വിൻഡോസ് ഉപയോക്താക്കൾക്കായി ഗൂഗിൾ ജെമിനി ഡെസ്‌ക്‌ടോപ്പ് ആപ്പ് എത്തി!

SEPTEMBER 11, 2026, 9:50 AM

ഗൂഗിളിന്റെ ജനപ്രിയ എ.ഐ (AI) അസിസ്റ്റന്റ് സേവനമായ ജെമിനിയുടെ ഡെസ്‌ക്‌ടോപ്പ് ആപ്പ് വിൻഡോസ് ഓപ്പറേറ്റിംഗ് സിസ്റ്റങ്ങൾക്കായും ഔദ്യോഗികമായി പുറത്തിറക്കി. വിൻഡോസ് 10, വിൻഡോസ് 11 പതിപ്പുകൾ ഉപയോഗിക്കുന്നവർക്കായി തയാറാക്കിയ ഈ ആപ്പ് സെപ്റ്റംബർ 11 മുതൽ ആഗോളതലത്തിൽ ലഭ്യമായി തുടങ്ങി.

ഈ വർഷം ആദ്യം ആപ്പിൾ മാക് ഒ.എസിനായി ആപ്പ് അവതരിപ്പിച്ചതിന് പിന്നാലെയാണ് വിൻഡോസ് ഉപയോക്താക്കൾക്കായി ഗൂഗിൾ ഈ സൗകര്യം ഒരുക്കുന്നത്. ഇനിമുതൽ വെബ് ബ്രൗസറുകളുടെ സഹായമില്ലാതെ തന്നെ ഉപയോക്താക്കൾക്ക് പി.സിയിൽ നേരിട്ട് ജെമിനി ഉപയോഗിക്കാം.

കീബോർഡിൽ 'Alt + Space' കീകൾ അമർത്തിക്കൊണ്ട് ഉപയോക്താക്കൾക്ക് കമ്പ്യൂട്ടറിൽ ഏത് സമയത്തും ജെമിനി ആപ്പ് ഒരു ഓവർലേയായി തുറക്കാൻ സാധിക്കും എന്നതാണ് പ്രധാന സവിശേഷത.

നിലവിൽ ചെയ്യുന്ന ജോലികൾ തടസ്സപ്പെടാതെ തന്നെ ഡോക്യുമെന്റുകൾ പരിശോധിക്കാനും, മറുപടികൾ തയാറാക്കാനും, ആശയങ്ങൾ കണ്ടെത്താനും ഇത് വഴി സാധിക്കും. കൂടാതെ ജീമെയിൽ, ഗൂഗിൾ ഡ്രൈവ് തുടങ്ങിയ വർക്ക്‌സ്‌പേസ് സേവനങ്ങളുമായി ബന്ധിപ്പിച്ച് ഫയലുകളിൽ നിന്നുള്ള വിവരങ്ങൾ നേരിട്ട് പ്രൊസസ്സ് ചെയ്യാനും സങ്കീർണ്ണമായ ജോലികൾ നിർവ്വഹിക്കാനും ആപ്പിന് ശേഷിയുണ്ട്.

ഡെസ്‌ക്‌ടോപ്പ് ഇന്റർഫേസിൽ നിന്ന് തന്നെ ചിത്രങ്ങളും വീഡിയോകളും തയാറാക്കാനുള്ള ക്രിയേറ്റീവ് ടൂളുകളും ആപ്പിൽ ഉൾപ്പെടുത്തിയിട്ടുണ്ട്. പശ്ചാത്തലത്തിൽ പ്രവർത്തിക്കുമ്പോഴും സിസ്റ്റത്തിന്റെ വേഗതയെ ബാധിക്കാത്ത രീതിയിലാണ് കമ്പ്യൂട്ടർ റിസോഴ്‌സുകൾ ആപ്പ് ഉപയോഗിക്കുന്നത്. വിൻഡോസ് 10, 11 ഉപയോക്താക്കൾക്ക് gemini.google/desktop എന്ന വെബ്സൈറ്റിൽ നിന്ന് ഇൻസ്റ്റാളർ നേരിട്ട് ഡൗൺലോഡ് ചെയ്യാം.