കേരളത്തില്‍ തനിക്കെതിരെ കേസുകള്‍ രജിസ്റ്റര്‍ ചെയ്തിട്ടുണ്ടോ?; പൊലീസിന് അപേക്ഷ നല്‍കി ഉദയനിധി സ്റ്റാലിന്‍

MARCH 31, 2026, 2:24 AM

ചെന്നൈ: കേരളത്തില്‍ തനിക്കെതിരെ കേസുകള്‍ രജിസ്റ്റര്‍ ചെയ്തിട്ടുണ്ടോ എന്നറിയാന്‍ തമിഴ്‌നാട് ഉപമുഖ്യമന്ത്രിയും ഡിഎംകെ നേതാവുമായ ഉദയനിധി സ്റ്റാലിന്‍ പൊലീസിന് അപേക്ഷ നല്‍കിയതായി റിപ്പോർട്ട്. സംസ്ഥാന പൊലീസ് മേധാവി റവാഡ ചന്ദ്രശേഖറിനാണ് അപേക്ഷ സമര്‍പ്പിച്ചത്.

തമിഴ്‌നാട് നിയമസഭാ തെരഞ്ഞെടുപ്പില്‍ നാമനിര്‍ദ്ദേശ പത്രിക സമര്‍പ്പിക്കുന്നതിന് മുന്‍പാണ് ഈ നടപടി. സാധാരണയായി നേതാക്കള്‍ സ്വന്തം സംസ്ഥാനത്ത് കേസ് വിവരങ്ങള്‍ അന്വേഷിക്കാറുണ്ടെങ്കിലും അയല്‍ സംസ്ഥാനത്തോട് ഇത്തരമൊരു അപേക്ഷ നല്‍കുന്നത് അപൂര്‍വ്വമാണെന്നാണ് വിലയിരുത്തല്‍.

മുന്‍പ് സനാതന ധര്‍മവുമായി ബന്ധപ്പെട്ട് ഉദയനിധി സ്റ്റാലിന്‍ നടത്തിയ പരാമര്‍ശം വിവാദമായിരുന്നു. ഇതിനെ തുടര്‍ന്ന് രാജ്യത്തെ വിവിധ സംസ്ഥാനങ്ങളില്‍ കേസുകള്‍ രജിസ്റ്റര്‍ ചെയ്തിരുന്നു. അതിന്റെ പശ്ചാത്തലത്തില്‍ കേരളത്തിലും കേസുകള്‍ ഉണ്ടോയെന്നറിയാനാണ് അപേക്ഷ നല്‍കിയതെന്നാണ് സൂചന.