പമ്പയിൽ ഒഴുക്കിൽപ്പെട്ട് കാണാതായ രണ്ട് വിദ്യാർത്ഥികളുടെ മൃതദേഹം കണ്ടെത്തി

FEBRUARY 24, 2026, 4:05 AM

പത്തനംതിട്ട: റാന്നിയിൽ പമ്പാ നദിയിൽ ഒഴുക്കിൽപ്പെട്ട് കാണാതായ പ്ലസ് ടു വിദ്യാർത്ഥികളുടെ മൃതദേഹം കണ്ടെത്തി. കോന്നി സ്വദേശിയായ ജോഷിനും മയിലപ്പറ സ്വദേശിയായ ക്രിസുമാണ് മരിച്ചത്. 12 അംഗങ്ങളുള്ള വിദ്യാർത്ഥി സംഘം കളരിക്കൽ കടവിൽ കുളിക്കാനെത്തിയപ്പോഴാണ് അപകടം ഉണ്ടായത്.

ഇതിൽ മൂന്ന് പേർ ഒഴുക്കിൽപ്പെടുകയായിരുന്നു. ഒരാൾ നീന്തി കരയിലേക്കെത്തി രക്ഷപ്പെട്ടു. സംഭവം ഉടൻ നാട്ടുകാരെ അറിയിച്ചതിനെ തുടർന്ന് റാന്നിയിൽ നിന്നുള്ള സ്കൂബാ സംഘം സ്ഥലത്തെത്തി തെരച്ചിൽ ആരംഭിച്ചു. ഇന്ന് രാവിലെ ഇവർ കുളിക്കാനിറങ്ങിയ കടവിനോട് ചേർന്ന പ്രദേശത്താണ് മൃതദേഹങ്ങൾ കണ്ടെത്തിയത്. തുടർ നടപടികൾക്കായി മൃതദേഹങ്ങൾ ആശുപത്രിയിലേക്ക് മാറ്റിയിട്ടുണ്ട്.