ലോഹങ്ങള്‍ക്കുള്ള ട്രംപിന്റെ 50% താരിഫ് പ്രാബല്യത്തില്‍; സ്റ്റീല്‍ ഉല്‍പാദകരെ തകര്‍ക്കുമെന്ന് വിമര്‍ശകര്‍

JUNE 4, 2025, 8:18 PM

ന്യൂയോര്‍ക്ക്: സ്റ്റീല്‍, അലുമിനിയം ഇറക്കുമതികളുടെ താരിഫ് 25% ല്‍ നിന്ന് 50% ആയി ഇരട്ടിയാക്കുന്ന ഉത്തരവില്‍ യുഎസ് പ്രസിഡന്റ് ഡൊണാള്‍ഡ് ട്രംപ് ഒപ്പുവച്ചു. കാറുകള്‍ മുതല്‍ ടിന്നിലടച്ച ഭക്ഷണം വരെ എല്ലാത്തിലും ഉപയോഗിക്കുന്ന ലോഹങ്ങളുടെ ഇറക്കുമതി നികുതി മാര്‍ച്ചിന് ശേഷം ഇത് രണ്ടാം തവണയാണ് ഉയര്‍ത്തുന്നത്. ബുധനാഴ്ച മുതല്‍ പ്രാബല്യത്തില്‍ വന്ന ഈ നടപടികള്‍ അമേരിക്കന്‍ സ്റ്റീല്‍ വ്യവസായത്തിന്റെ ഭാവി സുരക്ഷിതമാക്കാന്‍ ഉദ്ദേശിച്ചുള്ളതാണെന്ന് ട്രംപ് പറഞ്ഞു.

അതേസമയം ഈ സംരക്ഷണങ്ങള്‍ യുഎസിന് പുറത്തുള്ള സ്റ്റീല്‍ ഉല്‍പാദകരെ തകര്‍ക്കുമെന്നും, വ്യാപാര പങ്കാളികളില്‍ നിന്ന് പ്രതികാര നടപടികളിലേക്ക് നയിക്കുമെന്നും, ലോഹങ്ങള്‍ ഉപയോഗിക്കുന്ന അമേരിക്കന്‍ ഉപയോക്താക്കള്‍ക്ക് വന്‍ ചിലവ് വരുത്തുമെന്നും വിമര്‍ശകര്‍ പ്രതികരിച്ചു. തീരുവ ഉയര്‍ത്തുന്നതിന് മണിക്കൂറുകള്‍ക്ക് മുമ്പ്, നേരിട്ട് ബാധിച്ച പല സ്ഥാപനങ്ങള്‍ക്കും പദ്ധതി മുന്നോട്ട് പോകുന്നുവെന്ന് വിശ്വസിക്കാന്‍ കഴിഞ്ഞില്ല. അത് താല്‍ക്കാലികമോ ഏതെങ്കിലും തരത്തിലുള്ള ചര്‍ച്ചാ തന്ത്രമോ ആയി മാറുമെന്നായിരുന്നു പ്രതീക്ഷ.

ട്രംപ് ഉത്തരവുകളില്‍ ഒപ്പുവെച്ചപ്പോഴും, യുകെക്ക് നടപടികളില്‍ നിന്ന് വിട്ടുനില്‍ക്കാന്‍ അനുമതി ലഭിച്ചു. സ്റ്റീല്‍, അലുമിനിയം എന്നിവയുടെ തീരുവ 25% ആയി നിലനിര്‍ത്തി. യുഎസുമായുള്ള അവരുടെ വ്യാപാര ചര്‍ച്ചകളുടെ പ്രതിഫലനമായിരുന്നു ഈ നീക്കം. ട്രംപിനോട് എല്ലായ്പ്പോഴും ഉയരുന്ന ചോദ്യം ഇതാണ്, ഇതൊരു തന്ത്രമാണോ അതോ ദീര്‍ഘകാല പദ്ധതിയാണോ?' മേരിലാന്‍ഡ് ആസ്ഥാനമായുള്ള ബിസിനസ്സായ ഇന്‍ഡിപെന്‍ഡന്റ് കാന്‍ കമ്പനിയുടെ ചീഫ് എക്സിക്യൂട്ടീവ് റിക്ക് ഹ്യൂതര്‍ പറഞ്ഞു. യൂറോപ്പില്‍ നിന്ന് സ്റ്റീല്‍ കൊണ്ടുവന്ന് അലങ്കാര കുക്കി ടിന്നുകളായും പോപ്കോണ്‍ ബോക്സുകളായും മറ്റ് ഉല്‍പ്പന്നങ്ങളായും മാറ്റുന്നു.

ഈ വര്‍ഷം ആദ്യം ട്രംപ് നടത്തിയ നീക്കങ്ങള്‍ നിക്ഷേപങ്ങള്‍ നിര്‍ത്തിവയ്ക്കാനും വില ഉയര്‍ത്താനും പ്രേരിപ്പിച്ചുവെന്ന് അദ്ദേഹം വ്യക്തമാക്കുന്നു. അനിശ്ചിതത്വം കാരണം തന്റെ ഉപഭോക്താക്കള്‍ പ്ലാസ്റ്റിക് അല്ലെങ്കില്‍ പേപ്പര്‍ ബോക്സുകള്‍ പോലുള്ള ബദലുകളിലേക്ക് തിരിയുമെന്ന് അദ്ദേഹം ഭയപ്പെട്ടിരുന്നു. ഇക്കാര്യത്തില്‍ ഒരുപാട് കുഴപ്പങ്ങളുണ്ടെന്ന് അദ്ദേഹം പറയുന്നു.