-4-20260113024818.webp)
ഐക്യരാഷ്ട്ര സഭയുടെ പൊതുസഭ വീണ്ടുമൊരു അന്താരാഷ്ട്ര നയതന്ത്ര പോരാട്ട വേദിയായി മാറിയിരിക്കുകയാണ്. ലോക നേതാക്കള് സാക്ഷിയായ വേദിയില് അമേരിക്കന് പ്രസിഡന്റ് ഡൊണാള്ഡ് ട്രംപ് നടത്തിയ കടന്നാക്രമണങ്ങള് ആഗോള രാഷ്ട്രീയത്തില് വലിയ ചലനങ്ങളാണ് സൃഷ്ടിച്ചിരിക്കുന്നത്. മുന്പില്ലാത്തവിധം ശക്തമായ ഭാഷയില് അമേരിക്കന് വിദേശനയം വ്യക്തമാക്കിയ ട്രംപ്, എതിരാളികളായ രാജ്യങ്ങള്ക്ക് നയതന്ത്രപരമായ താക്കീത് നല്കുക മാത്രമല്ല, പ്രസംഗത്തിലുടനീളം തങ്ങളുടേതായ മേല്ക്കോയ്മ സ്ഥാപിക്കാന് ശ്രമിക്കുകയും ചെയ്തു. ഇതോടെ ഐക്യരാഷ്ട്ര സഭയുടെ ചരിത്രത്തില് തന്നെ അപൂര്വമായ പ്രതിഷേധ രംഗങ്ങള്ക്കാണ് പൊതുസഭാ ഹാള് സാക്ഷ്യം വഹിച്ചത്.
ക്യൂബയിലെ കമ്മ്യൂണിസ്റ്റ് ഭരണകൂടം തകര്ച്ചയുടെ വക്കിലാണെന്നും വൈകാതെ ആ രാജ്യത്തേക്ക് സ്വാതന്ത്ര്യം എത്തുമെന്നുമുള്ള ട്രംപിന്റെ പ്രഖ്യാപനം ലാറ്റിന് അമേരിക്കന് രാഷ്ട്രീയത്തില് ഉണ്ടാക്കാന് പോകുന്ന ഓളങ്ങള് ചെറുതല്ല. ക്യൂബയില് ഭരണ മാറ്റമാണ് അമേരിക്കന് ലക്ഷ്യമെന്ന് തുറന്നടിച്ച അദേഹം, കമ്മ്യൂണിസം ഒരിക്കലും അമേരിക്കയിലേക്ക് കടന്നുവരില്ലെന്നും ആവര്ത്തിച്ചു. ആറ് പതിറ്റാണ്ടിലേറെയായി തുടരുന്ന സാമ്പത്തിക ഉപരോധങ്ങള്ക്ക് പുറമെ, ക്യൂബന് സര്ക്കാരിനെതിരെ കൂടുതല് ശക്തമായ നടപടികളിലേക്ക് നീങ്ങുമെന്ന സൂചനയാണ് യുഎസ് ഭരണകൂടം നല്കുന്നത്. വെനസ്വേലയിലെ സൈനിക നടപടികള്ക്ക് ശേഷം ട്രംപ് ഭരണകൂടം അടുത്ത ലക്ഷ്യമായി ക്യൂബയെ നിശ്ചയിച്ചിരിക്കുന്നുവെന്ന സന്ദേശമാണ് ഈ വാക്കുകളില് നിഴലിക്കുന്നത്.
