ടൊറന്റോ: കാനഡയിലെ ഭവന നിർമ്മാണ മേഖലയിലുണ്ടായ വിലയിടിവിനെത്തുടർന്ന്, ബാങ്കുകൾ വായ്പ നൽകുന്നതിൽ സ്വീകരിക്കുന്ന അശാസ്ത്രീയമായ രീതികൾക്കെതിരെ കടുത്ത മുന്നറിയിപ്പുമായി രാജ്യത്തെ ബാങ്കിങ് നിയന്ത്രണ ഏജൻസിയായ ഒ.എസ്.എഫ്.ഐ (OSFI). കഴിഞ്ഞ ഒക്ടോബറിൽ ബാങ്ക് ഉദ്യോഗസ്ഥരുമായി നടത്തിയ കൂടിക്കാഴ്ചയിലാണ് ഫെഡറൽ മോർട്ട്ഗേജ് ചട്ടങ്ങൾ ലംഘിക്കപ്പെടുന്നതിനെക്കുറിച്ച് റെഗുലേറ്റർ ആശങ്ക പ്രകടിപ്പിച്ചത്. റോയിട്ടേഴ്സ് പുറത്തുവിട്ട ഔദ്യോഗിക രേഖകളിലാണ് കനേഡിയൻ സാമ്പത്തിക മേഖലയെ ഉറ്റുനോക്കുന്ന ഈ നിർണ്ണായക വിവരങ്ങളുള്ളത്.
കാനഡയിലെ അപ്പാർട്ട്മെന്റ് വിപണിയിൽ ബാങ്കുകൾ പിന്തുടരുന്ന 'ബ്ലാങ്കറ്റ് അപ്രൈസൽ' (Blanket Appraisal) എന്ന രീതിയാണ് ഇപ്പോൾ വില്ലനായിരിക്കുന്നത്. ഫ്ലാറ്റുകൾ വാങ്ങാൻ കരാർ ഒപ്പിടുന്ന സമയത്തെ വില കണക്കാക്കി വായ്പ അനുവദിക്കുന്ന രീതിയാണിത്. എന്നാൽ, നിർമ്മാണം പൂർത്തിയായി താക്കോൽ കൈമാറുന്ന സമയത്ത് (Closing date) വിപണി വില വൻതോതിൽ ഇടിഞ്ഞാൽ, ബാങ്കുകൾ നൽകുന്ന വായ്പാ തുക വസ്തുവിന്റെ യഥാർത്ഥ മൂല്യത്തേക്കാൾ അധികമാകാൻ ഇത് കാരണമാകുന്നു. വസ്തുവിലയുടെ 80 ശതമാനത്തിൽ കൂടുതൽ തുക ഇൻഷുറൻസ് ഇല്ലാത്ത മോർട്ട്ഗേജുകളായി നൽകരുതെന്ന 'ബാങ്ക് ആക്ട്' ലംഘിക്കാൻ ഇത് ഇടയാക്കുമെന്ന് ഒ.എസ്.എഫ്.ഐ മുന്നറിയിപ്പ് നൽകി.
കഴിഞ്ഞ വർഷം ആഗോളതലത്തിൽ തന്നെ ഭവന വിപണിയിൽ വലിയ തകർച്ച നേരിട്ട രാജ്യങ്ങളിലൊന്നാണ് കാനഡ. കുടിയേറ്റം കുറഞ്ഞതും സാമ്പത്തിക അനിശ്ചിതത്വവും കാരണം വീടുകളുടെ വിലയിൽ 2.7 ശതമാനം വരെ ഇടിവുണ്ടായി. ടൊറന്റോ, വാൻകൂവർ തുടങ്ങിയ നഗരങ്ങളിൽ പുതുതായി പണിതീർത്ത ആയിരക്കണക്കിന് ഫ്ലാറ്റുകൾ വാങ്ങാനാളില്ലാതെ കിടക്കുകയാണ്. മുൻകൂട്ടി ബുക്ക് ചെയ്ത പലരും വിപണി വില ഇടിഞ്ഞതോടെ വായ്പാ തിരിച്ചടവിൽ വീഴ്ച വരുത്താനോ പർച്ചേസ് കരാറിൽ നിന്ന് പിന്മാറാനോ സാധ്യതയുണ്ടെന്നത് ബാങ്കുകളെ വലിയ സാമ്പത്തിക പ്രതിസന്ധിയിലേക്ക് നയിച്ചേക്കാം.
നിയന്ത്രണ ഏജൻസിയുടെ ഇടപെടലിനെത്തുടർന്ന് കാനഡയിലെ ഏറ്റവും വലിയ ബാങ്കായ റോയൽ ബാങ്ക് ഓഫ് കാനഡ (RBC) തങ്ങളുടെ വായ്പാ പരസ്യങ്ങളിൽ മാറ്റം വരുത്തിയിട്ടുണ്ട്. "ഒരിക്കൽ അംഗീകരിച്ച വായ്പ താക്കോൽ കൈമാറുന്നതുവരെ നിലനിൽക്കും" എന്ന വാഗ്ദാനം വെബ്സൈറ്റിൽ നിന്ന് ബാങ്ക് നീക്കം ചെയ്തു. നിലവിലെ വിപണി സാഹചര്യം കണക്കിലെടുത്ത് വായ്പാ മാനദണ്ഡങ്ങൾ പരിഷ്കരിക്കുന്നതിനെക്കുറിച്ച് ബാങ്കേഴ്സ് അസോസിയേഷനും റെഗുലേറ്ററുമായി ചർച്ചകൾ നടത്തിവരികയാണ്. ചട്ടങ്ങൾ പാലിക്കാത്ത പക്ഷം ബാങ്കുകൾക്കെതിരെ കർശന നടപടികളുണ്ടാകുമെന്ന സൂചനയാണ് റിപ്പോർട്ടുകൾ നൽകുന്നത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
.jpg)
-20251026042405.jpg)
-20260125020051.jpg)
-20251202014603.jpg)
-3-20260113024611.webp)
-20260113030115.webp)
-20260326105054.jfif)
-20260326105052.jfif)
-20260326102935.webp)
-20260113030114.webp)
