ്പത് ഉന്നത ഉദ്യോഗസ്ഥരും മയക്കുമരുന്ന് കടത്ത്, ആയുധ ഇടപാട് കേസുകളിൽ കുറ്റക്കാർ. കുപ്രസിദ്ധ മയക്കുമരുന്ന് രാജാവ് 'എൽ ചാപ്പോ'യുടെ മക്കളായ 'ചാപ്പിറ്റോസ്' നയിക്കുന്ന സിനലോവ കാർട്ടലിനെ സഹായിച്ചുവെന്നാണ് ഇവർക്കെതിരെയുള്ള പ്രധാന ആരോപണം. കോടിക്കണക്കിന് ഡോളർ കൈക്കൂലി വാങ്ങി അമേരിക്കയിലേക്ക് ഫെന്റനൈൽ, കൊക്കെയ്ൻ തുടങ്ങിയ മയക്കുമരുന്നുകൾ കടത്താൻ ഇവർ ഒത്താശ ചെയ്തതായി ന്യൂയോർക്കിലെ ഫെഡറൽ ഗ്രാൻഡ് ജൂറി കണ്ടെത്തി.

അധികാരം ദുരുപയോഗം ചെയ്ത് ക്രിമിനൽ സംഘങ്ങൾക്ക് സംരക്ഷണം നൽകുകയും, അന്വേഷണങ്ങളിൽ നിന്ന് അവരെ ഒഴിവാക്കുകയും ചെയ്തതായി കുറ്റപത്രത്തിൽ പറയുന്നു. 2021-ലെ തിരഞ്ഞെടുപ്പിന് മുൻപ് തന്നെ റോഷ മോയ കാർട്ടൽ തലവന്മാരുമായി കൂടിക്കാഴ്ച നടത്തിയിരുന്നുവെന്നും, തിരഞ്ഞെടുപ്പ് അട്ടിമറിക്കാൻ കാർട്ടൽ അംഗങ്ങൾ ബാലറ്റ് ബോക്സുകൾ മോഷ്ടിക്കുകയും എതിർസ്ഥാനാർത്ഥികളെ ഭീഷണിപ്പെടുത്തുകയും ചെയ്തതായും പ്രോസിക്യൂട്ടർമാർ ആരോപിക്കുന്നു.

എന്നാൽ, ഈ ആരോപണങ്ങളെ റോഷ മോയ ശക്തമായി നിഷേധിച്ചു. തനിക്കെതിരെയുള്ള കുറ്റാരോപണങ്ങൾ അടിസ്ഥാനരഹിതമാണെന്നും സത്യാവസ്ഥ ഉടൻ തെളിയുമെന്നും അദ്ദേഹം എക്സ് (X) പ്ലാറ്റ്‌ഫോമിൽ കുറിച്ചു. ഇതിനിടെ, പ്രതികളെ കൈമാറണമെന്ന അമേരിക്കയുടെ ആവശ്യം മതിയായ തെളിവുകളുടെ അഭാവത്തിൽ മെക്സിക്കൻ വിദേശകാര്യ മന്ത്രാലയം താൽക്കാലികമായി തള്ളിയിട്ടുണ്ട്.