ബഹാമാസിന് സമീപം സ്വകാര്യ വിമാനം വെള്ളത്തിൽ തകർന്ന് വീണു; അഞ്ച് പേരെ രക്ഷപ്പെടുത്തി

JUNE 2, 2023, 5:58 AM

വ്യാഴാഴ്ച ബഹാമാസിന് സമീപം ഒരു സ്വകാര്യ വിമാനം വെള്ളത്തിൽ തകർന്നതിനെ തുടർന്ന് അഞ്ച് പേരെ രക്ഷപ്പെടുത്തിയതായി ബഹാമാസിന്റെ എയർക്രാഫ്റ്റ് ആക്‌സിഡന്റ് ഇൻവെസ്റ്റിഗേഷൻ അതോറിറ്റി മാധ്യമങ്ങളോട് പറഞ്ഞു.

ഫ്‌ളോറിഡയിലേക്കുള്ള യാത്രാമധ്യേ വിമാനം ബഹാമാസിലെ ആൻഡ്രോസിന് വടക്ക് 10 നോട്ടിക്കൽ മൈൽ അകലെയാണ് തകർന്നതെന്ന് റോയൽ ബഹാമാസ് പോലീസ് ഫോഴ്‌സ് വ്യാഴാഴ്ച പത്രസമ്മേളനത്തിൽ പറഞ്ഞു.

രണ്ട് പൈലറ്റുമാരും മൂന്ന് യാത്രക്കാരും വിമാനത്തിൽ ഉണ്ടായിരുന്നു. അപകടത്തിൽപെട്ട അഞ്ചുപേരെയും രക്ഷപ്പെടുത്തി ആൻഡ്രോസ് ദ്വീപിലേക്ക് തിരിച്ചയച്ചതായി അധികൃതർ അറിയിച്ചു.

യുണൈറ്റഡ് സ്റ്റേറ്റ്സ് രജിസ്ട്രേഷനുള്ള സിംഗിൾ എഞ്ചിൻ പൈപ്പർ പിഎ-32 വിമാനമായിരുന്നു അപകടത്തിൽ പെട്ടതെന്ന് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ അതോറിറ്റി അറിയിച്ചു.

വിമാനം ആൻഡ്രോസിലെ സാൻ ആൻഡ്രോസ് വിമാനത്താവളത്തിൽ നിന്ന് പുറപ്പെട്ട് വെസ്റ്റ് പാം ബീച്ചിലെ പാം ബീച്ച് അന്താരാഷ്ട്ര വിമാനത്താവളത്തിലേക്കുള്ള യാത്രാമധ്യേ ആണ് പൈലറ്റ് പ്രശ്‌നങ്ങൾ നേരിടുകയും ആൻഡ്രോസ് ദ്വീപിലേക്ക് മടങ്ങാൻ ശ്രമിക്കുകയും ചെയ്തത് എന്നും ഏജൻസി പറഞ്ഞു.

യന്ത്രത്തകരാറാണ് അപകടത്തിന് കാരണമെന്ന് റോയൽ ബഹാമാസ് പോലീസ് ഫോഴ്‌സ് പ്രസ്താവനയിൽ പറഞ്ഞു. പൈലറ്റുമാർ എമർജൻസി വാട്ടർ ലാൻഡിംഗ് നടത്തിയപ്പോൾ വിമാനത്തിന്റെ ശക്തി നഷ്ടപ്പെട്ടതായി വോളണ്ടിയർ പൈലറ്റ് ഗ്രൂപ്പ് അറിയിച്ചു.

അതേസമയം അപകടങ്ങളൊന്നും കൂടാതെ ആഴം കുറഞ്ഞ വെള്ളത്തിലേക്ക് വിമാനം സുരക്ഷിതമായി ഇറക്കാൻ പൈലറ്റിന് കഴിഞ്ഞതായി പോലീസ് പറഞ്ഞു. പൈലറ്റുമാരെയും യാത്രക്കാരെയും ഒരു പ്രാദേശിക മത്സ്യബന്ധന ബോട്ടിൽ കയറ്റി ആൻഡ്രോസിലേക്ക് തിരികെ കൊണ്ടുവന്നതായി വോളണ്ടിയർ പൈലറ്റ് ഗ്രൂപ്പ് അറിയിച്ചു.

യുഎസ് കോസ്റ്റ് ഗാർഡ്, റോയൽ ബഹാമാസ് ഡിഫൻസ് ഫോഴ്സ്, റോയൽ ബഹാമസ് പോലീസ് ഫോഴ്സ് എന്നിവർ സംഭവസ്ഥലത്ത് എത്തി പ്രതികരിച്ചു. എല്ലാവരും സുരക്ഷിതരായതിൽ വളരെ സന്തോഷമുണ്ട്, കൂടാതെ ഞങ്ങളുടെ സുഹൃത്തുക്കൾക്ക് നാട്ടുകാരും ബഹാമിയൻ, യു.എസ് സർക്കാർ ഏജൻസികളും നൽകുന്ന സഹായത്തെ ഞങ്ങൾ അഭിനന്ദിക്കുന്നു എന്നും വോളണ്ടിയർ പൈലറ്റ് ഗ്രൂപ്പ് പ്രസ്താവനയിൽ പറഞ്ഞു. അതേസമയം അപകടത്തെ കുറിച്ച് അന്വേഷണം തുടരുകയാണ്.