ലോകത്തെ മുന്‍നിര കമ്പനികളെല്ലാം ലിസ്റ്റ് ചെയ്തിരിക്കുന്ന യുഎസ് വിപണിയില്‍ നിക്ഷേപിച്ചാലുള്ള നേട്ടത്തില്‍ നോട്ടമില്ലാത്തതാരാണ്. ഇന്ത്യന്‍ നിക്ഷേപകര്‍ക്ക് ആഗോള ടെക് ഭീമന്മാരായ ആപ്പിള്‍, ഗൂഗിള്‍, മെറ്റാ തുടങ്ങിയ കമ്പനികളുടെ ഓഹരികളില്‍ നിക്ഷേപം നടത്താനുള്ള സാധ്യതകള്‍ ഇന്ന് വളരെ എളുപ്പമാണ്. ഇന്ത്യയിലെ ഫിന്‍ടെക് മേഖലയിലെ വളര്‍ച്ച കാരണം, റെക്കോര്‍ഡ് ഉയരങ്ങളിലെത്തി നില്‍ക്കുന്ന യുഎസ് വിപണിയില്‍ നിന്ന് ലാഭമുണ്ടാക്കാന്‍ ഇപ്പോള്‍ ഇന്ത്യക്കാര്‍ക്കും സാധിക്കും. 

ഡൗ ഇന്‍ഡസ്ട്രിയല്‍സ്, എസ് ആന്‍ഡ് പി 500, നാസ്ഡാക്ക് കമ്പോസിറ്റ് എന്നിവ എക്കാലത്തെയും പുതിയ ഉയരങ്ങളിലെത്തിയിരിക്കുകയാണ്. ഡൗ വെള്ളിയാഴ്ച ആദ്യമായി 47,000 ന് മുകളിലാണ് ക്ലോസ് ചെയ്തത്. യു.എസ്-ചൈന വ്യാപാര കരാറിലെ പുരോഗതിയും ഫെഡറല്‍ റിസര്‍വില്‍ നിന്ന് മറ്റൊരു പലിശ നിരക്ക് കുറയ്ക്കുമെന്ന പ്രതീക്ഷയുമാണ് യുഎസ് ഓഹരി സൂചികകള്‍ക്ക് കരുത്തേകുന്നത്.

യുഎസ് ഓഹരികളില്‍ എങ്ങനെ നിക്ഷേപിക്കാം ?  

ഗ്ലോബല്‍ ട്രേഡിംഗ് അക്കൗണ്ട്: ഒരു അംഗീകൃത ബ്രോക്കറേജ് സ്ഥാപനത്തിന്റെ ഓണ്‍ലൈന്‍ പ്ലാറ്റ്ഫോം വഴി ഗ്ലോബല്‍ ട്രേഡിംഗ് അക്കൗണ്ട് തുറക്കുക എന്നതാണ് ആദ്യപടി. പല അന്താരാഷ്ട്ര ബ്രോക്കര്‍മാരും ഇന്ത്യക്കാര്‍ക്ക് സൗജന്യ അക്കൗണ്ടുകള്‍ നല്‍കുന്നുണ്ട്.

കെവൈസി (KYC) പൂര്‍ത്തിയാക്കുക: തിരിച്ചറിയല്‍ രേഖ, വിലാസം തെളിയിക്കുന്ന രേഖ, പാന്‍ കാര്‍ഡ്, ബാങ്ക് അക്കൗണ്ട് വിവരങ്ങള്‍ എന്നിവ സമര്‍പ്പിച്ച് കെവൈസി വെരിഫിക്കേഷന്‍ പൂര്‍ത്തിയാക്കുക. നിയമപരമായ കാര്യങ്ങള്‍ക്കായി ചില പ്ലാറ്റ്ഫോമുകള്‍ അധിക രേഖകള്‍ ആവശ്യപ്പെട്ടേക്കാം.

ഫണ്ട് ചേര്‍ക്കുക: അക്കൗണ്ട് സജ്ജമാക്കിയ ശേഷം ഫണ്ട് ചേര്‍ത്ത് നിങ്ങള്‍ക്ക് യുഎസ് ഓഹരികളില്‍ ട്രേഡിംഗ് ആരംഭിക്കാം. 10 ഡോളര്‍ പോലുള്ള ചെറിയ തുകകളില്‍ പോലും നിക്ഷേപം തുടങ്ങാന്‍ കഴിയും.
പ്രധാന നേട്ടങ്ങളും ശ്രദ്ധിക്കേണ്ട കാര്യങ്ങളും

യുഎസ് ഓഹരികളിലെ നിക്ഷേപം നിങ്ങളുടെ പോര്‍ട്ട്ഫോളിയോയ്ക്ക് വൈവിധ്യവല്‍ക്കരണം (Diversification) നല്‍കുകയും, ആഭ്യന്തര വിപണിയിലെ ചാഞ്ചാട്ടങ്ങളില്‍ നിന്ന് സംരക്ഷണം നല്‍കുകയും ചെയ്യും. കൂടാതെ, സ്ഥിരമായ ഇടവേളകളില്‍ നിക്ഷേപം നടത്തുന്നത് ഡോളര്‍-കോസ്റ്റ് ശരാശരി (Dollar-Cost Averaging) വഴി അപകടസാധ്യത കുറയ്ക്കാന്‍ സഹായിക്കും.

