തുല്യതാ പഠിതാക്കള്‍ക്കുള്ള പുസ്തകങ്ങള്‍ മഴയില്‍ കുതിര്‍ന്നു നശിച്ചു

MARCH 23, 2025, 10:23 PM

മലപ്പുറം: തുറസ്സായ സ്ഥലത്ത് സൂക്ഷിച്ചിരുന്ന സാക്ഷരതാ മിഷൻ പാഠപുസ്തകങ്ങൾ മഴയിൽ നശിച്ചു. മലപ്പുറം മുനിസിപ്പൽ ടൗൺ ഹാളിന് പുറത്ത് സൂക്ഷിച്ചിരുന്ന നൂറുകണക്കിന് പുസ്തകങ്ങളാണ് ഒരാഴ്ചയ്ക്കുള്ളിൽ പെയ്ത വേനൽ മഴയിൽ നനഞ്ഞത്.

ഹയർ സെക്കൻഡറി തുല്യതാ വിദ്യാർത്ഥികൾക്ക് നൽകേണ്ട പുസ്തക കെട്ടുകൾ സുരക്ഷിതമല്ലാത്ത സ്ഥലത്ത് സൂക്ഷിച്ചതിനാലാണ് നശിച്ചത്.

ഈ പുസ്തകങ്ങൾ നേരത്തെ സാക്ഷരതാ മിഷന്റെ കീഴിൽ തിരൂരിലെ ചെറിയമുണ്ടത്തുള്ള ദേശീയ ഗവേഷണ കേന്ദ്രത്തിൽ സൂക്ഷിച്ചിരുന്നു.

കേന്ദ്രം പ്രവർത്തനം നിർത്തിയപ്പോൾ അവ മലപ്പുറത്തേക്ക് കൊണ്ടുവന്നു. മുനിസിപ്പാലിറ്റിയുടെ അനുമതിയോടെ, അവ താൽക്കാലികമായി ടൗൺ ഹാളിലെ ലൈബ്രറി ബ്ലോക്കിലേക്ക് മാറ്റി.

പുസ്തകങ്ങള്‍ ഇവിടെ കെട്ടിക്കിടന്നതിനാല്‍ പിഎസ്സി പരിശീലനത്തിനെത്തുന്ന കുട്ടികള്‍ക്കടക്കം തടസ്സമായി. ലൈബ്രറിയുടെ അറ്റകുറ്റപ്പണികള്‍ നടത്തണമെന്ന നഗരസഭാ ചെയർമാന്റെ ആവശ്യപ്രകാരം മൂന്നാഴ്ച മുൻപാണ് സാക്ഷരതാമിഷൻ പുസ്തകങ്ങള്‍ പുറത്തേക്കു മാറ്റിയത്.

പ്ലാസ്റ്റിക് ഷീറ്റിട്ട് പൊതിഞ്ഞിരുന്നെങ്കിലും കാറ്റില്‍ ഷീറ്റ് മാറിയാണ് പുസ്തകങ്ങള്‍ മഴയില്‍ കുതിർന്നത്. ഒരാഴ്ച മുൻപ് മഴ പെയ്തപ്പോള്‍ത്തന്നെ പുസ്തകങ്ങള്‍ നനഞ്ഞിരുന്നു.