ഇന്ന് നമ്മളിൽ ഭൂരിഭാഗം ആളുകളും ദൈനംദിന ആവശ്യങ്ങൾക്കും ഔദ്യോഗിക കാര്യങ്ങൾക്കുമായി ഉപയോഗിക്കുന്ന പ്രധാന സേവനമാണ് ജിമെയിൽ. മെയിലുകൾ വേഗത്തിൽ ടൈപ്പ് ചെയ്യാനും സന്ദേശങ്ങൾ എളുപ്പത്തിൽ തരംതിരിക്കാനും സഹായിക്കുന്ന നിരവധി ആർട്ടിഫിഷ്യൽ ഇന്റലിജൻസ് സൗകര്യങ്ങൾ ജിമെയിലിലുണ്ട്.

എന്നാൽ, നമ്മളെ സഹായിക്കാനെന്ന പേരിൽ പ്രവർത്തിക്കുന്ന ഈ ഫീച്ചറുകൾക്ക് പിന്നിൽ നമ്മുടെ വ്യക്തിഗത ഇമെയിൽ വിവരങ്ങളും സ്വകാര്യ ഡാറ്റയും നിരന്തരം വിശകലനം ചെയ്യപ്പെടുന്നുണ്ടെന്ന കാര്യം പലരും ശ്രദ്ധിക്കാറില്ല.

നിങ്ങളുടെ ഇമെയിൽ വിവരങ്ങളുടെ പൂർണ്ണ സ്വകാര്യത നിലനിർത്താനും ഗൂഗിളിന്റെ എഐ അധിഷ്ഠിത സ്മാർട്ട് ഫീച്ചറുകൾ എങ്ങനെ ഓഫാക്കാമെന്നും പരിശോധിക്കാം.

എന്താണ് ജിമെയിലിലെ 'സ്മാർട്ട് ഫീച്ചറുകൾ'?

നിങ്ങൾ ഇമെയിൽ ടൈപ്പ് ചെയ്യുമ്പോൾ അടുത്ത വാക്കുകൾ സ്വയം നിർദ്ദേശിക്കുന്ന 'സ്മാർട്ട് കമ്പോസ്', വന്ന സന്ദേശങ്ങൾക്ക് പെട്ടെന്ന് മറുപടി നൽകാൻ സഹായിക്കുന്ന 'സ്മാർട്ട് റിപ്ലൈ' തുടങ്ങിയവയെല്ലാം ഇതിന്റെ ഭാഗമാണ്.

കൂടാതെ, വരാനിരിക്കുന്ന യാത്രകൾ, ടിക്കറ്റ് ബുക്കിംഗുകൾ, ബില്ലുകൾ, ഹോട്ടൽ റിസർവേഷനുകൾ എന്നിവ ഇമെയിലിൽ നിന്ന് സ്വയം കണ്ടെത്തി ഗൂഗിൾ കാളണ്ടറിലേക്കും മാപ്‌സിലേക്കും ചേർക്കുന്ന സംവിധാനങ്ങളും ഇതിൽ ഉൾപ്പെടുന്നു. ഈ സൗകര്യങ്ങൾ നൽകുന്നതിനായി ജിമെയിലിന്റെ എഐ സിസ്റ്റം നിങ്ങളുടെ ഇമെയിലുകളിലെ ഉള്ളടക്കം തുടർച്ചയായി വായിക്കുകയും പ്രോസസ്സ് ചെയ്യുകയും ചെയ്യുന്നുണ്ട്.

സ്മാർട്ട് ഫീച്ചറുകൾ എങ്ങനെ ഓഫാക്കാം?

നിങ്ങളുടെ ഡാറ്റ സ്വകാര്യമായി സൂക്ഷിക്കാൻ ലളിതമായ ചില സെറ്റിംഗ്‌സ് മാറ്റങ്ങളിലൂടെ ഈ ഫീച്ചറുകൾ ഓഫാക്കാൻ സാധിക്കും.

കമ്പ്യൂട്ടറിൽ അല്ലെങ്കിൽ വെബ് ബ്രൗസറിൽ:

ജിമെയിൽ തുറന്ന് ലോഗിൻ ചെയ്യുക.

