സൈബർ തട്ടിപ്പുകൾ ദിനംപ്രതി വർദ്ധിച്ചുവരുന്ന ഇക്കാലത്ത് ഓൺലൈൻ തട്ടിപ്പുകൾക്ക് ഇരയാകാത്ത സാധാരണക്കാരുടെ ബാങ്ക് അക്കൗണ്ടുകൾ പോലും പൂട്ടാൻ സാധ്യതയെന്ന് മുന്നറിയിപ്പ്.

സൈബർ കുറ്റവാളികൾ വ്യാജ ഇടപാടുകൾ നടത്തുന്ന അക്കൗണ്ട് ശൃംഖലകളിൽ അറിയാതെ ഉൾപ്പെടുന്ന നിരപരാധികളായ അക്കൗണ്ട് ഉടമകൾക്ക് മേലാണ് പോലീസ് നടപടികൾ ഉണ്ടാകുന്നത്.

തട്ടിപ്പിലൂടെ സമാഹരിക്കുന്ന പണം നേരിട്ട് പിൻവലിക്കുന്നതിന് പകരം കുറ്റവാളികൾ വൻതോതിൽ മറ്റ് അക്കൗണ്ടുകളിലേക്ക് മാറ്റി സ്ഥാപിക്കുകയാണ് ചെയ്യുന്നത്.

ഇത്തരത്തിൽ പണം വന്ന് പോകുന്ന വഴികളിലെ ബാങ്ക് അക്കൗണ്ടുകൾ മുഴുവനായി പോലീസ് മരവിപ്പിക്കാൻ തുടങ്ങിയതാണ് സാധാരണക്കാർക്ക് തിരിച്ചടിയാകുന്നത്.

തട്ടിപ്പ് പണം ഉപയോഗിച്ച് വ്യാപാര സ്ഥാപനങ്ങളിലോ കടകളിലോ ഓൺലൈൻ പേയ്‌മെന്റ് നടത്തിയാൽ പോലും ആ കച്ചവടക്കാരുടെ ബാങ്ക് അക്കൗണ്ട് വരെ ബ്ലോക്കാകും.

പല ഘട്ടങ്ങളിലായി പണം കൈമാറുന്ന പ്രക്രിയയിൽ അറിയാതെ കുടുങ്ങുന്ന നിരപരാധികൾക്ക് തങ്ങളുടെ പണം ഉപയോഗിക്കാൻ സാധിക്കാത്ത അവസ്ഥ ഉണ്ടാകുന്നു.

ഇത്തരം പരാതികൾ വർദ്ധിച്ചതോടെ കേന്ദ്ര ആഭ്യന്തര മന്ത്രാലയവും ഇന്ത്യാ സൈബർ ക്രൈം കോർഡിനേഷൻ സെന്ററും പുതിയ പരിഹാര മാർഗ്ഗങ്ങൾ അവതരിപ്പിച്ചിട്ടുണ്ട്.

നിരപരാധികളുടെ അക്കൗണ്ടുകൾ തടസ്സമില്ലാതെ പുനഃസ്ഥാപിക്കാൻ 'ഗ്രീവൻസ് റെഡ്രസൽ മെക്കാനിസം' എന്ന പോർട്ടൽ സംവിധാനം ആരംഭിച്ചു.

പോലീസും ബാങ്കുകളും അക്കൗണ്ട് ഉടമകളും തമ്മിൽ അതിവേഗം ഏകോപനം നടത്തി തടസ്സങ്ങൾ മാറ്റാൻ ഈ സംവിധാനം സഹായിക്കും.

മാത്രമല്ല ബാങ്ക് അക്കൗണ്ടുകൾ പൂർണ്ണമായി മരവിപ്പിക്കുന്നതിന് പകരം തട്ടിപ്പിൽ ഉൾപ്പെട്ട പ തുകയ്ക്ക് മാത്രം ലീൻ രേഖപ്പെടുത്താൻ പോലീസ് നിർദ്ദേശം നൽകിയിട്ടുണ്ട്.

