ഫ്ലാറ്റ് ലീസിന്, നടന്നത് ലക്ഷങ്ങളുടെ തട്ടിപ്പ്; യുവതി മുങ്ങി

JULY 3, 2025, 9:23 PM

കൊച്ചി: ഫ്ലാറ്റ് ലീസിന് നൽകാമെന്ന് നിരവധി പേരെ വിശ്വസിപ്പിച്ച് കൊച്ചിയിൽ ലക്ഷങ്ങളുടെ ഫ്ലാറ്റ് തട്ടിപ്പ്. പരാതിയുടെ അടിസ്ഥാനത്തിൽ കാക്കനാട് സ്വദേശികളായ ആശ, മിൻറോ മണി എന്നിവർക്കെതിരെ തൃക്കാക്കര പൊലീസ് കേസെടുത്തു.

നിരവധി പേരാണ് തട്ടിപ്പിനിരയായത്. മാസങ്ങളായി കൊച്ചിയിൽ തുടരുന്ന ഫ്ലാറ്റ് തട്ടിപ്പിൻറെ പിന്നിൽ ആശയും മിൻറോ ആൻറണിയുമാണെന്നാണ് പരാതി. പലരിൽ നിന്നായി 20 ലക്ഷത്തോളം രൂപ യുവതിയും കൂട്ടാളിയും തട്ടിയെടുത്തതായാണ് വിവരം.

കാക്കനാട് മാണിക്കുളങ്ങര റോഡിലുള്ള ഗ്ലോബൽ വില്ലേജ് അപ്പാർട്ട്മെൻറ് ഫ്ലാറ്റ് കേന്ദ്രീകരിച്ചാണ് ഇരുവരും തട്ടിപ്പ് നടത്തിയത്. ഫ്ലാറ്റിലെ SF 16 നമ്പർ മുറി ലീസിന് നൽകാമെന് വാഗ്ദനാം ചെയ്ത് സവാദ് എന്ന യുവാവിൽ നിന്ന് എട്ട് ലക്ഷം രൂപയാണ് പ്രതികൾ വാങ്ങിയത്.

സവാദ് നേരത്തെ താമസിച്ച വീടൊഴിഞ്ഞ് പുതിയ ഫ്ലാറ്റിലേക്ക് എത്തിയപ്പോഴാണ് അതേ ഫ്ലാറ്റിനായി വീരേന്ദ്ര പ്രസാദും കുടുംബവും ആറര ലക്ഷം രൂപ നൽകി എന്ന വിവരമറിഞ്ഞത്. ഇതോടെ വൻ തട്ടിപ്പിൻറെ ചുരുളഴിയുകയായിരുന്നു.

വീരേന്ദപ്രസാദും, സവാദും തൃക്കാക്കര പൊലീസ് സ്റ്റേഷനിൽ പരാതി നൽകാനെത്തിയപ്പോൾ സമാന തട്ടിപ്പിന് ഇരയായ കൂടുതൽ ആളുകളെ കണ്ടെത്തിയത്. കാക്കനാട്ടെയും പരിസരപ്രദേശത്തെയും ഫ്ളാറ്റുകളും അപ്പാർട്ട്‌മെന്റുകളും മാറി മാറി വാടകയ്ക്കെടുത്ത ശേഷമാണ് തട്ടിപ്പ്.