ഗൂഗിൾ ക്രോമിൽ ടാബ് ഷെയറിംഗ് ഇനി കൂടുതൽ എളുപ്പമാകും; ആൻഡ്രോയിഡിൽ വിപ്ലവകരമായ മാറ്റങ്ങൾ

APRIL 26, 2026, 11:02 PM

സ്മാർട്ട്‌ഫോണുകളിലും കമ്പ്യൂട്ടറുകളിലുമായി വെബ് ടാബുകൾ കൈമാറുന്നത് ലളിതമാക്കാൻ പുതിയ സംവിധാനങ്ങൾ ഒരുക്കി ഗൂഗിൾ. നിലവിൽ ക്രോം ബ്രൗസറിന്റെ പ്രീ-റിലീസ് പതിപ്പായ ക്രോം കാനറിയിലാണ് ഈ പുതുമകൾ പരീക്ഷിക്കുന്നത്. ടാബുകൾ അയക്കുന്നതിലും സ്വീകരിക്കുന്നതിലും കാതലായ മാറ്റങ്ങൾ വരുത്തിക്കൊണ്ട് ഉപയോക്താക്കൾക്ക് കൂടുതൽ വേഗതയേറിയ അനുഭവം നൽകാനാണ് ഗൂഗിളിന്റെ നീക്കം.

ഏറ്റവും പ്രധാനപ്പെട്ട മാറ്റം ക്രോമിലെ ഓമ്‌നിബോക്സ് (Omnibox) കോൺടെക്സ്റ്റ് മെനുവിലാണ് വരുന്നത്. ഇതിലൂടെ ഉപയോക്താക്കൾക്ക് നിലവിലുള്ള വെബ് ടാബ് മറ്റൊരു ഉപകരണത്തിലേക്ക് നേരിട്ട് അയക്കാൻ സാധിക്കും. നിലവിൽ ഒന്നിലധികം മെനുകളിലൂടെ കടന്നുപോയി വേണം ടാബുകൾ ഷെയർ ചെയ്യാൻ. എന്നാൽ പുതിയ അപ്‌ഡേറ്റ് വരുന്നതോടെ ലളിതമായ ഒരൊറ്റ ക്ലിക്കിലൂടെ ടാബുകൾ കൈമാറാൻ കഴിയും.

മറ്റൊരു ഉപകരണത്തിൽ നിന്ന് ടാബ് അയക്കുമ്പോൾ, സ്വീകരിക്കുന്ന ഉപകരണത്തിൽ അത് ഓട്ടോമാറ്റിക്കായി ഓപ്പൺ ആകുന്ന സംവിധാനവും ഗൂഗിൾ പരീക്ഷിക്കുന്നുണ്ട്. നിലവിൽ ഒരു നോട്ടിഫിക്കേഷൻ ലഭിക്കുകയും അതിൽ ക്ലിക്ക് ചെയ്താൽ മാത്രം ടാബ് തുറക്കുകയുമാണ് ചെയ്യുന്നത്. പുതിയ മാറ്റം വരുന്നതോടെ ടാബുകൾ നേരിട്ട് ലോഞ്ച് ചെയ്യപ്പെടും. ഇതിനൊപ്പം ഒരു 'ടോസ്റ്റ് മെസേജ്' വഴി ഉപയോക്താവിനെ വിവരം അറിയിക്കുകയും ചെയ്യും.

ആൻഡ്രോയിഡ് ഉപയോക്താക്കൾക്കായി വളരെ കൗതുകകരമായ ഒരു 'ജെസ്ചർ' (Gesture) ഫീച്ചറും ഗൂഗിൾ പര്യവേഷണം ചെയ്യുന്നുണ്ട്. ഫോൺ ഒരു പ്രതലത്തിൽ രണ്ടുതവണ തട്ടുന്നതിലൂടെ (tapping against a surface) ടാബുകൾ ഷെയർ ചെയ്യാൻ കഴിയുന്ന സാങ്കേതിക വിദ്യയാണിത്. ഇത് പ്രോക്സിമിറ്റി സെൻസറുകളുടെ സഹായത്തോടെയാണ് പ്രവർത്തിക്കുന്നത്. എന്നാൽ ഈ ഫീച്ചർ നിലവിൽ പരീക്ഷണ ഘട്ടത്തിലാണെന്നും എന്ന് ലഭ്യമാകുമെന്ന് വ്യക്തമല്ലെന്നും അധികൃതർ അറിയിച്ചു.