• വലതുവശത്ത് മുകളിൽ കാണുന്ന സെറ്റിംഗ്‌സ് (?) ഐക്കണിൽ ക്ലിക്ക് ചെയ്ത് 'Seeall settings' തിരഞ്ഞെടുക്കുക.
• 'General' ടാബിൽ താഴേക്ക് സ്‌ക്രോൾ ചെയ്യുക.
• 'Smart features and personalization' എന്ന ഭാഗത്ത് കാണുന്ന ടിക് മാർക്ക് മാറ്റുക (Uncheck ചെയ്യുക).
  ഇതിന് തൊട്ടുതാഴെയുള്ള 'Smart features and personalization in other Google products' എന്ന ഓപ്ഷനും ഓഫാക്കുക. ഇത് വഴി ഗൂഗിൾ മാപ്‌സ്, മീറ്റ്, അസിസ്റ്റന്റ് തുടങ്ങിയ മറ്റ് സേവനങ്ങളിലേക്ക് നിങ്ങളുടെ ഇമെയിൽ ഡാറ്റ പങ്കുവെക്കുന്നത് തടയാൻ കഴിയും.
• പേജിന്റെ ഏറ്റവും താഴെ എത്തി 'Save Changes' നൽകുക.

സ്മാർട്ട്‌ഫോൺ ആപ്പിൽ (Android /iOS):

• ഫോണിലെ ജിമെയിൽ ആപ്പ് തുറന്ന് ഇടത് വശത്തുള്ള മെനു (?) ക്ലിക്ക് ചെയ്യുക.
• താഴേക്ക് സ്‌ക്രോൾ ചെയ്ത് 'Settings' എടുത്ത് നിങ്ങളുടെ ഇമെയിൽ അക്കൗണ്ട് തിരഞ്ഞെടുക്കുക.
• 'General' അല്ലെങ്കിൽ 'Data usage' വിഭാഗത്തിൽ കാണുന്ന 'Smart features and personalization' എന്ന ഓപ്ഷൻ ഓഫാക്കുക.

അക്കൗണ്ട് സുരക്ഷ വർദ്ധിപ്പിക്കാൻ ചില പ്രധാന വഴികൾ

സ്മാർട്ട് ഫീച്ചറുകൾ ഓഫാക്കുന്നതിന് പുറമെ, നിങ്ങളുടെ ഗൂഗിൾ അക്കൗണ്ട് പൂർണ്ണമായും സുരക്ഷിതമാക്കാൻ ഈ കാര്യങ്ങൾ കൂടി ശ്രദ്ധിക്കുക:

• ടുസ്‌റ്റെപ് വെരിഫിക്കേഷൻ ഓൺ ചെയ്യുക: അക്കൗണ്ടിലേക്ക് ലോഗിൻ ചെയ്യുമ്പോൾ പാസ്‌വേഡിന് പുറമേ ഫോണിലേക്ക് വരുന്ന ഒടിപി കൂടി ആവശ്യമായി വരുന്ന '2-Step Verification' നിർബന്ധമായും സെറ്റ് ചെയ്യുക. ഇത് അക്കൗണ്ട് ഹാക്ക് ചെയ്യപ്പെടാനുള്ള സാധ്യത ഇല്ലാതാക്കുന്നു.
• തേഡ് പാർട്ടി ആപ്പുകളുടെ പെർമിഷൻ പരിശോധിക്കുക: പല ആപ്പുകൾക്കും ഗെയിമുകൾക്കും നമ്മൾ ജിമെയിൽ വഴി ലോഗിൻ നൽകാറുണ്ട്. നിങ്ങളുടെ ഗൂഗിൾ അക്കൗണ്ടുമായി ബന്ധിപ്പിച്ചിരിക്കുന്ന ആവശ്യമില്ലാത്ത തേഡ് പാർട്ടി ആപ്പുകളുടെ ആക്‌സസ് അക്കൗണ്ട് സെറ്റിംഗ്‌സ് വഴി ഒഴിവാക്കുക.
• ആക്റ്റിവിറ്റി കൺട്രോൾ ക്രമീകരിക്കുക: myaccount.google.com സന്ദർശിച്ച് 'Web & App Activtiy' ട്രാക്കിംഗ് പരിശോധിക്കുകയും ആവശ്യമില്ലാത്ത ലൊക്കേഷൻ, സെർച്ച് ഹിസ്റ്ററി ട്രാക്കിംഗുകൾ പരിമിതപ്പെടുത്തുകയും ചെയ്യുക.

ഈ പ്രൈവസി ഫീച്ചറുകൾ ഓഫാക്കുമ്പോൾ സ്മാർട്ട് റിപ്ലൈ, സ്വയമേവയുള്ള കാളണ്ടർ അപ്‌ഡേറ്റുകൾ തുടങ്ങിയ സൗകര്യങ്ങൾ ലഭിക്കില്ലെങ്കിലും, നിങ്ങളുടെ പ്രധാനപ്പെട്ട ഇമെയിലുകളും വ്യക്തിഗത വിവരങ്ങളും പൂർണ്ണമായും സുരക്ഷിതമായിരിക്കും.

റോബിൻസ് ആന്റണി

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്