തിരുവനന്തപുരം: സി.എം.ആര്‍.എല്‍ കേസില്‍ പ്രതിപക്ഷനേതാവ് പിണറായി വിജയനെതിരെ കേസെടുക്കുന്നത് വൈകിയെന്ന വിവാദം കോണ്‍ഗ്രസിനുള്ളില്‍ വലിയ പൊട്ടിത്തെറിക്ക് കാരണമായിരിക്കുന്നു. പാര്‍ട്ടിക്കുള്ളില്‍ രണ്ട് ചേരികളായി തിരിഞ്ഞ് നേതാക്കള്‍ നടത്തുന്ന നിഴല്‍ യുദ്ധം കോണ്‍ഗ്രസ് നേതൃത്വത്തിന് വലിയ തലവേദനയായി മാറിയിരിക്കുകയാണ്. വിവാദം രൂക്ഷമായതോടെ, പാര്‍ട്ടിയും സര്‍ക്കാരും എടുക്കുന്ന തീരുമാനങ്ങള്‍ അംഗീകരിക്കാന്‍ എല്ലാ നേതാക്കളും ബാധ്യസ്ഥരാണെന്നും പരിധിവിട്ട സാഹചര്യത്തിലാണ് കര്‍ശന നിര്‍ദ്ദേശം നല്‍കുന്നതെന്നും കെ.പി.സി.സി പ്രസിഡന്റ് സണ്ണി ജോസഫ് വ്യക്തമാക്കി.
അന്തരിച്ച മുന്‍ മുഖ്യമന്ത്രി ഉമ്മന്‍ചാണ്ടിക്കെതിരെ ചെറിയൊരു പരാതിയുടെ അടിസ്ഥാനത്തില്‍ സി.ബി.ഐ അന്വേഷണത്തിന് ഉത്തരവിട്ട പിണറായി വിജയന്റെ നടപടിയുമായി താരതമ്യം ചെയ്യുമ്പോഴാണ് കോണ്‍ഗ്രസില്‍ പ്രതിഷേധം ശക്തമായത്. ഉമ്മന്‍ചാണ്ടിയോട് കാണിക്കാത്ത നീതി മറ്റാരോടും പ്രകടിപ്പിക്കേണ്ടെന്ന് മാത്യു കുഴല്‍നാടന്‍ നേരത്തെ വ്യക്തമാക്കിയിരുന്നു. തുടര്‍ന്ന്, ആണുങ്ങളുടെ സര്‍ക്കാരാണെങ്കില്‍ പിണറായി വിജയനോട് കണക്കുചോദിക്കൂ എന്ന് കെ. സുധാകരന്‍ തുറന്നടിച്ചതോടെ വിഷയം വൈകാരിക തലത്തിലേക്ക് നീങ്ങി.
ഹൈക്കോടതിയില്‍ പിണറായിയുടെ വാദങ്ങളെ അഡ്വക്കേറ്റ് ജനറല്‍ പിന്തുണച്ചത് ജനഹിതത്തിന് എതിരാണെന്ന് യു.ഡി.എഫ് അസോസിയേറ്റ് അംഗമായ ആര്‍.എം.പിയും കുറ്റപ്പെടുത്തിയത് കോണ്‍ഗ്രസിനെ കൂടുതല്‍ പ്രതിരോധത്തിലാക്കി. യു.ഡി.എഫ് കണ്‍വീനര്‍ സ്ഥാനത്തിരുന്നുകൊണ്ട് മുന്നണി തീരുമാനങ്ങള്‍ താനറിയുന്നില്ലെന്നും തന്നെ പുകച്ചുപുറത്തുചാടിക്കാന്‍ ശ്രമം നടക്കുന്നുണ്ടെന്നും അടൂര്‍ പ്രകാശ് തുറന്നടിച്ചതോടെ അന്തരീക്ഷം കൂടുതല്‍ കൊഴുത്തു. മന്ത്രി കെ. മുരളീധരനാണ് സര്‍ക്കാരിന്റെ പ്രതിരോധം ഏറ്റെടുത്തത്. ഒരാള്‍ മുഖ്യമന്ത്രിയെ ആവര്‍ത്തിച്ച് കുറ്റപ്പെടുത്തിയാല്‍ തിരശ്ശീലയ്ക്ക് പിന്നില്‍ ആളുണ്ടെന്ന് കരുതേണ്ടി വരുമെന്ന് അദ്ദേഹം അടൂര്‍ പ്രകാശിന് മറുപടി നല്‍കി.
കെ. സുധാകരന്റെ പരാമര്‍ശത്തെ പരിഹാസത്തോടെയാണ് മുരളീധരന്‍ നേരിട്ടത്. ഉമ്മന്‍ചാണ്ടിക്ക് നീതി കിട്ടിയില്ലെന്ന് പറയുമ്പോഴും, കേസ് നിയമപരമായി വേണം കൈകാര്യം ചെയ്യാനെന്ന പക്വമായ നിലപാടാണ് ചാണ്ടി ഉമ്മന്‍ സ്വീകരിച്ചത്. മുഖ്യമന്ത്രി വി.ഡി സതീശനും മന്ത്രി രമേശ് ചെന്നിത്തലയും കോണ്‍ഗ്രസ് നിയമസഭാകക്ഷിയോഗത്തില്‍ അന്വേഷണ കാര്യങ്ങള്‍ വിശദീകരിച്ചിട്ടും വീണ്ടും വിഷയം വിവാദമാക്കുന്നത് നിര്‍ദോഷമല്ലെന്ന നിലപാടിലാണ്.
കേന്ദ്രനേതൃത്വത്തിന് തലവേദനയുണ്ടാക്കുന്ന ചെറിയ നീക്കംപോലും കേരളത്തിലെ നേതാക്കളുടെ ഭാഗത്തുനിന്ന് ഉണ്ടാകരുതെന്ന് സണ്ണി ജോസഫ് കര്‍ശനമായി മുന്നറിയിപ്പ് നല്‍കി. അഭിപ്രായങ്ങള്‍ പാര്‍ട്ടിവേദികളില്‍ പറയാം, എന്നാല്‍ പരസ്യമായി അനുവദിക്കില്ല. സി.എം.ആര്‍.എല്‍ കേസില്‍ നിയമോപദേശത്തിന്റെ അടിസ്ഥാനത്തിലാണ് സര്‍ക്കാര്‍ മുന്നോട്ടുപോയതെന്നും കേസില്ലാതാക്കാന്‍ ശ്രമിച്ചിട്ടില്ലെന്നും വ്യക്തമാക്കിയ അദ്ദേഹം, എല്ലാവരും പാര്‍ട്ടി അച്ചടക്കം പാലിക്കാന്‍ ബാധ്യസ്ഥരാണെന്നും ഓര്‍മ്മിപ്പിച്ചു.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20261020013439.jpg)
-20261020012625.jpg)
-20261020012135.jpg)
-20201113034035.jpg)
