ഏഷ്യന്‍ സമുദ്രാതിര്‍ത്തിയില്‍ മൂന്ന് ഇറാനിയന്‍ എണ്ണ ടാങ്കറുകളെ തടഞ്ഞ് യുഎസ്; തുറമുഖത്തേക്ക് മടങ്ങാന്‍ 29 കപ്പലുകള്‍ക്ക് നിര്‍ദ്ദേശം

APRIL 22, 2026, 7:23 PM

ലണ്ടന്‍: ഏഷ്യന്‍ ജലാതിര്‍ത്തിയില്‍ ഇറാന്റെ പതാകയുള്ള മൂന്ന് ടാങ്കറുകള്‍ യുഎസ് സൈന്യം തടഞ്ഞതായി റിപ്പോര്‍ട്ട്. ഇന്ത്യ, മലേഷ്യ, ശ്രീലങ്ക എന്നിവയ്ക്ക് സമീപമുള്ള സ്ഥാനങ്ങളില്‍ നിന്ന് അവയെ തിരിച്ചുവിടുകയാണെന്ന് ഷിപ്പിംഗ് സുരക്ഷാ വൃത്തങ്ങള്‍ ബുധനാഴ്ച അറിയിച്ചു.

ഗള്‍ഫിലേക്കുള്ള പ്രവേശന കവാടത്തില്‍ ഹോര്‍മുസ് കടലിടുക്ക് വഴി കപ്പലുകള്‍ സഞ്ചരിക്കുന്നത് തടയാന്‍ കപ്പലുകള്‍ക്ക് നേരെ ഇറാന്‍ വെടിയുതിര്‍ത്തപ്പോള്‍, ഇറാന്റെ കടല്‍ വഴിയുള്ള വ്യാപാരത്തിന് വാഷിംഗ്ടണും ഉപരോധം ഏര്‍പ്പെടുത്തിയിരിക്കുകയാണ്. യുഎസും ഇസ്രായേലും ഇറാനെതിരെ യുദ്ധം ആരംഭിച്ച് ഏകദേശം രണ്ട് മാസത്തിന് ശേഷവും, വെടിനിര്‍ത്തല്‍ സമാധാന ചര്‍ച്ചകള്‍ പുനരാരംഭിക്കുന്നതിന്റെ സൂചനകളൊന്നുമില്ല.

ഇറാന്‍ ഉപരോധത്തിന്റെ ഭാഗമായി തിരിച്ചുവിടാനോ തുറമുഖത്തേക്ക് മടങ്ങാനോ 29 കപ്പലുകള്‍ക്ക് നിര്‍ദ്ദേശം നല്‍കിയതായി യുഎസ് വൃത്തങ്ങള്‍ പറയുന്നു. ഹോര്‍മുസ് കടലിടുക്ക് ഗതാഗതം ഏതാണ്ട് സ്തംഭിച്ചിരിക്കുന്നു. ഹോര്‍മുസില്‍ ബുധനാഴ്ച ഇറാന്‍ 2 ചരക്ക് കപ്പലുകള്‍ പിടിച്ചെടുത്തിരുന്നു. അതേസമയം ഇറാന്‍ കടലിടുക്ക് അടച്ചത് ലോകത്തിലെ എണ്ണ, വാതക വിതരണത്തിന്റെ അഞ്ചിലൊന്ന് വിതരണത്തെ തടസ്സപ്പെടുത്തി. ഇത് ആഗോള ഊര്‍ജ്ജ പ്രതിസന്ധിക്ക് കാരണമായി. സമീപ ദിവസങ്ങളില്‍ യുഎസ് സൈന്യം ഒരു ഇറാനിയന്‍ ചരക്ക് കപ്പലും ഒരു എണ്ണ ടാങ്കറും പിടിച്ചെടുത്തിരുന്നു. യുദ്ധം ആരംഭിച്ചതിന് ശേഷമുള്ള ആദ്യത്തെ പിടിച്ചെടുക്കലാണിത്.