കേരളത്തിൽ കാലവർഷം ചതിച്ചു; 35 ശതമാനം മഴക്കുറവ്, വില്ലനായി 'എൽ നിനോ' പ്രതിഭാസം!

JUNE 26, 2026, 10:33 PM

കൊച്ചി: സംസ്ഥാനത്ത് ഇത്തവണ കാലവർഷത്തിൽ വലിയ രീതിയിലുള്ള കുറവ് രേഖപ്പെടുത്തിയതായി റിപ്പോർട്ട്. മൺസൂൺ ആരംഭിച്ച ജൂൺ നാല് മുതൽ കഴിഞ്ഞ ദിവസം വരെയുള്ള കണക്കുകൾ പ്രകാരം സംസ്ഥാനത്ത് 35 ശതമാനം മഴയുടെ കുറവാണ് ഉണ്ടായിരിക്കുന്നത്.

ഇടുക്കി, വയനാട് ജില്ലകളിലാണ് ഏറ്റവും രൂക്ഷമായ രീതിയിൽ മഴ കുറഞ്ഞിട്ടുള്ളത്. പസഫിക് സമുദ്രത്തിലെ താപനില വ്യതിയാനവുമായി ബന്ധപ്പെട്ട 'എൽ നിനോ' പ്രതിഭാസമാണ് ഇത്തവണ കാലവർഷം ദുർബലമാകാൻ കാരണമായതെന്ന് കൊച്ചി ശാസ്ത്ര സാങ്കേതിക സർവകലാശാലാ (കുസാറ്റ്) റഡാർ ഗവേഷണകേന്ദ്രം ഡയറക്ടർ ഡോ. എസ്. അഭിലാഷ് വ്യക്തമാക്കി.

കഴിഞ്ഞ 15 വർഷമായി കേരളത്തിൽ കാലവർഷത്തിന്റെ തുടക്കത്തിൽ മഴ കുറയുന്ന പ്രവണത ദൃശ്യമാണെന്ന് കണക്കുകൾ സൂചിപ്പിക്കുന്നു. മുൻവർഷങ്ങളിൽ 2025-ൽ എട്ട് ശതമാനവും, 2024-ൽ 37 ശതമാനവും, 2023-ൽ 66 ശതമാനവും മഴക്കുറവ് രേഖപ്പെടുത്തിയിരുന്നു. നിലവിൽ രാജ്യത്താകെ 41 ശതമാനം മഴയുടെ കുറവുണ്ട്. ഈ വർഷത്തെ മഴക്കുറവ് കേരളത്തിലെ 44 നദികളിലെയും ജലനിരപ്പിനെ സാരമായി ബാധിക്കുമെന്ന ആശങ്കയുണ്ട്.

എൽ നിനോ പ്രതിഭാസം 12 മുതൽ 15 മാസം വരെ തുടർന്നേക്കാമെന്നും ഇത് ഇന്ത്യയിലേക്കുള്ള കാലവർഷക്കാറ്റിന്റെ ശക്തി കുറയ്ക്കുമെന്നും വിദഗ്ദ്ധർ ചൂണ്ടിക്കാണിക്കുന്നു. എന്നാൽ, ബംഗാൾ ഉൾക്കടലിൽ ന്യൂനമർദം രൂപപ്പെടുകയാണെങ്കിൽ ഈ മാസം അവസാനത്തോടെ സംസ്ഥാനത്ത് മികച്ച മഴ ലഭിക്കാനുള്ള സാധ്യതയുമുണ്ട്.

സംസ്ഥാനത്തെ വിവിധ ജില്ലകളിലെ മഴക്കുറവിന്റെ ശതമാനം പരിശോധിച്ചാൽ വയനാട്ടിലാണ് ഏറ്റവും കൂടുതൽ മഴ കുറഞ്ഞത് (65%). ഇടുക്കിയിൽ 53 ശതമാനവും, കാസർകോട്, കണ്ണൂർ ജില്ലകളിൽ 41 ശതമാനം വീതവും, പാലക്കാട് 37%, കൊല്ലം 36%, തൃശ്ശൂർ, ആലപ്പുഴ ജില്ലകളിൽ 33% വീതവും മഴക്കുറവ് രേഖപ്പെടുത്തി. എറണാകുളം (29%), കോഴിക്കോട് (25%), മലപ്പുറം (20%), കോട്ടയം (20%), പത്തനംതിട്ട (18%) എന്നിങ്ങനെയാണ് മറ്റ് ജില്ലകളിലെ കണക്കുകൾ.