ലാറ്റിന് അമേരിക്കയില് സ്വാതന്ത്ര്യം ഉറപ്പാക്കുമെന്ന് പ്രഖ്യാപിച്ചതിന് പിന്നാലെ പശ്ചിമേഷ്യന് നയതന്ത്രത്തിലും ട്രംപ് തന്റെ നിലപാടുകള് പരസ്യമാക്കി. ഇറാനുമായി ഒരു അന്തിമ കരാറിലെത്തുക, അല്ലെങ്കില് ആ രാജ്യത്തെ പൂര്ണമായും തകര്ക്കുക എന്ന രണ്ട് വഴികളാണ് തനിക്ക് മുന്നിലുള്ളതെന്ന് അദേഹം പൊതുസഭയില് തുറന്നടിച്ചു. മേഖലയില് ഭീഷണിയാകുന്ന തരത്തിലുള്ള ശക്തിയായി ഇറാന് തുടരുന്നത് അംഗീകരിക്കില്ലെന്ന കര്ശന സന്ദേശമാണ് ട്രംപ് നല്കിയത്. ഒരു വശത്ത് ഇറാന്റെ പുനര് നിര്മ്മാണത്തിന് വഴിയൊരുക്കുന്ന കരാര് വാഗ്ദാനം ചെയ്യുമ്പോള് തന്നെ, മറു വശത്ത് സൈനികമായ ഇല്ലാതാക്കല് എന്ന ഭീഷണി ഉയര്ത്തുന്നത് ട്രംപിന്റെ സമ്മര്ദ്ദ തന്ത്രത്തിന്റെ ഭാഗമാണ്.
യുഎന് പൊതുസഭയില് ട്രംപ് നടത്തിയ പരാമര്ശങ്ങള് കടുത്ത നയതന്ത്ര പ്രതിഷേധങ്ങള്ക്കാണ് വഴിതുറന്നത്. ട്രംപിന്റെ പ്രസംഗത്തില് പ്രതിഷേധിച്ച് ക്യൂബന് വിദേശകാര്യ മന്ത്രി ബ്രൂണോ റോഡ്രിഗസനേതൃത്വത്തിലുള്ളിന്റെ ക്യൂബന് പ്രതിനിധി സംഘവും, അതിനുമുന്പായി ഇറാനിയന് പ്രതിനിധി സംഘവും സഭയില് നിന്ന് ഇറങ്ങിപ്പോയി. അന്താരാഷ്ട്ര വേദിയില് ഒരു അധ്യക്ഷ രാജ്യത്തിന്റെ തലവന് നടത്തുന്ന പരസ്യമായ അന്ത്യശാസനങ്ങള് അംഗീകരിക്കാന് കഴിയില്ലെന്ന ശക്തമായ നിലപാടാണ് ഇരുരാജ്യങ്ങളും ഇതിലൂടെ വ്യക്തമാക്കിയത്. വന്ശക്തി രാജ്യങ്ങളുടെ ഏകപക്ഷീയമായ ഇടപെടലുകള് അന്താരാഷ്ട്ര ബന്ധങ്ങളില് വരുത്തുന്ന വിള്ളലിന്റെ ആഴം വ്യക്തമാക്കുന്നതായിരുന്നു ഈ വാക്കൗട്ടുകള്.
അമേരിക്കന് ആഭ്യന്തര രാഷ്ട്രീയത്തെയും വരാനിരിക്കുന്ന തിരഞ്ഞെടുപ്പിനെയും ലക്ഷ്യം വെച്ചുള്ള നീക്കങ്ങളും ട്രംപിന്റെ പ്രസംഗത്തില് വ്യക്തമായിരുന്നു. നവംബറിലെ അമേരിക്കന് തിരഞ്ഞെടുപ്പിന് ശേഷം ഇറാനുമായി ഒരു നിര്ണ്ണായക കരാറിലെത്താന് കഴിയുമെന്ന പ്രതീക്ഷ പങ്കുവെച്ച അദ്ദേഹം, യുഎസ് സൈനിക ശക്തിയെ സംബന്ധിച്ച വിമര്ശനങ്ങള് തള്ളിക്കളയുകയും ചെയ്തു. രാജ്യത്ത് ആയുധക്ഷാമമുണ്ടെന്ന വാദങ്ങള് ഉന്നയിക്കുന്നവരെ ഭീരുക്കളും രാജ്യദ്രോഹികളുമായി മുദ്രകുത്തിയ ട്രംപ്, മുന്പില്ലാത്ത വിധം വേഗതയില് അമേരിക്കന് ആയുധശേഖരം വര്ദ്ധിപ്പിക്കുകയാണെന്ന് അവകാശപ്പെട്ടു. ഇത് അമേരിക്കയിലെ യാഥാസ്ഥിതിക വോട്ടര്മാരെയും ക്യൂബന്-അമേരിക്കന് വോട്ട് ബാങ്കിനെയും തൃപ്തിപ്പെടുത്താനുള്ള കൃത്യമായ രാഷ്ട്രീയ നീക്കമായി വിലയിരുത്തപ്പെടുന്നു.
