വെനസ്വേലയിലെ ഇരട്ട ഭൂകമ്പം; 50 ലക്ഷം ഡോളര്‍ അടിയന്തര സഹായം പ്രഖ്യാപിച്ച് കാനഡ

JUNE 25, 2026, 7:34 PM

ഒട്ടാവ: ശക്തമായ ഇരട്ട ഭൂകമ്പങ്ങള്‍ വിനാശം വിതച്ച വെനസ്വേലയ്ക്ക് അടിയന്തര മാനുഷിക സഹായമായി കാനഡ 50 ലക്ഷം ഡോളര്‍ ധനസഹായം പ്രഖ്യാപിച്ചു. കനേഡിയന്‍ ഗ്ലോബല്‍ അഫയേഴ്‌സ് മന്ത്രാലയമാണ് ഇക്കാര്യം ഔദ്യോഗികമായി അറിയിച്ചത്. ദുരന്തബാധിതര്‍ക്ക് ആവശ്യമായ ഭക്ഷണം, കുടിവെള്ളം, ശുചിത്വ-ആരോഗ്യ സേവനങ്ങള്‍, അടിയന്തര സുരക്ഷാ ക്രമീകരണങ്ങള്‍ എന്നിവ ഉറപ്പാക്കാന്‍ വിശ്വസ്തരായ അന്താരാഷ്ട്ര പങ്കാളികള്‍ വഴി ഈ തുക വിനിയോഗിക്കും.

വെനസ്വേലയിലുണ്ടായ നാശനഷ്ടങ്ങള്‍ ഹൃദയഭേദകമാണെന്ന് കാനഡ വിദേശകാര്യ മന്ത്രി അനിത ആനന്ദ് പറഞ്ഞു. ദുരന്തമുഖത്ത് രാജ്യം വെനസ്വേലയ്‌ക്കൊപ്പം നിലകൊള്ളുമെന്നും അവര്‍ വ്യക്തമാക്കി. കാനഡ ഈ വര്‍ഷം ആദ്യം നല്‍കിയ 45 ലക്ഷം ഡോളറിന്റെ സഹായത്തിന് പുറമെയാണ് ഈ അടിയന്തര പാക്കേജ്. കൂടാതെ അന്താരാഷ്ട്ര റെഡ് ക്രോസിന്റെ ഡിസാസ്റ്റര്‍ റെസ്പോണ്‍സ് എമര്‍ജന്‍സി ഫണ്ടില്‍ നിന്ന് വെനസ്വേലന്‍ റെഡ് ക്രോസിന് 35 ലക്ഷം ഡോളറിന്റെ സഹായവും ലഭിക്കും.

റിക്ടര്‍ സ്‌കെയിലില്‍ 7.2, 7.5 തീവ്രത രേഖപ്പെടുത്തിയ രണ്ട് ശക്തമായ ഭൂകമ്പങ്ങളാണ് വെനസ്വേലയില്‍ ഉണ്ടായത്. ഒരു നൂറ്റാണ്ടിനിടയില്‍ രാജ്യം കണ്ട ഏറ്റവും വലിയ ഭൂകമ്പങ്ങളിലൊന്നാണിത്. വെനസ്വേലന്‍ തലസ്ഥാനമായ കാരക്കാസ് ഉള്‍പ്പെടെയുള്ള പ്രദേശങ്ങളില്‍ വന്‍ കെട്ടിടങ്ങള്‍ തകരുകയും വലിയ തോതില്‍ നാശനഷ്ടങ്ങള്‍ ഉണ്ടാവുകയും ചെയ്തിട്ടുണ്ട്. മൈക്വിതിയ അന്താരാഷ്ട്ര വിമാനത്താവളത്തിന്റെ മേല്‍ക്കൂര തകര്‍ന്നതിനെ തുടര്‍ന്ന് വിമാനത്താവളം താല്‍ക്കാലികമായി അടച്ചു.

പ്രാഥമിക വിവരങ്ങള്‍ പ്രകാരം 188-ലധികം പേര്‍ മരണപ്പെട്ടതായാണ് റിപ്പോര്‍ട്ട്. നിരവധി പേര്‍ ഇപ്പോഴും അവശിഷ്ടങ്ങള്‍ക്കിടയില്‍ കുടുങ്ങിക്കിടക്കുകയാണ്. പരിക്കേറ്റവരുടെ എണ്ണം ആയിരത്തിനടുത്താണ്. വെനസ്വേലയില്‍ നിലവില്‍ കനത്ത അടിയന്തരാവസ്ഥ പ്രഖ്യാപിച്ചിരിക്കുകയാണ്. സ്ഥിതിഗതികള്‍ അതിവേഗം മാറിമറിഞ്ഞുകൊണ്ടിരിക്കുകയാണെന്നും ആവശ്യമെങ്കില്‍ കൂടുതല്‍ സഹായങ്ങള്‍ നല്‍കാന്‍ കാനഡ തയ്യാറാണെന്നും പ്രധാനമന്ത്രി മാര്‍ക്ക് കാര്‍ണി വ്യക്തമാക്കി.