'ഹോർമുസ് തുറക്കാൻ അന്താരാഷ്ട്ര സമ്മർദ്ദം ശക്തമാക്കണം'; ഫ്രാൻസുമായി ചർച്ച നടത്തി ഇന്ത്യ

APRIL 16, 2026, 11:03 PM

ദില്ലി: ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട് ഇന്ത്യ അന്താരാഷ്ട്ര തലത്തിൽ നയതന്ത്ര നീക്കങ്ങൾ സജീവമാക്കി. പ്രധാനമന്ത്രി നരേന്ദ്ര മോദിയും ഫ്രഞ്ച് പ്രസിഡന്റ് ഇമാനുവൽ മക്രോണും വിഷയത്തിൽ വിശദമായ ചർച്ച നടത്തി.

ഹോർമുസ് കടലിടുക്ക് തുറന്നു നൽകുന്നതിനായി അന്താരാഷ്ട്ര സമ്മർദ്ദം ശക്തമാക്കണമെന്ന നിലപാടാണ് ഇന്ത്യ സ്വീകരിച്ചിരിക്കുന്നത്.

കൂടുതൽ ഇന്ത്യൻ കപ്പലുകൾക്ക് സുരക്ഷിതമായി കടന്നുപോകാനുള്ള സാഹചര്യം ഒരുക്കാനാണ് സർക്കാർ ശ്രമിക്കുന്നത്. വിഷയത്തിൽ പാകിസ്ഥാൻ നടത്തുന്ന നീക്കങ്ങളെ ഇന്ത്യ സസൂക്ഷ്മം നിരീക്ഷിച്ചു വരികയാണ്.

അതേസമയം, ഇറാൻ, റഷ്യ എന്നിവിടങ്ങളിൽ നിന്നുള്ള എണ്ണ ഇറക്കുമതിക്കായി ഇന്ത്യയ്ക്ക് നൽകിയിരുന്ന ഉപരോധ ഇളവുകൾ അമേരിക്ക പുതുക്കില്ലെന്ന് വ്യക്തമാക്കി. യുഎസ് ട്രഷറി സെക്രട്ടറി സ്കോട്ട് ബെസന്റാണ് ഇക്കാര്യം അറിയിച്ചത്.

ഇറാനിയൻ എണ്ണയ്ക്ക് നൽകിയിരുന്ന 30 ദിവസത്തെ ഇളവ് ഈ മാസം 19-ന് അവസാനിക്കും. ഇതോടെ ഇന്ത്യ യുഎസിൽ നിന്നുള്ള എണ്ണ ഇറക്കുമതി വർദ്ധിപ്പിക്കുമെന്നാണ് അമേരിക്കയുടെ പ്രതീക്ഷ. റഷ്യൻ എണ്ണ ഇറക്കുമതിക്കും സമാനമായ നിയന്ത്രണങ്ങൾ ബാധകമാകും.