പാകിസ്താന് കൈത്താങ്ങായി സൗദി; 8 ബില്യൺ ഡോളറിന്റെ വമ്പൻ സാമ്പത്തിക സഹായം പ്രഖ്യാപിച്ചു

APRIL 16, 2026, 8:32 AM

കടുത്ത സാമ്പത്തിക പ്രതിസന്ധി നേരിടുന്ന പാകിസ്താനെ സഹായിക്കാൻ വമ്പൻ പാക്കേജുമായി സൗദി അറേബ്യ. നേരത്തെ പാക് സെൻട്രൽ ബാങ്കിൽ നിക്ഷേപിച്ച 5 ബില്യൺ ഡോളറിന്റെ കാലാവധി നീട്ടി നൽകിയതിനൊപ്പം, 3 ബില്യൺ ഡോളർ കൂടി അധികമായി നിക്ഷേപിക്കാനും സൗദി തീരുമാനിച്ചു.

ഇതോടെ ആകെ 8 ബില്യൺ ഡോളറിന്റെ (ഏകദേശം 67,000 കോടിയിലധികം രൂപ) സഹായമാണ് സൗദി അറേബ്യ പാകിസ്താന് ഉറപ്പാക്കുന്നത്. സൗദി പ്രസ് ഏജൻസിയാണ് (SPA) ഈ നിർണ്ണായക വിവരം പുറത്തുവിട്ടത്.

സൽമാൻ രാജാവിന്റെയും കിരീടാവകാശി മുഹമ്മദ് ബിൻ സൽമാന്റെയും നേരിട്ടുള്ള നിർദ്ദേശപ്രകാരമാണ് ഈ നീക്കം. ആഗോളതലത്തിൽ നിലനിൽക്കുന്ന സാമ്പത്തിക അനിശ്ചിതത്വങ്ങൾക്കിടയിൽ പാകിസ്താന്റെ സമ്പദ്‌വ്യവസ്ഥയെ തകർച്ചയിൽ നിന്ന് കരകയറ്റാനും സാമ്പത്തിക സ്ഥിരത ഉറപ്പാക്കാനുമാണ് ഈ സഹായം ലക്ഷ്യമിടുന്നത്. പുതുതായി എത്തുന്ന 3 ബില്യൺ ഡോളർ പാകിസ്താന്റെ വിദേശനാണ്യ ശേഖരം വർധിപ്പിക്കാൻ ഏറെ സഹായകമാകും.

പാകിസ്താൻ നേരിടുന്ന സാമ്പത്തിക വെല്ലുവിളികൾ അതിജീവിക്കാനും രൂപയുടെ മൂല്യം ഇടിയുന്നത് തടയാനും ഈ സഹായം വഴിതുറക്കുമെന്ന് സൗദി അധികൃതർ വ്യക്തമാക്കി. ഇരുരാജ്യങ്ങളും തമ്മിലുള്ള ദീർഘകാല സഹകരണത്തിന്റെ ഭാഗമായാണ് ഈ നടപടി. പാകിസ്താനുമായുള്ള ആഴത്തിലുള്ള സൗഹൃദവും പങ്കാളിത്തവും സൗദി അറേബ്യ ആവർത്തിച്ച് വ്യക്തമാക്കുന്നു.

പാകിസ്താനിലെ ജനങ്ങളുടെ ജീവിതസാഹചര്യങ്ങൾ മെച്ചപ്പെടുത്തുന്നതിനും സാമ്പത്തിക അടിത്തറ ശക്തമാക്കുന്നതിനുമുള്ള സൗദിയുടെ പ്രതിബദ്ധതയാണ് ഈ പാക്കേജിലൂടെ പ്രതിഫലിക്കുന്നത്. വിദേശ കടബാധ്യതകളും സാമ്പത്തിക സമ്മർദ്ദങ്ങളും മൂലം പാകിസ്താൻ നട്ടംതിരിയുന്ന വേളയിൽ, സൗദി അറേബ്യയുടെ ഈ 'സഹോദര തുല്യമായ' ഇടപെടൽ രാജ്യത്തിന് വലിയ ആശ്വാസമാണ് നൽകുന്നത്. ആഗോള സാമ്പത്തിക രംഗത്ത് പാകിസ്താന്റെ ഏറ്റവും വലിയ പിന്തുണക്കാരനായി സൗദി അറേബ്യ ഇതോടെ വീണ്ടും മാറിയിരിക്കുകയാണ്.