ഫിലാഡെൽഫിയയിൽ പോലീസ് ഉദ്യോഗസ്ഥൻ വെടിയേറ്റ് കൊല്ലപ്പെട്ടു; പ്രതി പിടിയിൽ

OCTOBER 15, 2026, 2:06 AM

ഫിലാഡെൽഫിയ: അമേരിക്കയിലെ ഫിലാഡെൽഫിയയിൽ വാരാന്ത്യത്തിലുണ്ടായ ക്രൂരമായ ആക്രമണത്തിൽ പോലീസ് ഉദ്യോഗസ്ഥൻ കൊല്ലപ്പെട്ടു. വെസ്റ്റ് ഫിലാഡെൽഫിയയിൽ ശനിയാഴ്ച പുലർച്ചെയാണ് സംഭവം. ഫിലാഡെൽഫിയ പോലീസ് ഡിപ്പാർട്ട്‌മെന്റിലെ ഉദ്യോഗസ്ഥനായ ഷെയ്ൻ സെയ്ബർ (40) ആണ് കൊല്ലപ്പെട്ടത്. രണ്ടു ചെറിയ കുട്ടികളുടെ പിതാവാണ് അദ്ദേഹം.

വെസ്റ്റ് ഫിലാഡെൽഫിയയിലെ ഒരു വരാന്തയിൽ തോക്കുമായി ഒരാൾ നിൽക്കുന്നുവെന്ന വിവരത്തെത്തുടർന്നാണ് ഷെയ്ൻ സെയ്ബറും സഹപ്രവർത്തകനും സ്ഥലത്തെത്തിയത്. രാത്രി പന്ത്രണ്ട് മണിക്ക് ശേഷം ഈ വിലാസത്തിലേക്ക് പ്രവേശിച്ച ഇരുവരും അപ്രതീക്ഷിതമായ ഒരു പതിയിരിപ്പ് ആക്രമണത്തിന് ഇരയാവുകയായിരുന്നു. മൂന്ന് തവണ വെടിയേറ്റ സെയ്ബർ, ഭാര്യയുടെയും കുടുംബത്തിന്റെയും സാന്നിധ്യത്തിൽ ആശുപത്രിയിൽ വെച്ചാണ് മരണത്തിന് കീഴടങ്ങിയത്. അദ്ദേഹത്തിന് 3 വയസ്സുള്ള മകളും 7 വയസ്സുള്ള മകനുമുണ്ട്.

അപകടത്തിൽ സെയ്ബറിനൊപ്പമുണ്ടായിരുന്ന സഹപ്രവർത്തകന് (അഞ്ച് കുട്ടികളുടെ പിതാവ്) 12 തവണ വെടിയേറ്റു. നിലവിൽ അദ്ദേഹം അപകടനില തരണം ചെയ്‌തെങ്കിലും പൂർണ്ണമായി സുരക്ഷിതനായിട്ടില്ലെന്ന് പോലീസ് കമ്മീഷണർ കെവിൻ ബെഥേൽ വാർത്താസമ്മേളനത്തിൽ അറിയിച്ചു. ഈ കൊലപാതകത്തെ ക്രൂരവും അർത്ഥശൂന്യവും ഭീകരവുമായ കൃത്യമെന്നാണ് അദ്ദേഹം വിശേഷിപ്പിച്ചത്.

ആക്രമണത്തിന് ശേഷം ഒളിത്താവളത്തിലേക്ക് രക്ഷപ്പെടാൻ ശ്രമിച്ച പ്രതി, സ്ഥലത്തെത്തിയ മറ്റ് ഒമ്പത് പോലീസ് ഉദ്യോഗസ്ഥർക്ക് നേരെയും വെടിയുതിർത്തു. ഭാഗ്യവശാൽ ആർക്കും പരിക്കേറ്റിട്ടില്ല. തുടർന്ന് മണിക്കൂറുകൾ നീണ്ട തെരച്ചിലിനൊടുവിൽ മരത്തിന് മുകളിൽ ഒളിച്ചിരിക്കുകയായിരുന്ന 35 കാരനായ എറിക് ലൂയിസിനെ പോലീസ് പിടികൂടി. കൊലപാതകവും പത്ത് വധശ്രമങ്ങളും ഉൾപ്പെടെ ഏകദേശം 80ഓളം കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നതെന്ന് ജില്ലാ അറ്റോർണി ലാറി ക്രാസ്‌നർ അറിയിച്ചു.

പി.പി. ചെറിയാൻ