തിരുവനന്തപുരം: ബിജെപി ഭരിക്കുന്ന സംസ്ഥാനങ്ങളിൽ ഭരണകക്ഷിയുടെ ഒത്താശയോടെയാണ് ക്രൈസ്തവ പുരോഹിതർക്കും കന്യാസ്ത്രീകൾക്കുമെതിരെ അക്രമം ബജ്‌റംഗ്ദൾ പ്രവർത്തകർ നടത്തുന്നതെന്ന് കെപിസിസി പ്രസിഡന്റ് സണ്ണി ജോസഫ് എംഎൽഎ.

 ഒഡീഷയിൽ മലയാളികളായ വൈദികർക്കും കന്യാസ്ത്രീകൾക്കും എതിരെ ബജ്‌റംഗ്ദൾ പ്രവർത്തകർ നടത്തിയ അക്രമം പ്രതിഷേധാർഹമാണ്. അക്രമികൾ വൈദികരെയും കന്യാസ്ത്രീകളെയും കയ്യേറ്റം ചെയ്യുമ്പോൾ പോലീസ് കയ്യുംകെട്ടി നിൽക്കുന്നു.ക്രൈസ്തവർക്കെതിരായ ആക്രമണം ബോധപൂർവ്വമാണ്. ഛത്തീസ്ഗഢിലും രാജസ്ഥാനിലും ഉൾപ്പെടെ ഉത്തരേന്ത്യയിൽ നടക്കുന്ന നിയമവിരുദ്ധ പ്രവർത്തനങ്ങളുടെ തുടർച്ചയാണ് ഒഡീഷയിൽ വൈദികരും കന്യാസ്ത്രീകളും നേരിട്ട അതിക്രമം.

ഇത്തരം സംഭവങ്ങൾ തടയുന്നതിനും ആവർത്തിക്കാതിരിക്കാനും യഥാർത്ഥ കുറ്റവാളികളെ നിയമത്തിന്റെ മുന്നിൽ കൊണ്ടുവരുന്നതിനും കേന്ദ്ര-സംസ്ഥാന സർക്കാരുകൾ ബിജെപിയുടെ രാഷ്ട്രീയ താൽപ്പര്യത്തിന് വഴങ്ങി നടപടിയെടുക്കുന്നില്ലെന്ന് സണ്ണി ജോസഫ് പറഞ്ഞു.

 ഛത്തീസ്ഗഢിൽ കന്യാസ്ത്രീകളെ ആക്രമിച്ച ബജ്‌റംഗ്ദൾ പ്രവർത്തകർ ഇപ്പോഴും ഭരണകൂടത്തിന്റെ സംരക്ഷണത്തിൽ സ്വതന്ത്രരായി കഴിയുന്നു. ബിജെപി ഭരിക്കുന്ന മിക്ക സംസ്ഥാനങ്ങളിലും ന്യൂനപക്ഷ വേട്ട നടത്തുന്ന സംഘപരിവാർ പ്രവർത്തകർക്ക് ഇതേ സംരക്ഷണം തുടരുകയാണ്. എന്നിട്ടാണ് കേരളത്തിലെ ബിജെപി നേതാക്കൾ ഒരു കുറ്റബോധവുമില്ലാതെ ക്രൈസ്തവ ഭവനങ്ങളിലേക്കും പള്ളിമേടകളിലേക്കും കേക്കുമായി കടന്നുചെല്ലുന്നത്. 

 രാജ്യത്തിന്റെ മതേതരത്വം നശിപ്പിക്കുന്നതിനും ഭരണഘടന ഉറപ്പുനൽകുന്ന വിശ്വാസത്തിന്റെയും അഭിപ്രായത്തിന്റെയും സ്വാതന്ത്ര്യം നിഷേധിക്കുന്നതിനുമുള്ള നടപടികളാണ് തുടരുന്നത്. ഇത്തരം സംഭവങ്ങൾ ജനാധിപത്യ മതേതര രാജ്യത്തിന് ചേർന്നതല്ല. ഛത്തീസ്ഗഢിൽ നിരപരാധികളായ രണ്ടു കന്യസ്ത്രീകൾക്ക് നേരിടേണ്ടിവന്ന ദുരനുഭവത്തിന്റെ വേദനയും പ്രതിഷേധവും കെട്ടടങ്ങുന്നതിന് മുന്നെയാണ് ഒഡീഷയിൽ നിന്നും സമാനമായ സംഭവം ആവർത്തിക്കുന്നതെന്നും സണ്ണി ജോസഫ് പറഞ്ഞു. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്