വാഷിംഗ്‌ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ കുടിയേറ്റ വിരുദ്ധ നയങ്ങൾക്ക് മേരിലാൻഡ് ഫെഡറൽ കോടതിയിൽ നിന്നും താൽക്കാലിക തിരിച്ചടി. പരിസ്ഥിതി പ്രശ്നങ്ങൾ ചൂണ്ടിക്കാട്ടി സംസ്ഥാന സർക്കാർ നൽകിയ പരാതിയെത്തുടർന്ന്, ഇമിഗ്രേഷൻ തടങ്കൽ കേന്ദ്രത്തിന്റെ നിർമ്മാണ പ്രവർത്തനങ്ങൾ നിർത്തിവെക്കാൻ ജഡ്ജി ഉത്തരവിട്ടു. 

കൃത്യമായ പാരിസ്ഥിതിക ആഘാത പഠനമോ പൊതുജനങ്ങളുടെ അഭിപ്രായമോ തേടാതെയാണ് പദ്ധതിയുമായി മുന്നോട്ട് പോയതെന്ന മേരിലാൻഡ് അറ്റോർണി ജനറൽ ആന്റണി ബ്രൗണിന്റെ വാദം കോടതി അംഗീകരിക്കുകയായിരുന്നു.

മേരിലാൻഡിലെ വാഷിംഗ്ടൺ കൗണ്ടിയിലുള്ള 54 ഏക്കർ സ്ഥലത്ത്, ഒരേസമയം 1500 പേരെ താമസിപ്പിക്കാൻ കഴിയുന്ന കൂറ്റൻ തടങ്കൽ കേന്ദ്രമാണ് ഭരണകൂടം ലക്ഷ്യമിടുന്നത്. ഇതിനായി 10 കോടി ഡോളറിലധികം കേന്ദ്ര സർക്കാർ ഇതിനകം ചിലവഴിച്ചിട്ടുണ്ട്. 

എന്നാൽ നിർമ്മാണ പ്രക്രിയയിൽ ഫെഡറൽ പരിസ്ഥിതി നിയമങ്ങൾ ലംഘിക്കപ്പെട്ടുവെന്നും സാധ്യമായ പ്രത്യാഘാതങ്ങളെക്കുറിച്ച് ഗൗരവമായ പരിശോധന നടത്തിയില്ലെന്നും കോടതി നിരീക്ഷിച്ചു. 14 ദിവസത്തേക്ക് നിർമ്മാണ പ്രവർത്തനങ്ങൾ അടിയന്തരമായി നിർത്തിവെക്കാനാണ് നിലവിലെ ഉത്തരവ്.

ട്രംപ് ഭരണകൂടത്തിന്റെ നാടുകടത്തൽ നടപടികളും കുടിയേറ്റക്കാർക്കെതിരെയുള്ള കർശനമായ നീക്കങ്ങളും ഇതിനകം തന്നെ വലിയ മനുഷ്യാവകാശ പ്രതിഷേധങ്ങൾക്ക് കാരണമായിട്ടുണ്ട്. 

സ്വതന്ത്രമായ സംസാര സ്വാതന്ത്ര്യവും നിയമപരമായ അവകാശങ്ങളും ഈ നടപടികളിലൂടെ ലംഘിക്കപ്പെടുന്നുവെന്ന് മനുഷ്യാവകാശ സംഘടനകൾ ആരോപിക്കുന്നു. കുടിയേറ്റക്കാരെ കൂട്ടത്തോടെ നാടുകടത്താനുള്ള ഭരണകൂടത്തിന്റെ തിരക്കിട്ട നീക്കങ്ങൾ നിയമപരമായി തന്നെ നേരിടുമെന്ന് മേരിലാൻഡ് അറ്റോർണി ജനറൽ വ്യക്തമാക്കി.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്