സൗദി അറേബ്യയ്ക്ക് നേരെ വീണ്ടും ഇറാൻ ആക്രമണം; എണ്ണപ്പാടങ്ങൾ ലക്ഷ്യമിട്ടുള്ള ഡ്രോണുകൾ വെടിവെച്ചിട്ടു

MARCH 11, 2026, 10:56 PM

സൗദി : മിഡിൽ ഈസ്റ്റിൽ സംഘർഷം അതിരൂക്ഷമാകുന്നു. സൗദി അറേബ്യയിലെ തന്ത്രപ്രധാനമായ എണ്ണപ്പാടങ്ങൾക്ക് നേരെ ബുധനാഴ്ച ഇറാൻ നടത്തിയ ഡ്രോൺ ആക്രമണം പരാജയപ്പെടുത്തിയതായി സൗദി പ്രതിരോധ മന്ത്രാലയം അറിയിച്ചു.

അതിർത്തിക്കടുത്തുള്ള ഷൈബ എണ്ണപ്പാടം ലക്ഷ്യമാക്കി വന്ന രണ്ട് ഡ്രോണുകൾ ഉൾപ്പെടെ ആകെ ഏഴ് ഡ്രോണുകൾ തകർത്തതായി സൗദി അധികൃതർ വ്യക്തമാക്കി. ലോകത്തിലെ ഏറ്റവും വലിയ എണ്ണക്കമ്പനികളിലൊന്നായ അരാംകോയുടെ നിയന്ത്രണത്തിലുള്ളതാണ് ഷൈബ എണ്ണപ്പാടം.

ഡ്രോണുകൾക്ക് പുറമെ കിഴക്കൻ മേഖലകളെയും പ്രിൻസ് സുൽത്താൻ വ്യോമതാവളത്തെയും ലക്ഷ്യമാക്കി വന്ന ഏഴ് ബാലിസ്റ്റിക് മിസൈലുകളും സൗദി അറേബ്യ പ്രതിരോധിച്ചു. ഇതേസമയം, തങ്ങൾക്കും ഇറാനിൽ നിന്ന് മിസൈൽ, ഡ്രോൺ ആക്രമണങ്ങൾ നേരിടേണ്ടി വന്നതായി യുണൈറ്റഡ് അറബ് എമിറേറ്റ്സ് വെളിപ്പെടുത്തി.

തങ്ങളുടെ വ്യോമ പ്രതിരോധ സംവിധാനം ഈ ആക്രമണങ്ങളെ വിജയകരമായി നേരിട്ടുവെങ്കിലും ആക്രമണത്തിന്റെ കൂടുതൽ വിവരങ്ങൾ യു.എ.ഇ പുറത്തുവിട്ടിട്ടില്ല. ബഹ്റൈനിലെയും ഇറാഖിലെയും കുവൈറ്റിലെയും അമേരിക്കൻ സൈനിക താവളങ്ങൾക്ക് നേരെ തങ്ങൾ മിസൈൽ ആക്രമണം നടത്തിയതായി ഇറാന്റെ റെവല്യൂഷണറി ഗാർഡ്സ് അവകാശപ്പെട്ടു.

ബഹ്റൈനിൽ ഇതുവരെ ഇറാൻ നടത്തിയ ആക്രമണങ്ങളിൽ രണ്ട് പേർ കൊല്ലപ്പെട്ടതായാണ് റിപ്പോർട്ടുകൾ. കുവൈറ്റിലെ ക്യാമ്പ് ആരിഫ്ജാൻ ലക്ഷ്യമിട്ട് രണ്ട് മിസൈലുകൾ പ്രയോഗിച്ചതായി ഇറാൻ അവകാശപ്പെട്ടെങ്കിലും എട്ട് ഡ്രോണുകൾ വെടിവെച്ചിട്ടതായി കുവൈറ്റ് നാഷണൽ ഗാർഡ് അറിയിച്ചു.

ഹോർമുസ് കടലിടുക്കിലെ കപ്പൽ ഗതാഗതത്തിന് നേരെയുള്ള ആക്രമണങ്ങളെ ഇന്ത്യ അപലപിച്ചിട്ടുണ്ട്. മേഖലയിലെ യുദ്ധം ആഗോള എണ്ണ വിതരണത്തെ ബാധിക്കുന്നത് ഇന്ത്യയുൾപ്പെടെയുള്ള രാജ്യങ്ങളിൽ വലിയ സാമ്പത്തിക പ്രതിസന്ധിക്ക് കാരണമായേക്കാം.