വര്ഷങ്ങളായി ക്യൂബയ്ക്കും ഇറാന്റെ അണുവായുധ പദ്ധതികള്ക്കുമെതിരെ അമേരിക്ക തുടരുന്ന തന്ത്രപരമായ ഉപരോധങ്ങളുടെ സ്വാഭാവികമായ അടുത്ത ഘട്ടമാണ് ട്രംപ് പ്രഖ്യാപിച്ചിരിക്കുന്നത്. യുഎസ് സ്റ്റേറ്റ് സെക്രട്ടറി മാര്ക്കോ റൂബിയോയുടെ നേതൃത്വത്തില് നടന്നു വരുന്ന നയതന്ത്ര ചര്ച്ചകള് ഒരു വശത്ത് തുടരുമ്പോള് തന്നെ, സൈനികവും സാമ്പത്തികവുമായ സമ്മര്ദ്ദം ഉപയോഗിച്ച് തങ്ങള്ക്ക് അനുകൂലമായ ഭരണമാറ്റം ഉറപ്പാക്കുകയാണ് അമേരിക്കയുടെ ആത്യന്തിക ലക്ഷ്യം. പ്രശ്നങ്ങള് ദീര്ഘകാലത്തേക്ക് നീട്ടിക്കൊണ്ടുപോകാതെ പെട്ടെന്ന് പരിഹരിക്കുന്നതിലാണ് തനിക്ക് വിശ്വാസമെന്ന ട്രംപിന്റെ വാക്കുകള് വരും ദിവസങ്ങളില് യുഎസ് ഭരണകൂടത്തില് നിന്ന് കൂടുതല് കടുപ്പമേറിയ തീരുമാനങ്ങള് ഉണ്ടാകുമെന്നതിന്റെ സൂചനയാണ്.
ചുരുക്കത്തില് ട്രംപിന്റെ ഈ യുഎന് പ്രസംഗം കേവലം ഒരു വാക്യത്തില് ഒതുങ്ങുന്ന ഒന്നല്ല, മറിച്ച് ആഗോള വിദേശനയത്തില് അമേരിക്ക നടപ്പിലാക്കാന് പോകുന്ന നിലപാടുകളുടെ ഒരു പരസ്യമായ വിളംബരമാണ്. ഇത് പശ്ചിമേഷ്യയിലും ലാറ്റിന് അമേരിക്കയിലും സൃഷ്ടിക്കാന് പോകുന്ന ഭൗമരാഷ്ട്രീയ ചലനങ്ങള് തികച്ചും പ്രവചനാതീതമാണ്. വന്ശക്തികളുടെ സമാധാനപരമായ സഹവര്ത്തിത്വത്തിന് പകരം, ആധിപത്യവും മുന്നറിയിപ്പുകളും ആയുധമാക്കുന്ന ട്രംപിന്റെ ഈ ശൈലി വരുംദിവസങ്ങളില് അന്താരാഷ്ട്ര തലത്തില് കൂടുതല് നയതന്ത്ര സംഘര്ഷങ്ങള്ക്കും അനിശ്ചിതത്വങ്ങള്ക്കും വഴിതുറക്കുമെന്നതില് സംശയമില്ല.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
