കാനഡയുടെ എക്സ്പ്രസ് എൻട്രി സംവിധാനത്തിൽ വലിയ മാറ്റങ്ങൾ കൊണ്ടുവരാൻ സർക്കാർ പദ്ധതി തയ്യാറാക്കുന്നു. നിലവിലുള്ള എക്സ്പ്രസ് എൻട്രി പ്രോഗ്രാമുകൾ അവസാനിപ്പിച്ച്, പുതിയതും ലളിതവുമായ ഒരു ഏകീകൃത സംവിധാനം അവതരിപ്പിക്കാനാണ് തീരുമാനം.

ഇത് 2026–2028 കാലയളവിനായുള്ള ഇമിഗ്രേഷൻ, റിഫ്യൂജീസ് ആൻഡ് സിറ്റിസൺഷിപ്പ് കാനഡയുടെ ഫോർവേഡ് റെഗുലേറ്ററി പ്ലാനിലാണ് ഇക്കാര്യം വ്യക്തമാക്കിയിരിക്കുന്നത്. അടുത്ത രണ്ട് വർഷത്തിനുള്ളിൽ നടപ്പിലാക്കാൻ സാധ്യതയുള്ള നിയമപരമായ മാറ്റങ്ങളാണ് ഇതിൽ ഉൾപ്പെടുത്തിയിരിക്കുന്നത്.

പുതിയ നിർദേശങ്ങൾ പ്രകാരം:

• ഫെഡറൽ സ്കിൽഡ് വർക്കർ ക്ലാസ്
• കാനേഡിയൻ എക്സ്പീരിയൻസ് ക്ലാസ്
• ഫെഡറൽ സ്കിൽഡ് ട്രേഡ്സ് ക്ലാസ്

ഇവയെല്ലാം ഒഴിവാക്കി, ലളിതമായ യോഗ്യതാ മാനദണ്ഡങ്ങളോടെയുള്ള ഒരു പുതിയ ഏകീകൃത വിഭാഗം അവതരിപ്പിക്കും.

അതേസമയം പുതിയ സംവിധാനത്തെക്കുറിച്ചുള്ള വിശദാംശങ്ങൾ ഇതുവരെ പരിമിതമാണ്. എന്നാൽ, വിവിധ തൊഴിൽ മേഖലകളിൽ ആവശ്യമായ കഴിവുകളുള്ള അന്താരാഷ്ട്ര പ്രതിഭകളെ കൂടുതൽ ആകർഷിക്കാൻ ഇത് സഹായിക്കുമെന്ന് സർക്കാർ വ്യക്തമാക്കി.

ലളിതമാക്കിയ യോഗ്യതാ മാനദണ്ഡങ്ങൾ അപേക്ഷകരും തൊഴിലുടമകളും പങ്കാളികളും സിസ്റ്റം എളുപ്പത്തിൽ മനസ്സിലാക്കാനും ഉപയോഗിക്കാനും സഹായിക്കുമെന്ന് അധികൃതർ പറയുന്നു. ഇപ്പോൾ ഇത് നിർദേശ ഘട്ടത്തിലാണ്. 2026-ലെ വസന്തകാലത്ത് പൊതുജനങ്ങളുടെയും പങ്കാളികളുടെയും അഭിപ്രായം തേടും. കൂടുതൽ വിവരങ്ങൾ അന്ന് പുറത്തുവിടുമെന്ന് അറിയിച്ചിട്ടുണ്ട്.

ഈ മാറ്റങ്ങൾ നടപ്പിലായാൽ, 2015-ൽ എക്സ്പ്രസ് എൻട്രി ആരംഭിച്ചതിന് ശേഷം കാനഡയുടെ ഉയർന്ന കഴിവുള്ള കുടിയേറ്റ സംവിധാനത്തിൽ ഉണ്ടാകുന്ന ഏറ്റവും വലിയ മാറ്റങ്ങളിലൊന്നായിരിക്കും ഇത്.

