ഹൂസ്റ്റൺ: ആർട്ടിഫിഷൽ ഇന്റലിജൻസ്  (AI) ഉപയോഗിച്ചു ബൈബിൾ പഠനത്തിനു തയ്യാറാക്കിയ പുതിയ പ്ലാറ്റ്‌ഫോം, ബൈബിൾ ഇന്റർപ്രിട്ടേഷൻ. എഐ (BibleInterpretation.ai), ഹൂസ്റ്റണിലെ ക്‌നാനായ കത്തോലിക്കാ ദൈവാലയത്തിലെ മുഖ്യ തിരുന്നാളിന്റെ കലോത്സവത്തോടനുബന്ധിച്ച് പൂനയിലെ സീറോമലങ്കര കത്തോലിക്കാ രൂപതാദ്ധ്യക്ഷൻ ബിഷപ്പ് മാത്യൂസ് മാർ പാകോമിയോസ് ഉദ്ഘാടനം ചെയ്തു. ഈ പ്ലാറ്റ്‌ഫോം, വിശുദ്ധ ഗ്രന്ഥത്തെ കൂടുതൽ എളുപ്പത്തിൽ അപഗ്രധിക്കുവാനും പഠിപ്പിക്കുവാനും എല്ലാവർക്കും സഹായകമാണ്.

കത്തോലിക്കാ പ്രബോധനങ്ങൾക്കധിഷ്ടിതമായ ബൈബിൾ വിശദീകരണങ്ങൾ കൂടുതൽ എളുപ്പമാക്കുന്ന ഈ സൈറ്റ് വികസിപ്പിക്കുന്നതിനു തയ്യാറായ റവ. ഫാ. ഏബ്രഹാം മുത്തോലത്തിന്റെ ദീർഘവീക്ഷണത്തെ ഉദ്ഘാടന പ്രസംഗത്തിൽ ബിഷപ്പ് പക്കോമിയോസ് പ്രശംസിച്ചു. 'ബൈബിൾ ഇന്റർപ്രട്ടേഷൻ. എഐ സഭാമക്കളുടെയും പ്രബോധകരുടെയും ആത്മീയ യാത്രയിൽ പുതിയൊരു വഴിത്തിരിവായിരിക്കും,' അദ്ദേഹം പറഞ്ഞു. സമൂഹത്തിലെ എല്ലാ വിഭാഗങ്ങളെയും ലക്ഷ്യം വച്ചുകൊണ്ട്, മതാദ്ധ്യാപകർ, പ്രാർത്ഥനാ ഗ്രൂപ്പുകൾ, വൈദികർ, ബൈബിൾ പ്രഭാഷകർ തുടങ്ങിയവർക്ക് ഈ പ്ലാറ്റ്‌ഫോം വളരെ സഹായകരമായിരിക്കും എന്ന് അദ്ദേഹം അഭിപ്രായപ്പെട്ടു.

BibleInterpretation.ai പ്രയോജനപ്പെടുത്തുന്നതിന്റെ വിവിധ സാധ്യതകൾ:
 മതാധ്യാപകർ: മതബോധനക്ലാസ്സുകൾ ഒരുങ്ങുന്നതിനും അത് ആകർഷകമാക്കുന്ന പാഠ്യപദ്ധതികൾ തയ്യാറാക്കുന്നതിനും ഈ ആധുനിക സാങ്കേതിക മാർഗം ഏറെ സഹായിക്കും. ബൈബിൾ ക്വിസ്, റോൾപ്ലേ, കഥകൾ, ഹോംവർക്ക്, പവർപോയന്റ് പ്രസന്റേഷൻ തയ്യാറാക്കൽ തുടങ്ങി ഒട്ടേറെ സാധ്യതകൾ ഇതിനുണ്ട്.

വൈദികർക്കും ബൈബിൾ പ്രഘോഷകർക്കും: വചനപ്രഘോഷണം ഒരുങ്ങുന്നതിനും അതിനു വേണ്ട ബൈബിൾ പശ്ചാത്തലം മനസ്സിലാക്കുന്നതിനും പ്രസംഗ സംഗ്രഹം തയ്യാറാക്കുന്നതിനും ബൈബിൾ ഇന്റർപ്രട്ടേഷൻ.എഐ പ്രയോജനപ്പെടുന്നു.
 പ്രാർത്ഥനാ ഗ്രൂപ്പ് നേതാക്കൾക്ക്: പ്രാർത്ഥനാ ഗ്രൂപ്പുകളുടെ നേതാക്കൾക്ക് ബൈബിൾ സന്ദേശങ്ങൾ വിശദീകരിക്കുന്നതിനായി സാങ്കേതിക പിന്തുണ നൽകുന്നു. ബൈബിൾ പാരമ്പര്യവും സഭാപ്രബോധനങ്ങളും സംയോജിപ്പിച്ച ആകർഷകമായ അവതരണത്തിന് ഇതു സഹായിക്കുന്നു.

