ന്യൂഡല്ഹി: മിഡില് ഈസ്റ്റിലെ ഭൗമരാഷ്ട്രീയ സംഘര്ഷങ്ങളും വിതരണ ശൃംഖലയിലെ മാറ്റങ്ങളും ആഗോള ഇന്ധന വിപണിയില് വലിയ വഴിത്തിരിവിന് കാരണമാകുന്നു. പരമ്പരാഗത ഗള്ഫ് വിതരണക്കാരായ സൗദി അറേബ്യയെയും യുഎഇയെയും പിന്തള്ളി കിഴക്കന് ആഫ്രിക്കന് രാജ്യമായ കെനിയയുടെ ഏറ്റവും വലിയ പെട്രോളിയം ഉല്പ്പന്ന വിതരണക്കാരായി ഇന്ത്യ മാറി. രാജ്യത്തിന് ആവശ്യമായ ക്രൂഡ് ഓയിലിന്റെ തൊണ്ണൂറ് ശതമാനത്തിലധികവും വിദേശത്ത് നിന്ന് ഇറക്കുമതി ചെയ്യുന്നതാണെങ്കിലും, സ്വന്തം റിഫൈനറി ശേഷി പ്രയോജനപ്പെടുത്തിയാണ് ശുദ്ധീകരിച്ച എണ്ണ ഉല്പ്പന്നങ്ങളുടെ കയറ്റുമതിയില് ഇന്ത്യ ഈ വലിയ നേട്ടം സ്വന്തമാക്കിയത്.
ബെല്ജിയന് കമ്മോഡിറ്റി-ഡാറ്റാ കമ്പനിയായ കെപ്ലറിന്റെ കണക്കുകള് അടിസ്ഥാനമാക്കി ഊര്ജ്ജ സാമ്പത്തിക വിദഗ്ധന് അനസ് അല്ഹജ്ജി വ്യക്തമാക്കുന്നതനുസരിച്ച് കെനിയയിലേക്കുള്ള ഗ്യാസോലിന്, ഡീസല്, ജെറ്റ് ഇന്ധനം, ഫ്യുവല് ഓയില് എന്നിവയുടെ പ്രധാന ഉറവിടമായി ഇന്ത്യ മാറിയിട്ടുണ്ട്. മിഡില് ഈസ്റ്റിലെ യുഎസ്-ഇറാന് സംഘര്ഷങ്ങള് കാരണം സൗദി അരാംകോ, അഡ്നോക് തുടങ്ങിയ സ്ഥാപനങ്ങളില് നിന്നുള്ള വിതരണം തടസപ്പെട്ടതാണ് ഇന്ത്യയെ സമീപിക്കാന് കെനിയയെ പ്രേരിപ്പിച്ചത്. ഒപ്പം റഷ്യന് ക്രൂഡ് ഉപയോഗിച്ച് നിര്മ്മിക്കുന്ന ഇന്ധനങ്ങള്ക്ക് യൂറോപ്യന് യൂണിയന് നിയന്ത്രണം ഏര്പ്പെടുത്തിയതോടെ ഇന്ത്യ തങ്ങളുടെ ഉല്പ്പന്നങ്ങള് യൂറോപ്പില് നിന്ന് ആഫ്രിക്കന് വിപണിയിലേക്ക് വഴിതിരിച്ചുവിടുകയായിരുന്നു. ഇതിന്റെ ഫലമായി ആഫ്രിക്കയിലേക്കുള്ള ഇന്ത്യയുടെ മൊത്തം പെട്രോളിയം കയറ്റുമതിയില് മുന്വര്ഷത്തേക്കാള് അറുപത്തിയാറ് ശതമാനത്തിന്റെ വര്ധന രേഖപ്പെടുത്തി.
ഇക്കാലയളവില് കെനിയയിലേക്കുള്ള യുഎഇയുടെ പെട്രോളിയം വിതരണം ജനുവരിയിലെ പ്രതിദിനം തൊണ്ണൂറായിരം ബാരല് എന്നതില് നിന്ന് ഓഗസ്റ്റില് പതിനഞ്ചായിരം ബാരലായി കുത്തനെ ഇടിഞ്ഞതായി 'കെനിയന്സ്' മാധ്യമം റിപ്പോര്ട്ട് ചെയ്യുന്നു. അതേസമയം, ഗുജറാത്തിലെ സിക്ക തുറമുഖത്ത് നിന്ന് ദശലക്ഷക്കണക്കിന് ലിറ്റര് മണ്ണെണ്ണയും ഡീസലുമാണ് കെനിയയിലെ മൊംബാസയിലേക്ക് ഇന്ത്യ കയറ്റി അയച്ചത്. റിലയന്സ് ഇന്ഡസ്ട്രീസിന്റെ ജാംനഗര് റിഫൈനറി ഉള്പ്പെടെ പ്രതിവര്ഷം ഇരുനൂറ്റിയന്പത്തെട്ട് ദശലക്ഷം ടണ്ണിലധികം ശുദ്ധീകരണ ശേഷിയുള്ള ഭീമന് റിഫൈനറി ശൃംഖലയാണ് ഈ വ്യാപാര വളര്ച്ചയ്ക്ക് ഇന്ത്യയ്ക്ക് കരുത്തായത്.
വാണിജ്യ-വ്യവസായ മന്ത്രാലയത്തിന്റെ വിവരമനുസരിച്ച് രേഖപ്പെടുത്തിയ നൂറ്റമ്പത്തൊന്നിലധികം ശതമാനത്തിന്റെ വളര്ച്ചയോടെ ഇന്ത്യയുടെ ഏറ്റവും വേഗത്തില് വളരുന്ന കയറ്റുമതി വിപണികളിലൊന്നായി കെനിയ മാറി. 2025-26 കാലയളവില് നാല് ബില്യണ് ഡോളറിലധികം ഇന്ത്യ കയറ്റുമതി നടത്തിയ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരത്തില് പെട്രോളിയം ഉല്പ്പന്നങ്ങളാണ് നിലവില് ഏറ്റവും പ്രധാന പങ്ക് വഹിക്കുന്നത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260413101910.jpg)
-20260827112332.jpg)
-20260827111826.jpg)
-20260827110949.jpg)
-20260827102648.jpg)
-20260410120128.jpg)