എക്സ്പ്രസ് എൻട്രി, കാനഡയിൽ സ്ഥിരതാമസത്തിനായി അപേക്ഷിക്കുന്ന വിദേശ പൗരന്മാർക്കുള്ള പ്രധാന ഓൺലൈൻ അപേക്ഷ സംവിധാനം ആണ്. 2025-ൽ മാത്രം, 1,17,998 പേർക്ക് സ്ഥിരതാമസത്തിനായി അപേക്ഷിക്കാൻ ക്ഷണം നൽകിയിട്ടുണ്ട്.

എക്സ്പ്രസ് എൻട്രി എന്താണ് എന്നറിയാം

എക്സ്പ്രസ് എൻട്രി കാനഡയിലെ സാമ്പത്തിക കുടിയേറ്റ പദ്ധതികൾക്കുള്ള പ്രധാന ഓൺലൈൻ മാനേജ്മെന്റ് സംവിധാനമാണ്.

കാനഡയിലേക്ക് കുടിയേറാൻ ആഗ്രഹിക്കുന്നവർ ആദ്യം മൂന്നു പ്രോഗ്രാമുകളിൽ ഏതെങ്കിലും ഒന്നിന്റെ യോഗ്യത നേടണം. തുടർന്ന് അവർ എക്സ്പ്രസ് എൻട്രി പൂളിൽ പ്രവേശിക്കും.

അവിടെ, കംപ്രഹെൻസീവ് റാങ്കിംഗ് സിസ്റ്റം പ്രകാരം അപേക്ഷകരെ റാങ്ക് ചെയ്യും. ഉയർന്ന റാങ്കുള്ളവർക്ക് സ്ഥിരതാമസത്തിനായി അപേക്ഷിക്കാനുള്ള ക്ഷണം ലഭിക്കും.

ക്ഷണം ലഭിച്ചവർ 60 ദിവസത്തിനുള്ളിൽ ആവശ്യമായ രേഖകളുമായി പൂർണ്ണമായ അപേക്ഷ സമർപ്പിക്കണം.

പെരുമാറുന്ന അപേക്ഷകളിൽ ഭൂരിഭാഗവും ആറുമാസത്തിനുള്ളിൽ പൂർത്തിയാക്കാനാണ് ലക്ഷ്യം.

നിലവിലെ മൂന്ന് പ്രധാന പ്രോഗ്രാമുകൾ

1. കാനേഡിയൻ എക്സ്പീരിയൻസ് ക്ലാസ്

കാനഡയിൽ ജോലി ചെയ്ത അനുഭവമുള്ളവർക്കുള്ള പദ്ധതി. കഴിഞ്ഞ മൂന്ന് വർഷത്തിനുള്ളിൽ കുറഞ്ഞത് ഒരു വർഷത്തെ ജോലി പരിചയം ആവശ്യമാണ്.

2. ഫെഡറൽ സ്കിൽഡ് വർക്കർ പ്രോഗ്രാം

കഴിഞ്ഞ 10 വർഷത്തിനുള്ളിൽ കുറഞ്ഞത് ഒരു വർഷത്തെ ജോലി പരിചയം ഉള്ള പ്രാവീണ്യമുള്ള തൊഴിലാളികൾക്കുള്ള പദ്ധതി. ഇത് കാനഡയിൽ ഉണ്ടായിരിക്കണമെന്നില്ല. പ്രായം, വിദ്യാഭ്യാസം, ഭാഷാപരിജ്ഞാനം തുടങ്ങിയവയും പരിഗണിക്കും.

3. ഫെഡറൽ സ്കിൽഡ് ട്രേഡ്സ് പ്രോഗ്രാം

നിശ്ചിത തൊഴിൽ മേഖലകളിലെ വിദഗ്ധർക്കുള്ള പദ്ധതി. കഴിഞ്ഞ അഞ്ച് വർഷത്തിനുള്ളിൽ കുറഞ്ഞത് രണ്ട് വർഷത്തെ ജോലി പരിചയം, ഭാഷാപരിജ്ഞാനം, ജോലി ഓഫർ അല്ലെങ്കിൽ യോഗ്യത സർട്ടിഫിക്കറ്റ് എന്നിവ ആവശ്യമാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്