ഇതുവഴി അക്കൗണ്ടിലുള്ള ബാക്കി തുക സാധാരണ രീതിയിൽ ഉപയോഗിക്കാൻ അക്കൗണ്ട് ഉടമയ്ക്ക് തടസ്സമുണ്ടാകില്ല.

തട്ടിപ്പിൽ നഷ്ടപ്പെട്ട പണം തിരികെ ലഭിക്കുന്നതിനായി 'മണി റീസ്റ്റോറേഷൻ മെക്കാനിസം' എന്ന മറ്റൊരു സംവിധാനവും നിലവിലുണ്ട്.

അമ്പതിനായിരം രൂപ വരെയുള്ള തട്ടിപ്പുകളിൽ എഫ്‌ഐആർ ഇല്ലാതെ തന്നെ കേസ് അന്വേഷിച്ച് തുക തിരികെ നൽകാൻ പൊലീസിന് സാധിക്കും.

സൈബർ അക്രമങ്ങൾ റിപ്പോർട്ട് ചെയ്യാൻ തട്ടിപ്പ് നടന്ന ഉടൻ തന്നെ 1930 എന്ന ഹെൽപ്പ് ലൈൻ നമ്പറിൽ ബന്ധപ്പെടേണ്ടത് അത്യാവശ്യമാണ്.

ആദ്യത്തെ ഒരു മണിക്കൂറിനുള്ളിൽ വിവരങ്ങൾ നൽകിയാൽ പണം തട്ടിപ്പുകാരുടെ കയ്യിലെത്താതെ വഴയിൽ വെച്ചുതന്നെ ബ്ലോക്ക് ചെയ്യാൻ പോലീസിന് സാധിക്കും.

പൊതുജനങ്ങൾ തങ്ങളുടെ ബാങ്ക് അക്കൗണ്ടുകൾ മറ്റുള്ളവർക്ക് വാടകയ്ക്കോ ഉപയോഗിക്കാനോ നൽകരുതെന്ന് ഏജൻസികൾ കർശന മുന്നറിയിപ്പ് നൽകുന്നു.

അപരിചിതരിൽ നിന്ന് ലഭിക്കുന്ന സംശയകരമായ യുപിഐ ട്രാൻസാക്ഷനുകൾ അടിയന്തരമായി ബാങ്കിനെ അറിയിക്കണം.

വ്യാജ സന്ദേശങ്ങളിലെ ലിങ്കുകളിൽ ക്ലിക്ക് ചെയ്യുന്നതും ഒടിപി പങ്കുവെക്കുന്നതും പൂർണ്ണമായി ഒഴിവാക്കണം.

സൈബർ തട്ടിപ്പിന്റെ ശൃംഖലകളിൽ പെടാതെ സ്വന്തം അക്കൗണ്ടുകൾ സുരക്ഷിതമായി സൂക്ഷിക്കാൻ എല്ലാവരും ജാഗ്രത പാലിക്കണം.

ഡിജിറ്റൽ ഇടപാടുകളിൽ വരുത്തുന്ന ചെറിയ ശ്രദ്ധക്കുറവ് പോലും അക്കൗണ്ടുകൾ മരവിപ്പിക്കപ്പെടുന്ന വലിയ പ്രതിസന്ധികൾക്ക് വഴിതുറക്കാം.

English Summary: Bank accounts of innocent individuals could become casualties in cyber fraud investigations even if they are not direct victims. Cybercriminals often route stolen money through multiple layer accounts to hide the trail resulting in police freezing innocent bank accounts. To resolve this the Indian Cyber Crime Coordination Centre launched online portals to help unfreeze accounts and restore funds for victims.

Tags: Malayalam News, News Malayalam, Latest Malayalam News, Vachakam News, Cyber Fraud India, Bank Account Frozen Cyber Crime, Cyber Crime 1930 Helpline, Business News Malayalam, Tech News Malayalam

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്