അമേരിക്കൻ പൗരത്വ രേഖകൾ നൽകിയിട്ടും യുവതിയെ വിട്ടയച്ചില്ല

JANUARY 18, 2026, 3:28 AM

മേരിലാൻഡ്: താൻ അമേരിക്കൻ പൗരയാണെന്ന് തെളിയിക്കുന്ന ജനന സർട്ടിഫിക്കറ്റും മറ്റ് രേഖകളും ഹാജരാക്കിയിട്ടും, 22കാരിയായ യുവതിയെ 25 ദിവസം തടവിലിടുകയും കാലിൽ നിരീക്ഷണ ഉപകരണം ഘടിപ്പിക്കുകയും ചെയ്ത ഇമിഗ്രേഷൻ ഉദ്യോഗസ്ഥരുടെ നടപടി വിവാദമാകുന്നു. മേരിലാൻഡ് സ്വദേശിയായ ദുൽസി കോൺസുലോ ഡയസ് മൊറാലസാണ് ഈ ദുരനുഭവത്തിന് ഇരയായത്.

ഡിസംബർ 14ന് ബാൾട്ടിമോറിൽ വെച്ചാണ് ഇമിഗ്രേഷൻ ആൻഡ് കസ്റ്റംസ് എൻഫോഴ്‌സ്‌മെന്റ് ഉദ്യോഗസ്ഥർ ദുൽസിയെ അറസ്റ്റ് ചെയ്തത്. താൻ അമേരിക്കയിലാണ് ജനിച്ചതെന്ന് ആവർത്തിച്ച് പറഞ്ഞിട്ടും ഉദ്യോഗസ്ഥർ അത് വിശ്വസിക്കാൻ തയ്യാറായില്ല.

മേരിലാൻഡിലെ ആശുപത്രിയിൽ നിന്നുള്ള ജനന സർട്ടിഫിക്കറ്റ്, പ്രതിരോധ കുത്തിവയ്പ്പ് രേഖകൾ, കാൽപ്പാടുകൾ അടങ്ങിയ മെഡിക്കൽ രേഖകൾ എന്നിവ അഭിഭാഷകർ ഹാജരാക്കി. ജോൺ ഹോപ്കിൻസ് മെഡിക്കൽ സ്‌കൂളിലെ വിദഗ്ധരും ഈ രേഖകൾ യഥാർത്ഥമാണെന്ന് സ്ഥിരീകരിച്ചു.

ദുൽസി മെക്‌സിക്കോയിൽ നിന്നുള്ള അനധികൃത കുടിയേറ്റക്കാരിയാണെന്നാണ് ഹോംലാൻഡ് സെക്യൂരിറ്റി വിഭാഗം ആരോപിക്കുന്നത്. മുൻപ് അതിർത്തി കടക്കാൻ ശ്രമിച്ചപ്പോൾ അവർ മെക്‌സിക്കൻ പൗരത്വമാണ് അവകാശപ്പെട്ടതെന്നും ഉദ്യോഗസ്ഥർ പറയുന്നു.

ജനുവരി 7ന് തടവിൽ നിന്ന് മോചിപ്പിച്ചെങ്കിലും അവർക്കെതിരെയുള്ള കേസ് പിൻവലിക്കാൻ അധികൃതർ തയ്യാറായിട്ടില്ല. കഴിഞ്ഞ ചൊവ്വാഴ്ച ഉദ്യോഗസ്ഥരെ കാണാനെത്തിയപ്പോൾ നിർബന്ധപൂർവ്വം അവരുടെ കാലിൽ നിരീക്ഷണ ഉപകരണം ഘടിപ്പിക്കുകയായിരുന്നു.

തന്റെ പൗരത്വം തെളിയിക്കാൻ ഒരു അമേരിക്കൻ പൗരനെക്കൊണ്ട് അമിതമായി അധ്വാനിപ്പിക്കുന്നത് അപകടകരമായ കീഴ്‌വഴക്കമാണെന്ന് ദുൽസിയുടെ അഭിഭാഷകർ പറഞ്ഞു. ലാറ്റിൻ അമേരിക്കൻ പൈതൃകമുള്ള പൗരന്മാരെ മന:പ്പൂർവ്വം ലക്ഷ്യം വെക്കുകയാണെന്നും അവർ ആരോപിച്ചു.