മാര്‍പാപ്പയുടെ ശ്വാസകോശ അര്‍ബുദം: ലക്ഷണങ്ങളും ചികിത്സയും അറിയാം

OCTOBER 15, 2026, 7:56 PM

ലിയോ പതിനാലാമന്‍ മാര്‍പാപ്പയ്ക്ക് ശ്വാസകോശാര്‍ബുദം ബാധിച്ചെന്ന് വാര്‍ത്ത ഏറെ ആശങ്കയോടെയാണ് ലോകം കേട്ടത്. ഏറ്റവും സാധാരണമായ ശ്വാസകോശ അര്‍ബുദമാണ് അദ്ദേഹത്തെ ബാധിച്ചതെങ്കിലും, രോഗം പ്രാരംഭ ഘട്ടത്തില്‍ തന്നെ കണ്ടെത്താനായത് വലിയ ആശ്വാസകരമാണ്. വലതു ശ്വാസകോശത്തിന്റെ താഴത്തെ ഭാഗം ശസ്ത്രക്രിയയിലൂടെ നീക്കം ചെയ്ത അദ്ദേഹത്തിന്റെ ആരോഗ്യനിലയെക്കുറിച്ചും രോഗത്തിന്റെ സ്വഭാവത്തെക്കുറിച്ചും അറിയേണ്ട പ്രധാന വിവരങ്ങള്‍ താഴെ വിവരിക്കുന്നു.

മാര്‍പാപ്പയ്ക്ക് സ്ഥിരീകരിച്ചിരിക്കുന്നത് ലങ് അഡിനോകാര്‍സിനോമ (Lung Adenocarcinoma) എന്ന വിഭാഗത്തില്‍പ്പെടുന്ന ശ്വാസകോശ അര്‍ബുദമാണ്. ശ്വാസകോശ അര്‍ബുദങ്ങളെ പ്രധാനമായും സ്‌മോള്‍ സെല്‍ എന്നും നോണ്‍-സ്‌മോള്‍ സെല്‍ എന്നും രണ്ട് പ്രധാന വിഭാഗങ്ങളായി തിരിക്കാറുണ്ട്. ഇതില്‍ ലോകത്ത് റിപ്പോര്‍ട്ട് ചെയ്യപ്പെടുന്ന ഭൂരിഭാഗം കേസുകളും നോണ്‍-സ്‌മോള്‍ സെല്‍ വിഭാഗത്തില്‍പ്പെടുന്നവയാണ്. ഈ വിഭാഗത്തിലെ ഏറ്റവും പ്രധാനപ്പെട്ടതും വ്യാപകവുമായ ഉപവിഭാഗമാണ് അഡിനോകാര്‍സിനോമ. ഇത് ശരീരത്തിന്റെ മറ്റ് ഭാഗങ്ങളിലേക്ക് പടരാന്‍ സാധ്യതയുള്ളതാണെങ്കിലും, തുടക്കത്തില്‍ തന്നെ കണ്ടെത്തുകയാണെങ്കില്‍ മികച്ച രീതിയില്‍ ചികിത്സിച്ച് ഭേദമാക്കാന്‍ സാധിക്കും.

പുകവലിയാണ് ശ്വാസകോശ അര്‍ബുദത്തിന് കാരണമാകുന്ന പ്രധാന ഘടകമെങ്കിലും, പുകവലിയുടെ പശ്ചാത്തലമില്ലാത്തവരിലും ഈ രോഗം കണ്ടുവരാറുണ്ട്. റേഡോണ്‍ വാതകം, ആസ്ബറ്റോസ്, റേഡിയേഷന്‍, പരോക്ഷ പുകവലി, അന്തരീക്ഷ മലിനീകരണം എന്നിവയും രോഗത്തിന് കാരണമാകുന്ന മറ്റ് ഘടകങ്ങളാണ്. രോഗം അതിന്റെ പ്രാരംഭ ഘട്ടത്തില്‍ സാധാരണയായി പ്രകടമായ ലക്ഷണങ്ങള്‍ കാണിക്കാറില്ല. രോഗം മൂര്‍ച്ഛിക്കുമ്പോള്‍ മാത്രമാണ് തുടര്‍ച്ചയായ ചുമ, നെഞ്ചുവേദന, ശബ്ദവ്യത്യാസം, ശ്വാസംമുട്ടല്‍ തുടങ്ങിയ ലക്ഷണങ്ങള്‍ കണ്ടുതുടങ്ങുന്നത്. എന്നാല്‍ മറ്റ് ആരോഗ്യ പരിശോധനകള്‍ക്കിടയില്‍ എക്‌സ്-റേയോ സിടി സ്‌കാനോ ചെയ്യുമ്പോള്‍ യാദൃശ്ചികമായി ഈ രോഗം കണ്ടെത്താന്‍ സാധിക്കാറുണ്ട്. മാര്‍പാപ്പയുടെ കാര്യത്തിലും മറ്റൊരു പരിശോധനയ്ക്കിടയിലാണ് ശ്വാസകോശത്തിലെ നോഡ്യൂള്‍ ഡോക്ടര്‍മാരുടെ ശ്രദ്ധയില്‍പ്പെട്ടത്.

രോഗബാധ തുടക്കത്തില്‍ തന്നെ കണ്ടെത്തുന്നതിന്റെ പ്രധാന നേട്ടം ഫലപ്രദമായ ശസ്ത്രക്രിയയിലൂടെ അത് പൂര്‍ണ്ണമായി നീക്കം ചെയ്യാം എന്നതാണ്. മാര്‍പാപ്പയുടെ വലതു ശ്വാസകോശത്തിന്റെ താഴത്തെ ലോബ് ഇതിന്റെ ഭാഗമായി വിജയകരമായി നീക്കം ചെയ്തിട്ടുണ്ട്. മനുഷ്യന്റെ വലതു ശ്വാസകോശത്തിന് മൂന്ന് ലോബുകളും ഇടതു ശ്വാസകോശത്തിന് രണ്ട് ലോബുകളുമാണ് ഉള്ളത്. ഇതില്‍ ഒരു ഭാഗം നീക്കം ചെയ്താലും ശേഷിക്കുന്ന ഭാഗങ്ങള്‍ ആ ചുമതല ഏറ്റെടുത്ത് ശ്വസനപ്രക്രിയ സുഗമമാക്കും. ശാരീരികക്ഷമതയുള്ളവരില്‍ ശരീരം ഈ മാറ്റവുമായി വേഗത്തില്‍ പൊരുത്തപ്പെടും. പതിവായി ടെന്നീസും നീന്തലും പരിശീലിക്കുന്ന മാര്‍പാപ്പയുടെ ഊര്‍്ജസ്വലത അദ്ദേഹത്തിന്റെ വേഗത്തിലുള്ള രോഗമുക്തിക്ക് ഏറെ സഹായകരമാകും. ശസ്ത്രക്രിയയ്ക്ക് ശേഷമുള്ള ട്യൂമറിന്റെ അവസ്ഥയും സ്വഭാവവും പരിശോധിച്ച് തുടര്‍ചികിത്സയായി കീമോതെറാപ്പിയോ റേഡിയേഷനോ ആവശ്യമുണ്ടോ എന്ന് ഡോക്ടര്‍മാര്‍ തീരുമാനിക്കും.