വ്യക്തിഗത പഠനത്തിനും ബൈബിൾ ഗ്രൂപ്പുകൾക്കുമായി: ഏവർക്കും ഉപയോഗിക്കാൻ എളുപ്പമുള്ള ഈ പ്ലാറ്റ്‌ഫോം, ബൈബിൾ സ്വതന്ത്രമായി പഠിക്കാൻ അവസരം നൽകുന്നു. ജീവിത പ്രശ്‌നങ്ങൾക്ക് ഉത്തരങ്ങൾ കണ്ടെത്താനും വിശുദ്ധ ഗ്രന്ഥത്തിന്റെ അടിസ്ഥാനത്തിൽ ധ്യാനിച്ചു പ്രാർത്ഥിക്കാനും ഇത് പ്രയോജനപ്രദമാണ്.

ബൈബിൾ ഇന്റർപ്രെട്ടേഷൻ.എഐയുടെ പ്രധാന സവിശേഷതകളെക്കുറിച്ച് ബിജോ കരാക്കാട്ട് വിശദീകരിച്ചു. തന്റെ അറിവിൽ ആർട്ടിഫിഷൽ ഇന്റെലിജെൻസ് ഉപയോഗിച്ച് ബൈബിൾ അധിഷ്ടിതമായ ഇത്രയും നല്ലൊരു ഓൺലൈൻ പ്ലാറ്റ്‌ഫോം നാളിതുവരെ ഉണ്ടായിട്ടില്ലെന്ന് അദ്ദേഹം നിരീക്ഷിച്ചു.

നൂതന സാങ്കേതിക വിദ്യ ഉപയോഗിച്ച് ഈ പ്ലാറ്റ്‌ഫോം തുടർന്നും വികസിപ്പിക്കുകയും ആത്മീയ വളർച്ചയ്ക്ക് സഹായകമാക്കുകയും ചെയ്യും എന്ന് അദ്ദേഹം ഉറപ്പുനൽകി.

ബൈബിൾ ഇന്റർപ്രിട്ടേഷൻ. എഐ പ്രദാനം ചെയ്യുന്ന പ്രധാന പ്രയോജനങ്ങൾ:
1. വേഗത്തിൽ ലഭ്യമായ ഉത്തരങ്ങൾ: AIയുടെ സഹായത്തോടെ ജീവിത ചോദ്യങ്ങൾക്ക് ചുരുങ്ങിയ സമയത്തിനുള്ളിൽ മറുപടി നൽകുന്നു.
2. കത്തോലിക്കാ ഉപദേശങ്ങൾ സ്വീകരിച്ച് പഠനം: കത്തോലിക്കാ ആശയങ്ങളെ പൂർണ്ണമായി പിന്തുടർന്ന്, വിശുദ്ധ ഗ്രന്ഥത്തെ കൂടുതൽ എളുപ്പത്തിൽ മനസ്സിലാക്കാൻ ഈ ഓൺലൈൻ സഹായിക്കുന്നു.
3. ഇന്ററാക്ടീവ് പഠനം: പാഠങ്ങൾ വ്യക്തിഗത പ്രയോഗത്തിലൂടെ കൈകാര്യം ചെയ്യുകയും, കൂടുതൽ പ്രായോഗികമാക്കുകയും ചെയ്യുന്നു.
4. സമയലാഭം: പ്രഭാഷകർ, ഉപദേശകർ, മതാധ്യാപകർ, വൈദികർ എന്നിവർക്ക് സമയ ലാഭത്തോടെ എളുപ്പത്തിൽ തങ്ങളുടെ സേവനത്തിന് ഒരുങ്ങാൻ കഴിയും.

ബൈബിൾ ഇന്റർപ്രിട്ടേഷൻ. എഐ സാധ്യമാക്കുന്നത് ഫാ. ഏബ്രഹാം മുത്തോലത്ത് ഫൗണ്ടേഷനാണ്. ജീവകാരുണ്യഅജപാലന ശുശ്രൂഷകൾക്ക് പിന്തുണനല്കുന്നതിന് ഹൂസ്റ്റൺ ക്‌നാനായ ഫൊറോനാ വികാരി ഫാ. ഏബ്രഹാം മുത്തോലത്ത് സ്ഥാപിച്ചതാണ് ഈ ഫൗണ്ടേഷൻ. ഫാ. ഏബ്രഹാം മുത്തോലത്ത്, അദ്ദേഹത്തിന്റെ സഹോദരൻ എം.സി. ജേക്കബ്, ഫാ. ജോഷി വലിയവീട്ടിൽ, ഇടവക ട്രസ്റ്റിമാർ, മറ്റ് കമ്മറ്റിക്കാർ തുടങ്ങിയവരുടെ സാന്നിധ്യത്തിലാണ് bibleinterpretation.ai ഉദ്ഘാടനം ചെയ്തത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്