എങ്കിലും, നിക്ഷേപം നടത്തുന്നതിനു മുമ്പ് കറന്‍സി വിനിമയ നിരക്കുകള്‍, മൂലധന നേട്ട നികുതി എന്നിവയെക്കുറിച്ച് അറിഞ്ഞിരിക്കണം. ഇരു രാജ്യങ്ങളിലെയും നികുതി നിയമങ്ങള്‍ പാലിക്കേണ്ടത് അത്യാവശ്യമാണ്. ആര്‍ബിഐ (RBI) നിയമങ്ങള്‍ക്കനുസരിച്ച് എല്ലാ കാര്യങ്ങളും ഉറപ്പുവരുത്തി സന്തുലിതമായ ഒരു സമീപനം സ്വീകരിക്കുന്നത് സുരക്ഷിതമായ നിക്ഷേപത്തിന് അത്യന്താപേക്ഷിതമാണ്.

ആര്‍ബിഐയുടെ ലിബറലൈസ്ഡ് റെമിറ്റന്‍സ് സ്‌കീം പ്രകാരം ഇന്ത്യക്കാര്‍ക്ക് സാമ്പത്തിക വര്‍ഷത്തില്‍ 2.50 ലക്ഷം ഡോളര്‍ വരെ വിദേശ വിപണിയില്‍ നിക്ഷേപിക്കാം. ഇന്ത്യയില്‍ നിന്ന് യുഎസ് വിപണിയിലേക്ക് നിക്ഷേപിക്കുമ്പോള്‍ ഓഹരിയുടെ മുന്നേറ്റത്തിനൊപ്പം രൂപയുടെ ഇടിവും നിക്ഷേപകര്‍ക്ക് നേട്ടമാകും.

യുഎസ് ഓഹരികളില്‍ നിക്ഷേപിക്കാന്‍ പണം ഡോളറിലേക്ക് മാറ്റണം. ഇത് രൂപയ്‌ക്കെതിരെ ഡോളര്‍ ശക്തമാകുമ്പോഴുണ്ടാകുന്ന നേട്ടവും ഇന്ത്യന്‍ നിക്ഷേപകര്‍ക്ക് സമ്മാനിക്കും. 

മ്യൂച്വല്‍ ഫണ്ട് വഴി നിക്ഷേപിക്കാം

വിദേശ ഫണ്ടുകളില്‍ എക്‌സ്‌പ്ലേഷര്‍ ആവശ്യമുള്ള നിക്ഷേപകര്‍ക്ക് ഏറ്റവും എളുപ്പമാര്‍ഗം മ്യൂച്വല്‍ ഫണ്ടാണ്. വിദേശ മ്യൂച്വല്‍ ഫണ്ടുകളില്‍ നിക്ഷേപിക്കുന്ന ഫണ്ട് ഓഫ് ഫണ്ടിലെ ഇടിഎഫുകളിലെ നിക്ഷേപം നടത്താം. ഇതിനായി വിദേശ ട്രേഡിങ് അക്കൗണ്ട് ആവശ്യമില്ല.

ഇന്ത്യന്‍ ബ്രോക്കര്‍മാര്‍

വിദേശ ബ്രോക്കറേജുമായി സഹകരിക്കുന്ന ബ്രോക്കറേജ് ഹൗസ് വഴിയും ഓഹരികളില്‍ നിക്ഷേപിക്കാം. ഇവ വിദേശ ഓഹരികള്‍ വാങ്ങാനും വില്‍ക്കാനും വിദേശ പങ്കാളികള്‍ വഴി സഹായമൊരുക്കും. ബ്രോക്കറേജ് സ്ഥാപനത്തിന്റെ അക്കൗണ്ട് വഴി തന്നെ നിക്ഷേപിക്കാം. ഐസിഐസിഐ ഡയറക്ടിന്റെ  ഗ്ലോബല്‍ഇന്‍വെസ്റ്റ്, എച്ച്ഡിഎഫ്‌സി സെക്യൂരിറ്റീസ് ഗ്ലോബല്‍ ഇന്‍വെസ്റ്റിങ്, ഐഎന്‍ഡിമണി എന്നിവ ഈ സേവനം നല്‍കുന്നവയാണ്. 

വിദേശ ബ്രോക്കര്‍മാര്‍

ചില വിദേശ ബ്രോക്കറേജുകള്‍ ഇന്ത്യക്കാരെ അക്കൗണ്ട് ആരംഭിക്കാന്‍ അനുവദിക്കുന്നുണ്ട്. ഇന്ററാക്ടീവ് ബ്രോക്കേഴ്‌സ്, ചാള്‍സ് ഷ്വാബ് ഇന്റര്‍നാഷണല്‍, ടിഡി അമേരിട്രേഡ് എന്നിവ ഇന്ത്യക്കാര്‍ക്ക് അക്കൗണ്ട് അനുവദിക്കുന്നു. ഇത്തരം ബ്രോക്കറേജുകളുമായി അക്കൗണ്ട് ആരംഭിച്ച് അവരുടെ പ്ലാറ്റ്‌ഫോമിലൂടെ നിക്ഷേപം നടത്താം. 

അതേസമയം വിദേശ വിപണിയിലെ നേട്ടത്തിനൊപ്പം ചിലവുകളെ സംബന്ധിച്ചും നിക്ഷേപകരുടെ ശ്രദ്ധ എത്തണം. ബ്രോക്കറേജ് ഫീസിനോടൊപ്പം ഫോറക്‌സ് കണ്‍വേര്‍ഷന്‍ ഫീ കൂടെ ഇത്തരം നിക്ഷേപങ്ങളില്‍ ബാധകമാകും. വിദേശത്ത് നിക്ഷേപം നടത്തിയ ശേഷമുണ്ടാകുന്ന നേട്ടത്തിന് ഇന്ത്യയില്‍ നികുതി നല്‍കണം. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്