ടെക്‌സസ്: ലോകത്തിലെ ഏറ്റവും വലുതും ശക്തവുമായ റോക്കറ്റും പേടകവുമായ സ്റ്റാര്‍ഷിപ്പിനെ ആദ്യമായി ഭൂമിയുടെ ഭ്രമണപഥത്തിലെത്തിക്കാനുള്ള നിര്‍ണായക ദൗത്യത്തിന് സ്‌പേസ്എക്‌സ് ഒരുങ്ങുന്നു. തിങ്കളാഴ്ച നടക്കാനിരിക്കുന്ന കമ്പനിയുടെ പതിനാലാമത് ടെസ്റ്റ് ഫ്‌ലൈറ്റ് വിജയിക്കുകയാണെങ്കില്‍, സ്റ്റാര്‍ഷിപ്പ് ദൗത്യത്തിലൂടെ സ്‌പേസ്എക്‌സ് നേടുന്ന ആദ്യത്തെ വാണിജ്യ വരുമാനം കൂടിയായിരിക്കും ഇത്. കമ്പനിയുടെ പ്രധാന വരുമാന സ്രോതസ്സായ സാറ്റലൈറ്റ് ഇന്റര്‍നെറ്റ് ശൃംഖല വിപുലീകരിക്കുന്നതിന്റെ ഭാഗമായി 26 സ്റ്റാര്‍ലിങ്ക് വി3 ഉപഗ്രഹങ്ങളെ ഇത്തവണ ഭ്രമണപഥത്തില്‍ വിന്യസിക്കും. മുന്‍ ദൗത്യങ്ങളില്‍ പരീക്ഷണ സാമ്പിളുകളോ അന്തരീക്ഷത്തില്‍ കത്തിച്ചാമ്പലായ സാറ്റലൈറ്റുകളോ ആണ് അയച്ചിരുന്നതെങ്കില്‍, ആദ്യമായാണ് തുടര്‍ന്നുള്ള ദൈനംദിന ഉപയോഗത്തിനായി സ്റ്റാര്‍ലിങ്ക് ഉപഗ്രഹങ്ങള്‍ ഭ്രമണപഥത്തില്‍ എത്തിക്കുന്നത്.

ടെക്‌സസിലെ കാമറൂണ്‍ കൗണ്ടിയിലുള്ള സ്റ്റാര്‍ബേസില്‍ നിന്ന് പ്രാദേശിക സമയം രാവിലെ 8:15 നാണ് വിക്ഷേപണം നിശ്ചയിച്ചിരിക്കുന്നത്. വിക്ഷേപണത്തിനായി ഫ്‌ലൈറ്റ് കണ്‍ട്രോളര്‍മാര്‍ക്ക് 75 മിനിറ്റുള്ള ലോഞ്ച് വിന്‍ഡോ ലഭ്യമാണ്. വാഹകപേടകത്തിന്റെ ശക്തമായ സൂപ്പര്‍ ഹെവി ബൂസ്റ്ററിന് മുകളിലേറ്റിയാണ് സ്റ്റാര്‍ഷിപ്പ് കുതിച്ചുയരുക. വിക്ഷേപണത്തിന് ശേഷം പേടകത്തില്‍ നിന്ന് വേര്‍പെടുന്ന സൂപ്പര്‍ ഹെവി ബൂസ്റ്റര്‍, ദിശ മാറ്റി ഭൂമിയിലേക്ക് തിരിച്ചെത്താനായി ബൂസ്റ്റ്ബാക്ക് ബേണ്‍ നടത്തുകയും തുടര്‍ന്ന് മെക്‌സിക്കന്‍ ഉള്‍ക്കടലില്‍ സുരക്ഷിതമായി നിപതിക്കുകയും ചെയ്യും.

ഏകദേശം 10 മണിക്കൂറോളം നീണ്ടുനില്‍ക്കുന്ന ദൗത്യത്തില്‍ ആറ് തവണ ഭൂമിയെ വലംവെക്കാനാണ് സ്‌പേസ്എക്‌സ് ലക്ഷ്യമിടുന്നത്. ആദ്യഘട്ടത്തില്‍ പൂര്‍ണ്ണമായും സുരക്ഷിതമായ സബ്ഓര്‍ബിറ്റല്‍ പാതയിലായിരിക്കും പേടകത്തിന്റെ യാത്ര. പറക്കലിന്റെ തുടക്കത്തില്‍ എന്തെങ്കിലും സാങ്കേതിക പ്രശ്‌നങ്ങള്‍ കണ്ടാല്‍, അധിക നിയന്ത്രണങ്ങളൊന്നും കൂടാതെ ദൗത്യം നിര്‍ത്തിവെക്കാനും ഇന്ത്യന്‍ മഹാസമുദ്രത്തിന് മുകളിലൂടെ പുനപ്രവേശിച്ച് കടലില്‍ പതിക്കാനുമുള്ള അടിയന്തര സൗകര്യം ഇതിലുണ്ട്. എല്ലാം സുഗമമായി നടക്കുകയാണെങ്കില്‍, യാത്ര തുടങ്ങി 25 മിനിറ്റിനുള്ളില്‍ റാപ്റ്റര്‍ സീ-ലെവല്‍ എഞ്ചിന്‍ പ്രവര്‍ത്തിപ്പിച്ച് സര്‍ക്കുലറൈസേഷന്‍ ബേണ്‍ പൂര്‍ത്തിയാക്കുന്നതോടെ സ്റ്റാര്‍ഷിപ്പ് ഭൂമിക്ക് 170 മൈലിലധികം ഉയരത്തില്‍ മണിക്കൂറില്‍ 17,500 മൈല്‍ വേഗതയില്‍ ഭ്രമണപഥത്തില്‍ പ്രവേശിക്കും.

ദൗത്യത്തിലുടനീളം താപനിലയും മര്‍ദ്ദവും ത്വരണവും കൃത്യമായി നിരീക്ഷിക്കാന്‍ 500-ലധികം സെന്‍സറുകളാണ് പേടകത്തില്‍ സജ്ജീകരിച്ചിരിക്കുന്നത്. യാത്രയ്‌ക്കൊടുവില്‍ റാപ്റ്റര്‍ എഞ്ചിന്‍ ഉപയോഗിച്ച് ഡിഓര്‍ബിറ്റ് ബേണ്‍ നടത്തി അന്തരീക്ഷത്തിലേക്ക് പ്രവേശിക്കുന്ന പേടകം ചിലിക്ക് പടിഞ്ഞാറുള്ള പസഫിക് സമുദ്രത്തില്‍ പതിക്കും. പ്രതികൂല കാലാവസ്ഥയോ സാങ്കേതിക തടസ്സങ്ങളോ നേരിട്ടാല്‍ വിക്ഷേപണം നീട്ടിവെച്ചേക്കാം അല്ലെങ്കില്‍ ദൗത്യം നേരത്തെ അവസാനിപ്പിച്ച് പേടകം പതിക്കുന്ന സ്ഥലം മാറ്റിയേക്കാം. എങ്കിലും ബഹിരാകാശ ഗവേഷണ രംഗത്ത് വലിയൊരു വിപ്ലവത്തിന് വഴിതുറക്കുന്ന ഈ ദൗത്യത്തെ ഏറെ പ്രതീക്ഷയോടെയാണ് ലോകം ഉറ്റുനോക്കുന്നത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്