ഫിലാഡൽഫിയ: ഷിക്കാഗോ സെ. തോമസ് സീറോമലബാർ രൂപതയിലെ പ്രമുഖ അത്മായസംഘടനയായ സീറോമലബാർ കത്തോലിക്കാ കോൺഗ്രസിന്റെ (എസ്.എം.സി.സി.) രജതജൂബിലി ആഘോഷങ്ങളോടനുബന്ധിച്ച് 2024 സെപ്തംബർ 27 മുതൽ 29 വരെ ദേശീയ തലത്തിൽ ഫിലാഡൽഫിയയിൽ നടന്ന സീറോമലബാർ കുടുംബസംഗമത്തിന്റെ ജൂബിലി സ്മരണിക ആതിഥേയ ഇടവകയായ ഫിലാഡൽഫിയ സെ. തോമസ് സീറോമലബാർ പള്ളിയിൽ ഫാമിലി കോൺഫറൻസിന്റെ മുഖ്യരക്ഷാധികാരിയും, ഷിക്കാഗോ സീറോമലബാർ രൂപതാദ്ധ്യക്ഷനുമായ ബിഷപ്പ് മാർ ജോയ് ആലപ്പാട്ട് റിലീസ് ചെയ്തു. 

കോൺഫറൻസിന്റെ ഒന്നാം വാർഷികദിനമായ 2025 സെപ്തംബർ 28 ഞായറാഴ്ച്ച ദിവ്യബലിക്കുശേഷം ക്രമീകരിക്കപ്പെട്ട ഹൃസ്വമായ ചടങ്ങിൽ വച്ചാണ് സ്മരണികാപ്രകാശനം നിർവഹിക്കപ്പെട്ടത്. ദിവ്യബലിയിൽ സഹകാർമ്മികരായ ഇടവകവികാരി റവ. ഡോ. ജോർജ് ദാനവേലിൽ, റവ. ഫാ. ജോസ് വരിക്കപ്പള്ളിൽ, റവ. ഫാ. ജസ്റ്റിൻ പനച്ചിക്കൽ, സുവനീർ കമ്മിറ്റിഅംഗങ്ങൾ, കൈക്കാരന്മാർ, വിശ്വാസിസമൂഹം എന്നിവർ ജൂബിലി സ്മരണിക പ്രകാശനകർമ്മത്തിനു സാക്ഷികളായി.

എസ്.എം.സി.സി. ജൂബിലിയോടനുബന്ധിച്ച് മൂന്നു ദിവസങ്ങളിലായി നടത്തപ്പെട്ട വിവിധ പ്രോഗ്രാമുകളുടെ ചിത്രങ്ങൾ, ശ്രദ്ധേയമായ സെമിനാർ വിഷയങ്ങളിലൂന്നിയ ഈടുറ്റ ലേഖനങ്ങൾ, ഫാമിലി കോൺഫറൻസ് റിപ്പോർട്ട്, വിശിഷ്ട വ്യക്തികളുടെ ആശംസാ സന്ദേശങ്ങൾ എന്നിവ ഉൾപ്പെടുത്തി ബഹുവർണകളറിൽ തയാറാക്കിയ സ്മരണിക ഓർമ്മയിൽ സൂക്ഷിച്ചുവക്കാനാവുന്ന നിരവധി നിമിഷങ്ങൾ പ്രദാനം ചെയ്യുന്നതോടൊപ്പം എസ്.എം.സി.സിയുടെ ആരംഭവും, വളർച്ചയും സംബന്ധിച്ച അറിവുകളും അനുവാചകർക്ക് നൽകുന്നു. 

കോൺഫറൻസ് രജിസട്രേഷൻ ചെയർമാനും, ജുബിലി വെബ്‌സൈറ്റ്, ജൂബിലി സംബന്ധമായ ഡിജിറ്റൽമീഡിയ പരസ്യപ്രസിദ്ധീകരണങ്ങൾ എന്നിവ തയാറാക്കിയ സിബിച്ചൻ ചെമ്പ്‌ളായിൽ ആയിരുന്നു സുവനീറിന്റെ ചീഫ് എഡിറ്റർ. 2009ൽ പ്രസിദ്ധീകരിച്ച എസ്.എം.സി.സി. പത്താം വാർഷിക സ്മരണികയുടെ ചീഫ് എഡിറ്ററും സിബിച്ചൻ തന്നെയായിരുന്നു.

ഡോ. ജയിംസ് കുറിച്ചി കോർഡിനേറ്ററായ സുവനീർ കമ്മിറ്റിയിൽ ജോർജ് മാത്യു സി.പി.എ., ജോസ് മാളേയ്ക്കൽ, ജോർജ് വി. ജോർജ്, ജോജോ കോട്ടൂർ, സജി സെബാസ്റ്റ്യൻ, ജോസ് തോമസ്, റോഷിൻ പ്ലാമൂട്ടിൽ, ജയിൻ സന്തോഷ്, ഷാജി മിറ്റത്താനി, സിബിച്ചൻ ചെമ്പ്‌ളായിൽ എന്നിവർ അംഗങ്ങളായിരുന്നു.

എസ്.എം.സി.സിയുടെ രജതജൂബിലി ആഘോഷങ്ങളോടനുബന്ധിച്ച്  2024 സെപ്തംബറിൽ നടന്ന ദേശീയ കൂടുംബസംഗമം വടക്കേ അമേരിക്കയിലെ സീറോമലബാർ കത്തോലിക്കരുടെ ഏറ്റവും വലിയ ഒത്തുചേരലായിരുന്നു. ബിഷപ്പ് മാർ ജോയ് ആലപ്പാട്ട് മുഖ്യ രക്ഷാധികാരിയും, എസ്.എം.സി.സി. നാഷണൽ ഡയറക്ടർ റവ. ഫാ. ജോർജ് എളംബാശേരിൽ; ആതിഥേയഇടവകവികാരി റവ. ഡോ. ജോർജ് ദാനവേലിൽ എന്നിവർ രക്ഷാധികാരികളും, ജോർജ് മാത്യു സി.പി.എ. (ചെയർപേഴ്‌സൺ), ഡോ. ജയിംസ് കുറിച്ചി, മേഴ്‌സി കുര്യാക്കോസ് (കോ-ചെയർപേഴ്‌സൺസ്), ജോസ് മാളേയ്ക്കൽ (ജനറൽ സെക്രട്ടറി), ഷോണിമ മാറാട്ടിൽ (ജോ. സെക്രട്ടറി), ജോർജ് വി. ജോർജ് (ട്രഷറർ), ജോജോ കോട്ടൂർ, ജോൺസൺ കണ്ണൂക്കാടൻ (നാഷണൽ കോർഡിനേറ്റർമാർ) എന്നിവരും, ഫിലഡൽഫിയ ഇടവക കൈക്കാരന്മാരായ സജി സെബാസ്റ്റ്യൻ, ജോജി ചെറുവേലിൽ, ജോസ് തോമസ്, പോളച്ചൻ വറീദ്, ജെറി കുരുവിള, വിവിധ സബ്കമ്മിറ്റി ചെയർപേഴ്‌സൺസും ഉൾപ്പെടെയുള്ള സിൽവർ ജൂബിലി കമ്മിറ്റിയാണ് കോൺഫറൻസിനു വേണ്ട ക്രമീകരണങ്ങൾ ചെയ്തത്.

ഫോട്ടോ: ജോസ് തോമസ്

ജോസ് മാളേയ്ക്കൽ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്