അമിത് ഷായ്ക്ക് അംബേദ്‌കറോട് പുച്ഛമെന്ന് മുഖ്യമന്ത്രി പിണറായി വിജയൻ

JANUARY 3, 2025, 9:51 AM

മലപ്പുറം: അമിത് ഷായ്ക്ക് ഡോ. ബി.ആർ. അംബേദ്‌കറോട് പുച്ഛമെന്ന് മുഖ്യമന്ത്രി പിണറായി വിജയൻ. ഭൂരിപക്ഷ വർഗീയതക്ക് ന്യുനപക്ഷ വർഗീയത മരുന്നല്ലെന്നും രണ്ടും പരസ്പര പൂരകമെന്നും മുഖ്യമന്ത്രി പറഞ്ഞു.

സംഘപരിവാർ അക്രമങ്ങളില്‍ മുസ്‌ലീം വിഭാഗങ്ങളാണ് ഏറ്റവുമധികം ഇരകളായത്. ക്രൈസ്തവരുടെ സ്ഥിതിയും വ്യത്യസ്തമല്ല. വിട്ടുവീഴ്‌ചയില്ലാതെ വർഗീയതയെ നേരിടുന്ന പാർട്ടിയാണ് കോണ്‍ഗ്രസ് എന്ന് അവർക്ക് പറയാനാവുമോ?.

കോണ്‍ഗ്രസ് നേതാക്കളും അണികളും ബിജെപിക്ക് ഒപ്പം പോകുന്നു. ആ അനുഭവത്തില്‍ നിന്നും കോണ്‍ഗ്രസ് പഠിക്കുന്നുണ്ടോ?. വർഗീയതുടെ ആടയാഭരണങ്ങള്‍ അണിഞ്ഞ ഒരുപാട് കോണ്‍ഗ്രസ് നേതാക്കളുണ്ട്. സംഘപരിവാറിനൊപ്പം ചേർന്ന് പരസ്യ നിലപാട് എടുക്കുന്ന കോണ്‍ഗ്രസ്‌ നേതാക്കളുമുണ്ടെന്നും അദ്ദേഹം പറഞ്ഞു.

കോണ്‍ഗ്രസ്‌ തുടങ്ങിവച്ച നയങ്ങളുടെ മൂർദ്ധന്യാവസ്ഥയാണ് ഇപ്പോള്‍ കേന്ദ്ര സർക്കാർ നടപ്പാക്കുന്നത്. ഉദാരവത്കരണം ഉള്‍പ്പടെ നയം കൊണ്ടുവന്നത് തെറ്റായെന്ന് കോണ്‍ഗ്രസിന് തോന്നുന്നുണ്ടോ?. ബിജെപിക്കും കോണ്‍ഗ്രസിനും ഒരേ സാമ്ബത്തിക നയമാണ്. കോണ്‍ഗ്രസ്‌ ഭരിക്കുന്ന സംസ്ഥാനങ്ങളില്‍ ബിജെപി നയമാണ് നടപ്പാക്കുന്നത്. കേന്ദ്രസർക്കാരിന് എതിരായ ജനവികാരം തിരിച്ചു വിടാൻ വർഗീയ സംഘർഷം ഉണ്ടാക്കുന്നുവെന്നും പിണറായി വിജയൻ കുറ്റപ്പെടുത്തി.

സംസ്ഥാനത്തെ സാമ്ബത്തികമായി കേന്ദ്രം ഞെരുക്കിയപ്പോഴാണ് ചില മാസങ്ങളില്‍ ക്ഷേമപെൻഷൻ നല്‍കാൻ കഴിയാതെ വന്നത്. വയനാട് ദുരന്തത്തില്‍ കൃത്യ സമയത്ത് കേന്ദ്ര സഹായം ലഭിച്ചില്ല. മറ്റു സംസ്ഥാനങ്ങള്‍ക്ക് കൃത്യ സമയത്ത് സഹായം ലഭിച്ചു. കേരളത്തോട് ഈ നിലപാട് സ്വീകരിക്കാൻ എന്താണ് കാരണം എന്ന് അദ്ദേഹം ചോദിച്ചു.

ബിജെപി പ്രതിപക്ഷത്തുള്ള സംസ്ഥാങ്ങളില്‍ ഇത്തരം സമയത്ത് സർക്കാരിനോട് യോജിച്ചു നിലപാടെടുക്കുകയും സഹായം ലഭ്യമാക്കുകയും ചെയ്തിട്ടുണ്ട്. എന്നാല്‍ കേരളത്തില്‍ ബിജെപിക്ക് എന്താണ് അങ്ങനെ ചെയ്യാൻ കഴിയാത്തത്?. എന്തിനാണ് ഇവിടുത്തെ ജനങ്ങളോട് പക?. വയനാട് വിഷയത്തില്‍ യുഡിഎഫും അവരുടെ നയത്തില്‍ മാറ്റം വരുത്തി. കേരളത്തിന് വേണ്ടി ഒന്നിച്ച്‌ ശബ്ദം ഉയർത്താൻ അവർ തയാറായെന്നും അദ്ദേഹം പറഞ്ഞു.