തമിഴ്‌നാട്ടിലെ ഗോവധ നിരോധനം: മദ്രാസ് ഹൈക്കോടതി ഉത്തരവ് സുപ്രീം കോടതി സ്റ്റേ ചെയ്തു

JULY 13, 2026, 2:07 AM

ദില്ലി: തമിഴ്നാട്ടിൽ ഗോവധം നിരോധിച്ചുകൊണ്ടുള്ള മദ്രാസ് ഹൈക്കോടതിയുടെ ഉത്തരവ് സുപ്രിം കോടതി സ്റ്റേ ചെയ്തു.

മദ്രാസ് ഹൈക്കോടതിയുടെ സമ്പൂർണ്ണ നിരോധന ഉത്തരവിനെതിരെ തമിഴ്‌നാട് സർക്കാർ സമർപ്പിച്ച ഹരജിയിലാണ് ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ചിന്റെ സ്റ്റേ.

ഹൈക്കോടതി ഉത്തരവിന്റെ അവസാന ഖണ്ഡികയിൽ പ്രഥമദൃഷ്ട്യാ തിരുത്തൽ ആവശ്യമാണെന്ന് നിരീക്ഷിച്ച സുപ്രിം കോടതി കേസിൽ നോട്ടീസ് അയക്കാൻ ഉത്തരവിട്ടു.

ബക്രീദിന് തൊട്ടുമുമ്പ് പുറപ്പെടുവിച്ച ഹൈക്കോടതിയുടെ മെയ് 27-ലെ ഉത്തരവ്, 'തമിഴ്‌നാട് മൃഗസംരക്ഷണ നിയമം, 1958'-ന് വിരുദ്ധമാണെന്ന് സർക്കാർ ചൂണ്ടിക്കാട്ടി.

ജോലി ചെയ്യാനോ പ്രജനനത്തിനോ അനുയോജ്യമല്ലാത്ത, 10 വയസ്സിന് മുകളിൽ പ്രായമുള്ള പശുക്കളെ, ബന്ധപ്പെട്ട അധികാരിയുടെ സാക്ഷ്യപത്രത്തോടെ അറുക്കാൻ ഈ നിയമം വ്യക്തമായി അനുവദിക്കുന്നുണ്ട്.

തമിഴ്‌നാട്ടിലെ നിലവിലുള്ള നിയമങ്ങൾക്ക് വിരുദ്ധമാണ് ഹൈക്കോടതിയുടെ ഗോവധ നിരോധനം എന്നായിരുന്നു തമിഴ്നാട് സർക്കാറിന്റെ വാദം.