കേരളത്തില്‍ ആദ്യം ഫലം വരുന്നത് ഈ മണ്ഡലത്തില്‍...!

MAY 3, 2026, 9:38 PM

കോഴിക്കോട്: ഫല പ്രഖ്യാപന ദിവസമായ ഇന്ന് 140 മണ്ഡലങ്ങളിലെയും വോട്ടുകള്‍ എണ്ണിത്തീരുമ്പോള്‍ ആര് കേരളം ഭരിക്കുമെന്നറിയാന്‍ ജനങ്ങള്‍ കാത്തിരിക്കുകയാണ്. എന്നാല്‍ ഇതിനിടയില്‍ എല്ലാവരുടെയും ശ്രദ്ധ പിടിച്ചുപറ്റുന്ന ഒരു മണ്ഡലമുണ്ട് കോഴിക്കോട് സൗത്ത്. വോട്ടെണ്ണല്‍ തുടങ്ങി ആദ്യ മണിക്കൂറുകളില്‍ തന്നെ കൃത്യമായ ഫലസൂചനകളോടെ വാര്‍ത്തകളില്‍ നിറയാന്‍ പോകുന്ന മണ്ഡലവും ഇതാണെന്നാണ് റിപ്പോര്‍ട്ട്.

വോട്ടെണ്ണല്‍ പ്രക്രിയ സുഗമമായി നടന്നാല്‍ സംസ്ഥാനത്ത് ആദ്യം ഫലം പുറത്തുവരുന്ന മണ്ഡലം കൂടിയാകും ഇത്. ഈ മണ്ഡലത്തില്‍ പോളിങ് ബൂത്തുകളുടെ എണ്ണവും വോട്ടര്‍മാരുടെ എണ്ണവും താരതമ്യേന കുറവായതിനാലാണ് ഇവിടെ ആദ്യം ഫലം വരാന്‍ സാധ്യതയുള്ളത്. കോഴിക്കോട് നഗരത്തിന്റെ രാഷ്ട്രീയ ഹൃദയത്തുടിപ്പായ കോഴിക്കോട് സൗത്ത് മണ്ഡലത്തില്‍ ഇത്തവണ നടന്നത് പ്രവചനാതീതമായ വന്‍ പോരാട്ടമാണ്.

എല്‍.ഡി.എഫ് സ്ഥാനാര്‍ഥിയായി സിറ്റിംഗ് എം.എല്‍.എ അഹമ്മദ് ദേവര്‍കോവിലും യു.ഡി.എഫിനായി മുസ്ലിം ലീഗിന്റെ അഡ്വ. ഫൈസല്‍ ബാബുവും ബി.ജെ.പിക്കായി ടി. രനീഷും അണിനിരന്നതോടെ പോരാട്ടം അതിശക്തമായ ത്രികോണ മത്സരത്തിന് വഴിയൊരുക്കിയിരിക്കുകയാണ്. കോഴിക്കോട് നഗരസഭയുടെ പ്രധാന ഭാഗങ്ങള്‍ ഉള്‍പ്പെടുന്ന കോഴിക്കോട് സൗത്ത് മണ്ഡലം എപ്പോഴും രാഷ്ട്രീയ കേരളത്തിന്റെ കണ്ണ് പതിയാറുള്ള ഒരു വി.ഐ.പി മണ്ഡലമാണ്. കഴിഞ്ഞ 2021 ലെ തിരഞ്ഞെടുപ്പില്‍ യു.ഡി.എഫില്‍ നിന്നും എല്‍.ഡി.എഫ് തിരിച്ചുപിടിച്ച മണ്ഡലം ഇത്തവണ നിലനിര്‍ത്തുക എന്നത് ഇരുമുന്നണികള്‍ക്കും അഭിമാനപ്രശ്‌നമാണ്. അതിനാല്‍ തന്നെ വോട്ടര്‍മാരെ ഒപ്പം കൂട്ടാന്‍ സര്‍വ്വ സന്നാഹങ്ങളുമായാണ് ഇത്തവണ മുന്നണികള്‍ കളത്തിലിറങ്ങിയത്.

ഐ.എന്‍.എല്‍ നേതാവും സിറ്റിങ് എം.എല്‍.എയും മുന്‍ മന്ത്രിയുമായ അഹമ്മദ് ദേവര്‍കോവില്‍ കഴിഞ്ഞ അഞ്ച് വര്‍ഷത്തെ വികസന നേട്ടങ്ങള്‍ മുന്‍നിര്‍ത്തിയാണ് ഇത്തവണ ജനവിധി തേടിയത്. മണ്ഡലത്തില്‍ വലിയ തോതിലുള്ള റോഡ്, പാലം, ബേപ്പൂര്‍ തുറമുഖ വികസനം തുടങ്ങിയ പദ്ധതികള്‍ കൊണ്ടുവരാന്‍ കഴിഞ്ഞത് തങ്ങള്‍ക്ക് അനുകൂലമാകുമെന്നാണ് എല്‍.ഡി.എഫ് കണക്കുകൂട്ടുന്നത്.

അഹമ്മദ് ദേവര്‍കോവിലിന്റെ ജനകീയ ഇടപെടലുകള്‍ വോട്ടായി മാറുമെന്നാണ് ഇടതുപക്ഷത്തിന്റെ പ്രതീക്ഷ കഴിഞ്ഞ തവണ നഷ്ടപ്പെട്ട മണ്ഡലം ഏതുവിധേനയും തിരിച്ചുപിടിക്കാന്‍ മുസ്ലിം ലീഗിന്റെ ജനകീയ യുവനേതാവ് അഡ്വ. ഫൈസല്‍ ബാബുവിലൂടെ യു.ഡി.എഫ് കടുത്ത വെല്ലുവിളി ഉയര്‍ത്തി. യുവ നേതാവായ അഡ്വ. ഫൈസല്‍ ബാബുവിലൂടെ യുവാക്കളുടെയും മണ്ഡലത്തിലെ ഭൂരിപക്ഷ വോട്ടര്‍മാരുടെയും പിന്തുണ ഉറപ്പാക്കാന്‍ യു.ഡി.എഫ് നടത്തിയ ശക്തമായ പ്രചാരണം മത്സരത്തെ ഏറെ സങ്കീര്‍ണ്ണമാക്കി. കോഴിക്കോട് കോര്‍പ്പറേഷനിലെ സിറ്റിംഗ് കൗണ്‍സിലര്‍ കൂടിയായ ടി. രനീഷിലൂടെ ശക്തമായ വോട്ട് വിഹിതം പിടിച്ചെടുക്കാനാണ് ബി.ജെ.പി ശ്രമിച്ചത്.

കഴിഞ്ഞ തവണ 24,000-ല്‍ പരം വോട്ടുകള്‍ നേടിയ ബി.ജെ.പിക്ക് ഇത്തവണയും മണ്ഡലത്തില്‍ നിര്‍ണ്ണായക സ്വാധീനമുണ്ട്. ടി. രനീഷ് പിടിക്കുന്ന വോട്ടുകള്‍ ആരുടെയൊക്കെ വോട്ട് ബാങ്കിലാണ് വിള്ളല്‍ വീഴ്ത്തുക എന്നത് ഇരുമുന്നണികളെയും ആശങ്കപ്പെടുത്തുന്നു. 80.89 ശതമാനത്തിലധികം പോളിംഗ് രേഖപ്പെടുത്തിയ കോഴിക്കോട് സൗത്തില്‍ ജനവിധി ആര്‍ക്കൊപ്പമാകുമെന്ന് പ്രവചിക്കുക അസാധ്യമാണ്.