പരന്തൂർ വിമാനത്താവള പദ്ധതി വിജയ് സർക്കാർ റദ്ദാക്കി; റൺവേ നിർമാണത്തിന് ഭൂമി അനുയോജ്യമല്ലെന്ന് വിശദീകരണം

JULY 9, 2026, 4:21 AM

ചെന്നൈ: ചെന്നൈയ്ക്ക് സമീപം പരന്തൂരിൽ നിർമ്മിക്കാൻ ലക്ഷ്യമിട്ടിരുന്ന വമ്പൻ ഗ്രീൻഫീൽഡ് വിമാനത്താവള പദ്ധതി തമിഴ്‌നാട് സർക്കാർ ഔദ്യോഗികമായി ഉപേക്ഷിച്ചു. മുഖ്യമന്ത്രി ജോസഫ് വിജയ്‌യുടെ നേതൃത്വത്തിലുള്ള തമിഴക വെട്രി കഴകം (TVK) സർക്കാർ അധികാരമേറ്റ ശേഷമുള്ള ഏറ്റവും നിർണ്ണായകമായ തീരുമാനങ്ങളിലൊന്നാണിത്.

വിമാനത്താവളത്തിനായി നിശ്ചയിച്ചിരുന്ന ഭൂമിയിൽ ഭൂരിഭാഗവും തണ്ണീർത്തടങ്ങളും ജലാശയങ്ങളും നിറഞ്ഞതായതിനാൽ റൺവേ നിർമ്മാണത്തിന് അനുയോജ്യമല്ലെന്ന് ചൂണ്ടിക്കാണിച്ചാണ് ഈ പിന്മാറ്റം. ചെന്നൈയ്ക്കായി മറ്റൊരു അനുയോജ്യമായ സ്ഥലം കണ്ടെത്തുമെന്നും സർക്കാർ വ്യക്തമാക്കിയിട്ടുണ്ട്.

മുൻ ഡി.എം.കെ സർക്കാർ പ്രഖ്യാപിച്ച 4,970 ഏക്കറോളം വരുന്ന പരന്തൂർ വിമാനത്താവള പദ്ധതിക്കെതിരെ 2022 മുതൽ വലിയ രീതിയിലുള്ള ജനകീയ പ്രക്ഷോഭങ്ങൾ നടന്നിരുന്നു. തിരഞ്ഞെടുപ്പ് പ്രചാരണ വേളയിൽ തങ്ങൾ അധികാരത്തിൽ വന്നാൽ ജനങ്ങളുടെ കൃഷിഭൂമിയും വീടുകളും ഏറ്റെടുക്കില്ലെന്ന് വിജയ് ഗ്രാമവാസികൾക്ക് ഉറപ്പ് നൽകിയിരുന്നു. ആ വാഗ്ദാനമാണ് ഇപ്പോൾ സർക്കാർ നടപ്പാക്കിയിരിക്കുന്നത്.

പദ്ധതിക്കായി മാറ്റിവെച്ച ഭൂമിയിൽ 800 മുതൽ 900 ഏക്കറോളം ജലാശയങ്ങളായിരുന്നുവെന്ന് വ്യവസായ-നിയമ മന്ത്രി നിർമ്മൽ കുമാർ വ്യക്തമാക്കി. പ്രകൃതിദത്തമായ തണ്ണീർത്തടങ്ങൾ നശിപ്പിച്ച് റൺവേ നിർമ്മിക്കുന്നത് പ്രായോഗികമല്ലെന്നാണ് സർക്കാരിന്റെ വിലയിരുത്തൽ.

ചെന്നൈയിലെ നിലവിലെ വിമാനത്താവളം 2035-ഓടെ അതിന്റെ പരമാവധി ശേഷിയിൽ എത്തിച്ചേരുമെന്നാണ് കണക്കാക്കുന്നത്. അതിനാൽ ചെന്നൈയുടെ സാമ്പത്തിക വികസനത്തിനും ഭാവി നിക്ഷേപങ്ങൾക്കും രണ്ടാമതൊരു വിമാനത്താവളം അനിവാര്യമാണ്. പുതിയ സ്ഥലം കണ്ടെത്തുമ്പോൾ പരിസ്ഥിതി സംരക്ഷണത്തിന് മുൻഗണന നൽകുമെന്നും മന്ത്രി അറിയിച്ചു.