ജീവിതം ഒരു സ്ഥലത്തുനിന്ന് മറ്റൊരു സ്ഥലത്തേക്കുള്ള യാത്രയല്ല സ്വയം കണ്ടെത്താനുള്ള ആത്മീയ തീർത്ഥാടനമാണ് - ഡോ. ജോസഫ് മാർ ബർണബാസ് സഫ്രഗൻ മെത്രാപോലിത്ത

SEPTEMBER 26, 2026, 12:22 AM

ഡാളസ്: ദൈവം നൽകിയിരിക്കുന്ന സഭയ്ക്കും വിശ്വാസത്തിനും നന്ദി അർപ്പിച്ചുകൊണ്ട്, ജീവിതം എന്നത് കേവലം ഒരു സ്ഥലത്തുനിന്ന് മറ്റൊരു സ്ഥലത്തേക്കുള്ള യാത്രയല്ലെന്നും മറിച്ച് സ്വയം കണ്ടെത്താനുള്ള ആത്മീയ തീർത്ഥാടനമാണെന്നും ഡോ. ജോസഫ് മാർ ബർണബാസ് സഫ്രഗൻ മെത്രാപോലിത്ത പറഞ്ഞു.

സെന്റ് പോൾസ് മാർത്തോമ്മാ ഇടവകയുടെ യുവജനപ്രസ്ഥാനത്തിന്റെ ആഭിമുഖ്യത്തിൽ സെപ്തംബർ 25ന് വെള്ളിയാഴ്ച വൈകുന്നേരം 'സെന്റർ എ വൈൻ' ബൈബിൾ പഠന ക്ലാസിൽ പങ്കെടുത്തവരെ അഭിസംബോധന ചെയ്തു പ്രസംഗിക്കുകയായിരുന്നു തിരുമേനി.

ആരാധനയ്ക്കും ദൈവവചനം കേൾക്കാനും പഠിക്കാനുമൊപ്പം നമ്മെത്തന്നെ അറിയുക കൂടിയാണ് ഈ യാത്രയുടെ ലക്ഷ്യം . 'ഞാൻ ഒരു മനുഷ്യനാണ്', 'ഞാൻ ഒരു വിശ്വാസിയാണ്' എന്നതിലുപരി, യേശുക്രിസ്തുവിൽ വിശ്വസിക്കുന്ന ഒരു ദൈവപൈതലാണ് താനെന്ന അടിസ്ഥാന തിരിച്ചറിവിലേക്ക് ഓരോരുത്തരും എത്തേണ്ടതുണ്ട്. ദൈവത്തിന്റെ കൃപയാണ് മനുഷ്യന്റെ യഥാർത്ഥ അനുഗ്രഹം എന്ന തിരിച്ചറിവ് ചിന്തകളെയും ജീവിതത്തെയും നയിക്കേണ്ടതുണ്ടെന്ന് സഫ്രഗൻ മെത്രാപോലിത്ത ഓർമ്മിപ്പിച്ചു.

ചരിത്രപരമായി യേശു തന്റെ ശിഷ്യന്മാരോട് ചോദിച്ച 'ജനങ്ങൾ എന്നെ ആർ എന്നു പറയുന്നു?' എന്ന ചോദ്യവും, അതിന് ശിഷ്യന്മാർ നൽകിയ മറുപടികളും ഇന്നത്തെ കാലത്തും ഏറെ പ്രസക്തമാണ്. യോഹന്നാൻ സ്‌നാപകൻ, ഏലിയാവ്, അല്ലെങ്കിൽ പ്രവാചകന്മാരിൽ ഒരാളെന്നൊക്കെ ജനങ്ങൾ ചിന്തിച്ചെങ്കിലും, മറ്റുള്ളവരുടെ അഭിപ്രായങ്ങൾക്കപ്പുറം 'എന്നാൽ നിങ്ങൾ എന്നെ ആർ എന്നു പറയുന്നു?' എന്ന വ്യക്തിപരമായ ഏറ്റുപറച്ചിലിലേക്ക് വിശ്വാസം വളരേണ്ടതുണ്ട്.

ബൈബിളിലെ സംഭവങ്ങളെ മുൻനിർത്തി, ശിമോൻ പത്രോസ് 'നീ ജീവനുള്ള ദൈവത്തിന്റെ പുത്രനായ ക്രിസ്തുവാണ്' എന്ന് പ്രഖ്യാപിച്ചതും, സംശയങ്ങളുടെ നിഴലിൽ നിന്ന് തോമസ് ശ്ലീഹാ 'എന്റെ കർത്താവും എന്റെ ദൈവവും!' എന്ന് ഹൃദയത്തിൽ നിന്ന് ഏറ്റുപറഞ്ഞതും വിശ്വാസത്തിന്റെ ആഴവും ദൃഢതയും വെളിപ്പെടുത്തുന്നതാണെന്ന് തിരുമേനി ചൂണ്ടിക്കാട്ടി.
വ്യത്യസ്ത സാഹചര്യങ്ങളാണെങ്കിലും ഇവയെല്ലാം നമ്മെ എത്തിക്കുന്നത് ഒരേ സത്യത്തിലേക്കാണ്.

മറ്റുള്ളവർ എന്തു പറയുന്നു എന്നതല്ല, മറിച്ച് സ്വന്തം ജീവിതത്തിൽ യേശു ആരാണെന്ന് തിരിച്ചറിയുമ്പോഴാണ് ദൈവത്തെ അന്വേഷിക്കുന്നതിലൂടെ സ്വയം കണ്ടെത്താനും ദൈവം വിളിച്ചിരിക്കുന്ന ദൗത്യം തിരിച്ചറിയാനും കഴിയുകയെന്ന ആഹ്വാനത്തോടെയാണ് തിരുമേനി തന്റെ സന്ദേശം അവസാനിപ്പിച്ചത്.

'വിശുദ്ധ ശീലങ്ങൾ' എന്ന പരമ്പരയുടെ ഭാഗമായി 'ശുശ്രൂഷ' എന്ന വിഷയത്തെ ആസ്പദമാക്കി ജസ്റ്റിൻ മാത്യുവാണ് ക്ലാസ് നയിച്ചു. ഡാളസ് യൂത്ത് ചാപ്ലയിൻ റവ അരുൺ സാമുവേൽ വർഗീസ് തിരുമേനിയെ പരിചയപ്പെടുത്തുകയും സ്വാഗതം ആശംസിക്കുകയും ചെയ്തു,

സ് പോൾസ് ഇടവക വികാരി റവ. രജിൻ രാജു, സെക്രട്ടറി സോജി സ്‌കറിയാ, ട്രസ്റ്റി റിപ്‌സൺ, സെന്റ് പോൾസ് മാർത്തോമ്മാ ഇടവക യൂത്ത് ഫെല്ലോഷിപ്പ് സെക്രട്ടറി റോഹൻ ചേലങ്കരി, യൂത്ത് ഫെല്ലോഷിപ് സെന്റർ എ സെക്രട്ടറി ടീന മാളിയേക്കൽ തുടങ്ങിയവർ വിവിധ പരിപാടികൾക്ക് നേതൃത്വം നൽകി.